នេប៉ាល់៖ចំនួនមនុស្សស្លាប់កើនជាលំដាប់ រីឯជំនួយអន្តរជាតិក៏កំពុងកើនឡើង និងផ្តើមទៅដល់បណ្តើរៗ
នៅប្រទេសនេប៉ាល់ ៣ថ្ងៃ ក្រោយគ្រោះរញ្ជួយដីកាលពីថ្ងៃសៅរ៍ ទី២៥ មេសាមក ចំនួនមនុស្សស្លាប់ និងរបួសបាន និងកំពុងកើនឡើងពីមួយថ្ងៃទៅមួយថ្ងៃ។ ចំណែកជំនួយអន្តរជាតិ ពិសេសស្បៀងអាហារ ថ្នំាពេទ្យ និងសម្ភារៈចំាបាច់បន្ទាន់មួយចំនួនក៏កំពុងកើនឡើងជាលំដាប់ និងបានផ្តើមទៅដល់ទឹកដីនេប៉ាល់ជាបណ្តើរៗ។ តែអ្វីដែលរដ្ឋអំណាចនេប៉ាល់កំពុងជួបការលំបាកពេលនេះ គឺការគ្រប់គ្រង និងការចែកចាយជំនួយជាបន្ទាន់សម្រាប់ជនរងគ្រោះដែលស្ថិតនៅតំបន់ឆ្ងាយដាច់ស្រយាលដែលគេពិបាកធ្វើដំណើរទៅដល់ ដោយសារតែផ្លូវថ្នល់ត្រូវបានបំផ្លាញខ្ទេចខ្ទីរដោយរញ្ជួយដី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
រហូតមកដល់ម៉ោងនេះ គេពិបាកនឹងផ្តល់តួលេខពិតប្រាកដនៃចំនួនមនុស្សស្លាប់ និងរបួស។ តែលោកនាយករដ្ឋមន្រ្តីនេប៉ាល់ Sushil Koirala បានប្រាប់ឲ្យដឹងនៅរសៀលថ្ងៃអង្គារ ទី២៨ មេសាថា ចំនួនមនុស្សស្លាប់អាចនឹងកើនលើសពី ១០ ០០០នាក់។ ការប្រមើលមើលយ៉ាងដូចនេះត្រូវបានលោក Koirala លើកយកហេតុផលថា នៅមានភូមិ ស្រុករងគ្រោះដាច់ស្រយាលជាច្រើនទៀតដែលរដ្ឋអំណាចនៅមិនទាន់ទទួលបានព័ត៌មានគ្រប់គ្រាន់នៅឡើយ។ ទន្ទឹមគ្នានេះ ប្រមុខរដ្ឋាភិបាលនេប៉ាល់បានប្រកាសកាន់ទុក្ខជាតិចំនួន ៣ថ្ងៃ ព្រមទំាងទទួលស្គាល់ពីការលំបាកក្នុងការនំាជំនួយទៅជួយជនរងគ្រោះឲ្យបានគ្រប់ទីកន្លែង ពិសេសនៅតំបន់ដាច់ស្រយាលដោយសារតែផ្លូវថ្នល់ខ្ទេចខ្ទីរ រួមផ្សំនឹងកង្វះសម្ភារៈ និងក្រុមអ្នកជំនាញ។ ជាថ្មីម្តងទៀត រដ្ឋាភិបាលនេប៉ាល់បានបន្តទទូចសុំជំនួយពីសហគមន៍អន្តរជាតិ ពិសេសជំនួយជាសម្ភារៈពេទ្យ។
នៅពេលនេះ សឹងតែគ្រប់ប្រទេសក្នុងលោកបានឆ្លើយតបតាមសំណើសុំរបស់នេប៉ាល់ ហើយជំនួយមួយភាគធំបានទៅដល់ និងផ្តើមទៅដល់ទឹកដីនេប៉ាល់ជាបណ្តើរៗ។ មានប្រទេសខ្លះថែមទំាងដំឡើងជំនួយរបស់ខ្លួន ដូចយ៉ាងអាមេរិកសន្យាជួយ ១០លានដុល្លារ ជប៉ុនផ្តល់ ៨លានដុល្លារ អូស្រ្តាលីផ្តល់ ៤លាន ៧សែនដុល្លារ និងន័រវែសសន្យាផ្តល់ឲ្យជិត ១៧លានដុល្លារ។ ចំណែកស្ថាប័នរបស់អង្គការសហប្រជាជាតិវិញ មូលនិធិអន្តរាគមន៍បន្ទាន់បានផ្តល់ចំនួន ១៥លានដុល្លារ ហើយអង្គការស្បៀងអាហារពិភពលោកបានសន្យាផ្គត់ផ្គង់ស្បៀងអាហារសម្រាប់ប្រជាជននេប៉ាល់ ១លាន ៤សែននាក់ក្នុងរយៈពេល ៣ខែខាងមុខ។
ដូច្នេះជំនួយអន្តរជាតិសម្រាប់នេប៉ាល់មិនខ្វះទេ តែការលំបាកដែលរដ្ឋអំណាចនេប៉ាល់កំពុងជួបពេលនេះ គឺការគ្រប់គ្រង និងចាត់ចែងជំនួយទំាងនោះ ពិសេសនៅអាកាសយានដ្ឋានក្នុងទីក្រុងកដ្ឋមណ្ឌូដែលចរាចរណ៍ហោះឡើង និងចុះចតកំពុងកកស្ទះ។ មានយន្តហោះដឹកជំនួយខ្លះត្រូវហោះក្រឡឹងពីរ ឬបីជុំមុននឹងអាចចុះចតបាន ហើយមានឧទ្ធម្ភាគចក្រខ្លះ ពិសេសរបស់ឥណ្ឌាថែមទំាងបង្ខំចិត្តត្រឡប់ទៅចុះចតកន្លែងដើមវិញមួយរយៈសិន ទើបហោះត្រឡប់មកនេប៉ាល់ជាថ្មី។ យោងតាមតួលេខផ្តល់ដោយអង្គការសហប្រជាជាតិ មានអ្នកបាត់បង់ទីជម្រកប្រមាណជា ៨លាននាក់ដែលកំពុងស្នាក់នៅកណ្តាលវាលគ្មានទីជម្រកត្រឹមត្រូវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ