លិចសាឡាងនៅកូរ៉េខាងត្បូង៖១ឆ្នំាក្រោយមក ទុក្ខសោក និងការឈឺចាប់កំពុងបន្តមាន
នៅថ្ងៃព្រហស្បតិ៍ ទី១៦ មេសានេះ ជាខួប ១ឆ្នំាគត់នៃការលិចសាឡាងនៅកូរ៉េខាងត្បូងកាលពីថ្ងៃទី១៦ មេសា ឆ្នំា ២០១៤។ ព្រឹត្តិការណ៍លិចសាឡាងកាលណោះបានបណ្តាលឲ្យស្លាប់មនុស្ស ៣០៤នាក់ ក្នុងនោះមានសិស្សសាលាចំនួន ២៥០នាក់។ គឺជាសោកនាដកម្មសមុទ្រដ៏ធ្ងន់ធ្ងរមួយដែលកូរ៉េខាងត្បូងមិនធ្លាប់ជួបប្រទះទេក្នុងរយៈពេល ៤០ឆ្នំាកន្លងទៅ។ នៅក្នុងខួប១ឆ្នំាថ្ងៃនេះ លោកស្រីប្រធានាធិបតីកូរ៉េខាងត្បូងប៉ាក់ គុនហេបានសន្យាថា លោកស្រីនឹងធ្វើអ្វីៗគ្រប់បែបយ៉ាងទំាងអស់ដើម្បីស្រង់សាឡាងចេញពីសមុទ្រ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
កាលពីមួយឆ្នំាមុន ពោលក្នុងថ្ងៃទី១៦ មេសា ឆ្នំា ២០១៤ សាឡាងដែលដឹកមនុស្ស ៤៧៦នាក់ ក្នុងនោះមានសិស្សសាលាមកពីសាលាតែមួយចំនួន ៣២៥នាក់បានផ្អៀងលិចក្នុងសមុទ្រ។ ព្រឹត្តិការណ៍លិចកាលណោះបានបណ្តាលឲ្យស្លាប់មនុស្សចំនួន ៣០៤នាក់ ក្នុងនោះមានសិស្សសាលាចំនួន ២៥០នាក់។ មួយឆ្នំាក្រោយមកនៅថ្ងៃនេះ ខ្មោចសាឡាងកំពុងបន្តដេកក្នុងសមុទ្រ ហើយលោកស្រីប្រធានាធិបតីប៉ាក់ គុនហេដែលបានទៅដល់ទីកន្លែងកើតហេតុបានសន្យាជាថ្មីថា លោកស្រីនឹងចាត់វិធានការគ្រប់បែបយ៉ាងទំាងអស់ដើម្បីស្រង់សាឡាងដែលមានទម្ងន់ ៦ ៨២៥តោនចេញពីសមុទ្រ។ តម្លៃនៃប្រតិបត្តិការស្រង់ខ្មោចសាឡាងចេញពីសមុទ្រត្រូវបានគេប៉ាន់ប្រមាណថា នឹងត្រូវចាយលុយអស់ជាង ១០០លានដុល្លារ។
ក៏ប៉ុន្តែ ពាក្យសន្យារបស់លោកស្រីប៉ាន់ គុនហេហាក់ដូចជាមិនអាចរំងាប់កំហឹងរបស់ក្រុមគ្រួសារជនរងគ្រោះបានទេ ព្រោះថា មួយឆ្នំាក្រោយមក គេនៅតែមិនទាន់អាចដឹងការពិតជុំវិញរឿងលិចសាឡាងនោះនៅឡើយ ហើយការស៊ើបអង្កេតទៀតសោតក៏មិនដឹងជាមានដំណើរការដល់ណាដែរ។ មួយឆ្នំាក្រោយមក ក្រុមគ្រួសារជនរងគ្រោះកំពុងបន្តរងចំាការពិត និងយុត្តិធម៌។ អ្វីដែលពួកគេបាន និងកំពុងបន្តទាមទារពេលនេះ គឺសុំឲ្យមានការស៊ើបអង្កេតឯករាជ្យមួយជុំវិញព្រឹត្តិការណ៍លិចសាឡាងនោះ។
គួររម្លឹកជូនថានៅក្រោយការលិចសាឡាងនោះភ្លាម មានហេតុផលជាច្រើនបានបញ្ជាក់ថា មកពីសាឡាងនោះដឹកហួសចំណុះ ការធ្វេសប្រហែសរបស់បុគ្គលិកបម្រើការក្នុងសាឡាង ឬក៏ថា ការជួសជុលពង្រីកសាឡាងនោះមិនគោរពតាមក្បួនខ្នាតត្រឹមត្រូវដែលបណ្តាលឲ្យសាឡាងនោះបាត់លំនឹង។ បន្ទាប់មក ក៏មានលេចចេញនូវព័ត៌មានទាក់ទងនឹងវិធានការសុវត្ថិភាព និងសន្តិសុខរបស់សាឡាងដែលរដ្ឋអំណាចបានព្រងើយកន្តើយព្រោះតែទទួលសំណូកសូកប៉ាន់។ បន្ទាប់មកទៀត គឺទាក់ទងនឹងភាពយឺតយ៉ាវនៅក្នុងប្រតិបត្តិការជួយសង្រ្គោះ។
នៅថ្ងៃនេះ មានប្រជាជនកូរ៉េរាប់ពាន់នាក់បានទៅចូលរួមគោរពវិញ្ញាណក្ខន្ធជនរងគ្រោះទំាង ៣០៤នាក់ដែលបានបាត់បង់ជីវិតនៅក្នុងព្រឹត្តិការណ៍លិចសាឡាងកាលពីថ្ងៃទី១៦ មេសា ឆ្នំា ២០១៤។ មួយឆ្នំាក្រោយមក មានសាសពតែ ២៩៥នាក់ប៉ុណ្ណោះដែលក្រុមអ្នកជួយសង្រ្គោះស្រង់បានក្នុងចំណោមសាកសពទំាង ៣០៤នាក់ ចំណែកសាកសពនៅសល់ចំនួន ៩នាក់ហាក់ដូចជាគ្មានថ្ងៃនឹងរកឃើញទេ ព្រោះប្រតិបត្តិការស្វែងរកបានបិទបញ្ចប់តំាងពីខែវិច្ឆិកាមកម្ល៉េះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ