បាតុកម្មប្រឆាំងឯកអគ្គរដ្ឋទូតអាមេរិកនៅប្រទេសថៃ
ប្រជាជនថៃប្រមាណ ២០០នាក់ នៅថ្ងៃសុក្រនេះបានប្រមូលគ្នា ធ្វើបាតុកម្មនៅមុខស្ថានទូតអាមេរិក ក្នុងទីក្រុងបាងកក។ បាតុករ ដែលដឹកនាំដោយព្រះសង្ឃថៃមួយអង្គ បានស្រែកប្រឆាំងឯកអគ្គរដ្ឋទូតអាមេរិកដែលបានលើកឡើងពីការកើនឡើងនៃការចាប់ដាក់ឃុំមនុស្ស នៅ ប្រទេសថៃ ក្នុងបទចោទប្រកាន់ រំលោភច្បាប់ជេរប្រមាថព្រះមហាក្សត្រ។
ចុះផ្សាយនៅថ្ងៃ៖
ស្តាប់ - ០២:៣៨
“កុំលូកដៃចូលក្នុងកិច្ចការផ្ទៃក្នុងរបស់ថៃ។ យើងស្រឡាញ់ព្រះមហាក្សត្រជាងជីវិតយើងទៅទៀត"។ នេះជាអក្សរដែលអ្នកកាសែតរបស់ទីភ្នាក់ងារព័ត៌មានបារាំង AFPឃើញមានសរសេរនៅលើបដារបស់បាតុករ ថៃ ដែលរួម គ្នាតវ៉ានៅមុខស្ថានទូតអាមេរិក ក្នុងទីក្រុងបាងកក។ បាតុកម្មនៅថ្ងៃសុក្រនេះធ្វើឡើងដើម្បីប្រតិកម្មប្រឆាំងឯកអគ្គរដ្ឋទូតអាមេរិក លោកGlyn T Davies ដែលបាននិយាយកាលពីថ្ងៃពុធថា លោកមានការព្រួយបារម្ភពីការដាក់ទោសរយៈពេលវែងៗទៅលើប្រជាជន ដែលត្រូវតុលាការយោធាថៃ ចោទក្នុងបទរំលោភច្បាប់ជេរប្រមាថព្រះមហាក្សត្រ។ លោកឯកអគ្គរដ្ឋទូតអាមេរិកនៅ បានបន្ថែមថា “យើងគិតថា គ្មាននរណាម្នាក់ ដែលត្រូវចាប់ដាក់ពន្ធនាគារ ដោយសារតែបានសំដែងបញ្ចេញមតិរបស់ខ្លួនដោយសន្តិភាពនោះទេ”។
នៅមុខក្រុមបាតុករស្លៀកពាក់ពណ៌លឿង ដែលផ្តុំគ្នា នៅមុខស្ថានទូតអាមេរិក ព្រះសង្ឃថៃ លួង ពូពុដា អ៊ីសារ៉ា បានអានលិខិតថ្កោលទោសសំដីរបស់ឯកអគ្គរដ្ឋទូតអាមេរិកនៅប្រទេសថៃ។ “អាមេរិកគ្មានសិទ្ធិ គ្មានអំណាច លូកដៃចូលក្នុងកិច្ចការរបស់ថៃ។ ថៃមិនមែនជាទាសកររបស់អាមរិកទេ។ ព្រះមហាក្សត្រជានិមិត្តរូបជាទីសក្ការៈ ខ្ពង់ខ្ពស់ ដែលប្រជាជនថៃត្រៀមនឹងបូជាជីវិតដើម្បីការពារ”។
ព្រះសង្ឃអ៊ីសារ៉ា ត្រូវបានគេស្គាល់មុខជាមេដឹកនាំចលនាប្រឆាំងនឹងរដ្ឋាភិបាលស៊ីវិល របស់លោកស្រីយីងឡាក់ ស៊ីណាវ៉ាត ក្នុងមហាបាតុកម្ម ដែលត្រូវបិទបញ្ចប់ដោយរដ្ឋប្រហារ និងការចូលកាន់អំណាចរបស់ក្រុមយោធា នៅឆ្នាំ ២០១៤។ លោកនាយករដ្ឋមន្រ្តីប្រាយុទ្ធ ចាន់អូចា ដែលបានបោះបង់ឯកសណ្ឋាន មេទ័ពថៃ ដើម្បីចូលដឹកនាំរដ្ឋាភិបាលអន្តរកាល នៅថ្ងៃសុក្រនេះបានចាក់សាំងបន្ថែមលើភ្លើង ដោយលោកបាននិយាយថា អ្វីៗគឺស្ថិតនៅលើឯកអគ្គរដ្ឋទូតអាមេរិក។ ប្រតិកម្មទៅនឹងការថ្លែងរបស់លោក Glyn T Davies លោកនាយករដ្ឋមន្រ្តីថៃបាននិយាយថា លើកក្រោយៗ ទូតអាមេរិកមិនចាំបាច់បញ្ជូនមនុស្សឲ្យមកនិយាយពីការដោះដូរពាណិជ្ជកម្មជាមួយលោកនោះទេ។
នៅមុនរដ្ឋប្រហារទម្លាក់រដ្ឋាភិបាលស៊ីវិល ចេញមកពីការបោះឆ្នោត អាមេរិកនិងថៃធ្លាប់ជាសម្ព័ន្ធមិត្តយោធានឹងគ្នា។ ប៉ុន្តែ ទំនាក់ទំនងការទូតអាមេរិក និងថៃ បានជួបភាពតានតឹង នៅក្រោយអាមេរិករិះគន់ជាញយដង ការអនុវត្តច្បាប់ជេរប្រមាថព្រះមហាក្សត្រ សម្រាប់ចាប់ដាក់ឃុំក្រុមប្រឆាំង។ អាមេរិកនៅបានទាមទារឲ្យថៃវិលត្រលប់មកផ្លូវប្រជាធិបតេយ្យត តាមរយៈការបោះឆ្នោត សេរី។ ការរិះគន់មិនឈប់ឈររបស់អាមេរិកបានរុញច្រានរដ្ឋាភិបាលថៃ ទៅខិតចូលចិន នៅពេលគេឃើញ លោកនាយករដ្ឋមន្រ្តីថៃ ប្រាយុទ្ធ ចាន់អូចារ ធ្វើទស្សនកិច្ចជាច្រើនទៅប្រទេសចិន នៅក្រោយធ្វើរដ្ឋប្រហារ ទម្លាក់រដ្ឋាភិបាលស៊ីវិល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ