ប្រធានាធិបតីចិនចង់បង្កើនទំនាក់ទំនងបារំាង ចិនឲ្យបានរឹងមំា និងយូរអង្វែង
លោកនាយករដ្ឋមន្រ្តីបារំាងម៉ាណុយអែល វ៉ាល្ស (Manuel Valls) កំពុងបន្តទស្សនកិច្ចក្នុងប្រទេសចិន។ បន្ទាប់ពីបានជួបជាមួយលោកនាយករដ្ឋមន្រ្តីចិនលី ខឺជំាង លោកវ៉ាល្សក៏បានជួបសន្ទនាជាមួយលោកប្រធានាធិបតីចិនស៊ី ជីនពីងក្នុងទីក្រុងប៉េកំាងនារសៀលថ្ងៃសុក្រ ទី៣០ មករា។ នៅក្នុងជំនួបជាមួយលោកវ៉ាល្ស លោកស៊ី ជីនពីងបានបញ្ជាក់ថា ទំនាក់ទំនងរវាងបារំាង និងចិនត្រូវបានពង្រឹងឡើងយ៉ាងលឿនគួរឲ្យកត់សម្គាល់។ ដោយឡែកក្នុងថ្ងៃសុក្រដដែល លោកនាយករដ្ឋមន្រ្តីបារំាង និងលោកនាយករដ្ឋមន្រ្តីចិនបានបើកសម្ភោធរួមគ្នានូវរូបសំណាកឧត្តមសេនីយបារំាងដឺហ្គោល (de Gaulle)។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
គឺនៅក្នុងវិមានប្រជាជននៃទីលានជៀនអាន់មេនស្ថិតក្នុងទីក្រុងប៉េកំាងដែលលោកប្រធានាធិបតីចិនស៊ី ជីនពីងបានទទួលជួបសំណេះសំណាលជាមួយលោកនាយករដ្ឋមន្រ្តីបារំាងម៉ានុយអែល វ៉ាល្ស។ ជាថ្មីម្តងទៀត និងតំាងនាមឲ្យប្រជាជនចិនទំាងអស់ លោកស៊ី ជីនពីងបានផ្ញើសាររំលែកទុក្ខជាមួយពលរដ្ឋបារំាងដែលបានទទួលរងអំពើភេរវកម្មកាលពីដើមខែមករានេះ។ គឺជាភេរវកម្មវាយប្រហារលើទីស្នាក់ការរបស់ទស្សនាវដ្តីត្លុកកំប្លែង Charlie Hebdo ក្នុងទីក្រុងប៉ារីសដែលបានបណ្តាលឲ្យស្លាប់មនុស្សចំនួន ១២នាក់ ក្នុងនោះមានអ្នកកាសែត Charlie Hebdo ចំនួន ៨នាក់។ លោកស៊ី ជីនពីងបានបន្ថែមថា ប្រទេសចិនបានគំាទ្រយ៉ាងពេញទំហឹងចំពោះការប្រឹងប្រែងរបស់រដ្ឋាភិបាលបារំាងក្នុងការប្រយុទ្ធប្រឆំាងនឹងភេរវនិយម ក៏ដូចជារក្សាសន្តិសុខជាតិ និងថា លោកចង់ឲ្យទំនាក់ទំនងឧភតោភាគីបារំាង ចិនកាន់តែរឹងមំា និងមានដំណើរទៅមុខកាន់តែឆ្ងាយ។
ជាចម្លើយតបវិញជាមួយនឹងស្នាមញញឹម និងការចាប់រលាក់ដៃជាមួយលោកស៊ី ជីនពីង លោកម៉ានុយអែល វ៉ាល្សបានថ្លែងអំណរគុណចំពោះលោកស៊ី ជីនពីងរួចបន្ថែមថា ប្រធានាធិបតីបារំាង ខ្លួនលោកផ្ទាល់ និងក្រសួងការបរទេសបារំាងមានចិត្តរំភើបក្រៃលែងចំពោះសារចូលរួមសាមគ្គីភាពដែលចិនបានផ្ញើចំពោះបារំាងនៅក្រោយភេរវកម្ម។ អ្វីដែលលោកវ៉ាល្សបានលើកសរសើរនៅចំពោះមុខលោកជីនពីងនោះ គឺវត្តមានឯកអគ្គរដ្ឋទូតចិនប្រចំាក្រុងប៉ារីសជាមួយនឹងថ្នាក់ដឹកនំាបរទេសផ្សេងទៀតនៅក្នុងក្បួនបាតុកម្មសម្តែងសាមគ្តីភាពប្រឆំាងនឹងភេរវនិយមនៅប៉ារីស។
គួររម្លឹកជូនថា នៅក្រោយភេរវកម្មវាយប្រហារ Charlie Hebdo លោកស៊ី ជីនពីងបានផ្ញើសារចូលរួមរំលែកទុក្ខទៅកាន់លោកប្រមុខរដ្ឋបារំាងហ្រ្វង់ស័រ ហូឡង់ដោយលោកស៊ី ជីនពីងបានចាត់ទុកភេរវនិយមថា ជាសត្រូវរួមរបស់មនុស្សជាតិទំាងមូល។ បន្ទាប់ពីជួបជាមួយលោកប្រមុខរដ្ឋចិន លោកប្រមុខរដ្ឋាភិបាលបារំាងក៏បានទទួលជួបដោយលោកប្រធានរដ្ឋសភាចិនដែរ។ បន្ទាប់ក្នុងថ្ងៃសុក្រដដែល លោកវ៉ាល្ស និងលោកនាយករដ្ឋមន្រ្តីចិនបានបើកសម្ភោធរួមគ្នានូវរូបសំណាកឧត្តមសេនីយបារំាងដឺហ្គោលធ្វើពីសំរិទ្ធដែលដាក់តម្កល់ក្នុងសារៈមន្ទីរជាតិនៅក្រុងប៉េកំាង។ ចូរកុំភ្លេចថា ឧត្តមសេនីយបារំាងដឺហ្គោល គឺជាថ្នាក់ដឹកនំាបស្ចិមលោកតែម្នាក់គត់ដែលបានចេញមុខទទួលស្គាល់ចិនប្រជាមានិតជាផ្លូវការកាលពីថ្ងៃទី២៧ មករា ឆ្នំា ១៩៦៤ ចំពេលដែលពិភពលោកស្ថិតក្នុងសង្រ្គាមត្រជាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ