រុស្ស៊ីវេតូប្រឆាំងមិនឲ្យបង្កើតតុលាការជំនុំជម្រះអ្នកទទួលខុសត្រូវធ្វើឲ្យផ្ទុះធ្លាក់យន្តហោះម៉ាឡេស៊ី
នៅថ្ងៃពុធទី ២៩កក្កដា ក្រុមប្រឹក្សាសន្តិសុខអង្គការសហប្រជាជាតិបានបន្តកិច្ចប្រជុំ និងអនុម័តគម្រោង សេចក្តីសម្រេចស្តីពីការបង្កើតសាលាក្តីពិសេសអង្គការសហប្រជាជាតិ ដើម្បីជំនុំជម្រះអ្នកដែលទទួលខុសត្រូវលើមហន្តរាយនៃយន្តហោះMH17របស់ក្រុមហ៊ុនអាកាសចរណ៍ម៉ាឡេស៊ី Airlines ដែលបានត្រូវគេបាញ់ធ្លាក់កាលពីថ្ងៃទី១៧ខែកក្កដាឆ្នាំ២០១៤នៅភាគខាងកើតប្រទេសអ៊ុយក្រែន។
ចុះផ្សាយនៅថ្ងៃ៖
ស្តាប់ - ០២:១១
ការបង្កើតតុលាការអន្តរជាតិមួយនេះ មិនមែនជាការទាមទារតែប្រទេសម៉ាឡេស៊ីតែម្នាក់ប៉ុណ្ណោះទេ ប៉ុន្តែ ក៏ជាការទាមទារដោយប្រទេសហូឡង់ អូស្ត្រាលី បែលហ្ស៊ិក និងអ៊ុយក្រែនផងដែរ។ ប្រទេសទាំងនេះត្រូវបានគាំទ្រដោយទីក្រុងឡុងដ៍ ទីក្រុងវ៉ាស៊ីនតោន និងទីក្រុងប៉ារីសដែលបានចោទប្រកាន់ក្រុមឧទ្ទាមអ៊ុយក្រែនគាំទ្ររុស្ស៊ី និងផ្គត់ផ្គង់ដោយរុស្ស៊ីថា បានបំផ្លាញយន្តហោះMH17នេះ។
រីឯ ប្រទេសរុស្ស៊ីបានជំទាស់តាំងពីដំបូងម្ល៉េះ ចំពោះការបង្កើតតុលាការនេះ និងបានអំពាវនាវឲ្យបញ្ចប់ការស៊ើបអង្កេតលើការធ្លាក់យន្តហោះនេះជាមុនសិន។ ហើយ រុស្ស៊ីក៏បានស្នើទៅទីក្រុង ញូវយ៉ក នូវគម្រោងសេចក្តីសម្រេចថ្មីមួយផ្សេងទៅវិញ ដែលក្នុងនោះមិនមាន និយាយពីការបង្កើត តុលាការនោះទេ ដោយគ្រាន់តែស្នើ ពន្លឿនការអង្កេតធ្វើឡើង ដោយក្រុមប្រទេសចំនួនប្រាំ (ហូឡង់ អូស្រ្តាលី បែលហ្ស៊ិក, ម៉ាឡេស៊ី, អ៊ុយក្រែន) តែប៉ុណ្ណោះ។ គម្រោងសេចក្តីសម្រេចស្នើដោយក្រុងម៉ូស្គូ នេះទទួលបានការគាំទ្រពី វេណេស៊ុយអេឡា និងប្រទេសចិន។ ឯ ការព្យាយាមចរចា ដើម្បីច្របាច់បញ្ចូលគ្នា រវាងគម្រោងនេះ និងការបង្កើតសាលាក្តីពិសេស រហូតមកដល់ពេលនេះត្រូវបានបរាជ័យ។
ទន្ទឹមនឹងនោះ កាលពីថ្ងៃពុធ តាមខ្សែទូរស័ព្ទលោកនាយករដ្ឋមន្ត្រី ប្រទេសហូឡង់លោក Mark Rutte បានជំរុញ លោកប្រធានាធិបតីរុស្ស៊ី វ្ល៉ាឌីមៀរពូទីនឱ្យទទួលយកការបង្កើតសាលាក្តីពិសេសអង្គការសហប្រជាជាតិនេះ តែមិនបានសម្រេច។ ក្នុងសេចក្តីថ្លែងការណ៍មួយរបស់វិមានក្រេមឡាំង លោកពូទីនបានគូសបញ្ជាក់ថា៖ "ប្រទេសរុស្ស៊ីនៅតែបន្តជឿថា ការបង្កើតតុលាការមួយបែបនេះ គឺមិនមែនជាវិធីដ៏ល្អបំផុតឆ្ពោះទៅមុខនោះទេ"។
ទីបំផុតទៅ នៅល្ងាចថ្ងៃពុធ ការបោះឆ្នោត ដោយក្រុមប្រឹក្សសន្តិសុខបានប្រព្រឹត្តទៅដោយ បានលទ្ធផល១១សម្លេងគាំទ្រ ៣សម្លេងអនុបវាទ(ចិន អង់ហ្គោឡា និងវេណេស៊ុយអេឡា) និង១សម្លេងប្រឆាំងរបស់រុស្ស៊ីដែលប្រើសិទ្ធិវេតូ មិនឲ្យសេចក្តីសម្រេចនេះត្រូវបានអនុម័ត គឺដូចជាអ្វីដែលលោកខាងលិចបានគិតទុកមុនរួចជាស្រេច។
គួររំលឹកថា សោកនាដកម្ម ជើងហោះហើរ MH17 របស់ក្រុមហ៊ុនអាកាសចរណ៍ម៉ាឡេស៊ី Airlines កាលពី ខែកក្កដាឆ្នាំ២០១៤ កន្លងទៅ នៅភាគខាងកើតប្រទេសអ៊ុយក្រែន សម្លាប់មនុស្សចំនួន២៩៨នាក់ដោយ រួមទាំងអ្នកបម្រើការលើយន្តហោះផងដែរ ហើយដែលក្នុងនោះអ្នកដំណើរភាគច្រើនសញ្ជាតិហូឡង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ