ចិនដីគោក និងចិនតៃវ៉ាន់មិនចុះសម្រុងគ្នាជុំវិញបរាជ័យរបស់ជប៉ុនក្នុងសង្រ្គាមលោកលើកទី២
នៅថ្ងៃទី៣ កញ្ញាខាងមុខ រដ្ឋាភិបាលចិនដីគោកនឹងរៀបចំមហាក្បួនព្យុះហយាត្រាយោធាមួយនៅទីលានធានអាន់មេនដើម្បីប្រារព្ធខួបលើកទី៧០ នៃបរាជ័យរបស់ប្រទេសជប៉ុននៅក្នុងសង្រ្គាមលោកលើកទី២ ឆ្នំា ១៩៤៥។ នៅដើមសប្តាហ៍នេះ ទីក្រុងប៉េកំាងបានផ្សព្វផ្សាយឲ្យដឹងនូវបញ្ជីឈ្មោះថ្នាក់ដឹកនំាបរទេសដែលនឹងត្រូវចូលរួមនៅក្នុងមហាក្បួនព្យុះហយាត្រាយោធា។ តែពេលនេះ ពោលប៉ុន្មានថ្ងៃមុនការរៀបចំក្បួនព្យុះហយាត្រា សង្រ្គាមពាក្យសម្តីបាននិងកំពុងផ្ទុះឡើងយ៉ាងផុសផុលរវាងចិនដីគោក និងចិនតៃវ៉ាន់ជុំវិញបរាជ័យរបស់ជប៉ុនកាលពី ៧០ឆ្នំាមុន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
តើអ្នកណាដែលបានធ្វើឲ្យជប៉ុនចាញ់សង្រ្គាមលោកលើកទី២ កាលពី៧០ឆ្នំាមុន?។ នេះជាសំណួរមួយដែលចិនដីគោក និងចិនតៃវ៉ាន់មិនបានផ្តល់ចម្លើយដូចគ្នាទេ ឬអាចនិយាយបែបម្យ៉ាងទៀតថា មិនបានយល់ស្របគ្នាទាល់តែសោះ។ សម្រាប់ចិនដីគោកនៅទីក្រុងប៉េកំាង កម្លំាងទ័ពចិនកុម្មុយនិស្តបានដើរតួនាទីយ៉ាងសំខាន់នៅក្នុងជ័យជំនះប្រឆំាងនឹងកងទ័ពជប៉ុនក្នុងឆ្នំា ១៩៤៥។ តែសម្រាប់ចិនតៃវ៉ាន់នៅទីក្រុងតៃប៉ិកវិញបានយល់ឃើញថា គឺកងទ័ពចិនជាតិនិយមកូមីនតង់ឯណោះទេដែលជាអ្នកធ្វើឲ្យជប៉ុនចាញ់សង្រ្គាមលោកលើកទី២ ហើយបន្ទាប់មក កងទ័ពចិនជាតិនិយមកូមីនតង់ទំាងអស់ក៏បានរត់ភៀសខ្លួនទៅជ្រកកោណក្នុងទឹកដីតៃវ៉ាន់ ក្រោយពីចាញ់សង្រ្គាមស៊ីវិលក្នុងឆ្នំា ១៩៤៩។
គឺការមិនចុះសម្រុងគ្នាទាក់ទងនឹងបរាជ័យរបស់ជប៉ុនក្នុងសង្រ្គាមលោកលើកទី២ នេះហើយបានជានៅថ្ងៃសុក្រ ទី២៨ សីហា រដ្ឋាភិបាលតៃវ៉ាន់បានអំពាវនាវដល់ឥស្សរជនតៃវ៉ាន់ និងអតីតទាហានតៃវ៉ាន់ទំាងអស់កុំឲ្យចូលរួមទស្សនាក្បួនព្យុះហយាត្រារៀបចំដោយចិនដីគោកនៅទីលានធានអាន់មេនក្នុងទីក្រុងប៉េកំាងនាថ្ងៃទី៣ កញ្ញាខាងមុខ។ រីឯក្រសួងការពារជាតិតៃវ៉ាន់ថែមទំាងបានធ្វើសំណូមពរដល់អតីតទាហានជើងចាស់តៃវ៉ាន់កុំឲ្យធ្វើដំណើរទៅកាន់ចិនដីគោកក្នុងថ្ងៃរៀបចំក្បួនព្យុះហយាត្រានោះទៀតផង។
លោកឆាល ឆេន អ្នកនំាពាក្យរបស់ប្រធានាធិបតីតៃវ៉ាន់បានថ្លែងថា ប្រជាជនតៃវ៉ាន់ត្រូវតែស្តាប់ និងទទួលយកមតិរបស់មជ្ឈដ្ឋានសាធារណៈដែលមិនអាចទទួលយកសកម្មភាពរៀបចំដោយចិនដីគោកពេលនេះទេ។ អ្វីជាការកត់សម្គាល់ ប្រតិកម្មរបស់រដ្ឋាភិបាលតៃវ៉ាន់ពេលនេះបានកើតមានឡើង បន្ទាប់ពីមនុស្សជំនិតរបស់អតីតប្រធានាធិបតីតៃវ៉ាន់លាន ចាន់បានប្រាប់ឲ្យដឹងថា លោកលាន ចាន់មានគម្រោងទៅចូលរួមនៅក្នុងក្បួនព្យុះហយាត្រាក្នុងទីក្រុងប៉េកំាង និងគ្រោងជួបសន្ទនាជាមួយលោកប្រធានាធិបតីចិនស៊ី ជីនពីងនាឱកាសនោះ។
សូមជម្រាបជូនថា នៅក្នុងមហាក្បួនព្យុះហយាត្រានៅទីលានធានអាន់មេន ក្រុងប៉េកំាងនាថ្ងៃទី៣ កញ្ញាខាងមុខ រដ្ឋាភិបាលចិនដីគោកបានត្រៀមដង្ហែទាហានចំនួន ១២ ០០០នាក់ និងបញ្ចេញយន្តហោះចម្បំាងនៅលើអាកាសចំនួន ២០០គ្រឿង។ គម្រោងរៀបចំមហាក្បួនព្យុះហយាត្រាយោធានេះត្រូវបានគេមើលឃើញថា ជាការដែលចិនចង់បង្ហាញសាច់ដុំយោធាចំពោះពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ