ផ្តន្ទាទោសលោកស្រីហ្កាវ យូ ជាសញ្ញាថ្មីដែលបញ្ជាក់ពីយុទ្ធនាការព្រមាន និងបំបិទមាត់ក្រុមប្រឆំាងរបស់រដ្ឋអំណាចចិន
នៅថ្ងៃសុក្រ ទី១៧ មេសានេះ អ្នកកាសែតចិនដ៏ល្បីឈ្មោះម្នាក់ គឺលោកស្រីហ្កាវ យូ (Gao Yu) ត្រូវបានតុលាការចិនកាត់ទោសឲ្យជាប់ក្នុងពន្ធធនាគារចំនួន ៧ឆ្នំាពីបទបានទម្លាយព័ត៌មានសម្ងាត់របស់គណបក្សកុម្មុយនិស្តទៅកាន់បរទេស។ មានអាយុ ៧១ឆ្នំា លោកស្រីហ្កាវ យូបានច្រានចោលរាល់ការចោទប្រកាន់របស់តុលាការ និងថា លោកស្រីជាមនុស្សគ្មានទោសទេ។ ចំណែកមេធាវីរបស់លោកស្រីបានចាត់ទុកដំណើរការកាត់ទោសកូនក្តីរបស់ខ្លួនថា ជានិមិត្តរូបដែលបញ្ជាក់ពីការដែលរដ្ឋអំណាចបន្តយុទ្ធនាការរឹតបន្តឹង និងបំបិទមាត់ក្រុមប្រឆំាងដោយយកតុលាការធ្វើជាឧបករណ៍។
ចុះផ្សាយនៅថ្ងៃ៖ កែប្រែថ្ងៃទី៖
បច្ចុប្បន្នមានអាយុ ៧១ឆ្នំា លោកស្រីហា្កវ យូ មានអាជីពដើមជាអ្នកកាសែត និងដែលលោកស្រីបានបម្រើការឲ្យកាសែតផ្លូវការរបស់រដ្ឋាភិបាលអស់រយៈពេលជាច្រើនឆ្នំា។ ប៉ុន្តែនៅក្នុងឆ្នំា ១៩៨៩ ពោលចំពេលដែលមានចលនាបះបោររបស់និស្សិតចិនដើម្បីលទ្ធិប្រជាធិបតេយ្យនៅទីលានជៀនអាន់ម៉េនក្នុងទីក្រុងប៉េកំាង លោកស្រីហ្កាវ យូបានចេញមុខគំាទ្រចលនាបះបោររបស់និស្សិត។ គឺជាទង្វើដែលបានធ្វើឲ្យលោកស្រីហ្កាវ យូស្គាល់រសជាតិពន្ធធនាគារជាលើកដំបូង។ នៅក្រោយចេញពីគុក លោកស្រីហ្កាវ យូក៏បានបន្តអាជីពជាអ្នកកាសែត តែធ្វើការឲ្យកាសែតនៅក្រៅទឹកដីចិន។
ក្នុងឆ្នំា ១៩៩៤ លោកស្រីហ្កាវ យូត្រូវបានតុលាការចិនកាត់ទោសដាក់ក្នុងពន្ធធនាគារចំនួន ៦ឆ្នំាពីបទបានទម្លាយព័ត៌មានសម្ងាត់របស់រដ្ឋ។ តែដោយសារបញ្ហាសុខភាព តុលាការក៏បានដោះលែងលោកស្រីឲ្យមានសេរីភាពវិញក្នុងឆ្នំា ១៩៩៩។ តំាងពីពេលនោះ ឈ្មោះលោកស្រីត្រូវបានគេនិយាយច្រើន និងចាប់អារម្មណ៍ខ្លំាងក្នុងនាមជាអ្នកដែលហ៊ានចេញមុខរិះគន់ប្រឆំាងរដ្ឋាភិបាលចិន។ អ៊ីចឹងហើយបានជាក្នុងឆ្នំា ១៩៩៧ លោកស្រីហ្កាវ យូទទួលបានពានរង្វាន់ពិភពលោកស្តីពីសិទ្ធិសេរីភាពសារព័ត៌មានពីអង្គការ Unesco។ ក្រៅពីពានរង្វាន់សិទ្ធិសេរីភាពសារព័ត៌មានពិភពលោក លោកស្រីហ្កាវ យូក៏ទទួលបានពានរង្វាន់អន្តរជាតិផ្សេងទៀតជាច្រើនដែរ។
ចិនបន្តដាក់គំនាប និងបំបិទមាត់ក្រុមប្រឆំាងដើម្បីរក្សាអំណាចបក្ស
លោកស្រីហ្កាវ យូត្រូវបានប៉ូលិសចាប់ខ្លួនជាថ្មីកាលពីដំណាច់ខែមេសា ឆ្នំា ២០១៤ ពោលប៉ុន្មានថ្ងៃមុនថ្ងៃខួបគម្រប់ ២៥ឆ្នំានៃចលនាបះបោររបស់និស្សិតចិននៅទីលានជៀនអាន់ម៉េនកាលពីឆ្នំា ១៩៨៩។ លោកស្រីត្រូវបានគេចោទជាថ្មីពីបទបានទម្លាយ និងបញ្ជូនឯកសារសម្ងាត់របស់គណបក្សកុម្មុយនិស្តទៅបរទេស។ នៅថ្ងៃទី៨ ឧសភា ឆ្នំា ២០១៤ លោកស្រីបានឆ្លើយសារភាពពីទង្វើរបស់ខ្លួនតាមទូរទស្សន៍។ បន្ទាប់មកក្នុងខែវិច្ឆិកា ឆ្នំា ២០១៤ ដដែល តុលាការក៏បានបើកសវនាការកាត់ទោសលោកស្រីជាលក្ខណៈសម្ងាត់ ពោលមិនបានអនុញ្ញាតឲ្យអ្នកកាសែតបរទេសចូលស្តាប់ទេ។ មួយវិញទៀត គេក៏មិនអាចដឹងថា តើឯកសារសម្ងាត់របស់គណបក្សកុម្មុយនិស្តចិននោះមានអ្វីខ្លះ និងថា តើលោកស្រីហ្កាវ យូបានបញ្ជូនទៅឲ្យអ្នកណាខ្លះដែរ។
អង្គការការពារសិទ្ធិមនុស្ស Human Rights Watch បានឲ្យដឹងថា តុលាការបានចោទលោកស្រីពីបទបានបញ្ជូនឯកសារសម្ងាត់ទៅឲ្យគេហទំព័រមួយដែលមានមូលដ្ឋាននៅអាមេរិក។ ចំណែកអង្គការអ្នកយកព័ត៌មានគ្មានព្រំដែនបានបញ្ជាក់ថា ឯកសារសម្ងាត់នោះ គឺជាកំណត់ត្រាផ្ទៃក្នុងរបស់បក្សកុម្មុយនិស្តដែលគេហៅថាឯកសារទី៩។ យ៉ាងណាក៏ដោយ លោកស្រីហ្កាវ យូបានច្រានការចោទប្រកាន់ទំាងអស់របស់តុលាការ និងថា ការដែលលោកស្រីបានឆ្លើយសារភាព ក៏ដោយសារមានគេចាប់បង្ខំឲ្យលោកស្រីឆ្លើយ ព្រោះបើមិនឆ្លើយទេ ប៉ូលិសនឹងចាប់ឃុំកូនប្រុសរបស់លោកស្រីម្នាក់ទៀត។
ប្រតិកម្មប្រឆំាងនឹងការកាត់ទោសលោកស្រីហ្កាវ យូមានច្រើន ពិសេសពីក្រុមអង្គការការពារសិទ្ធិមនុស្សដែលគេចាត់ទុកការកាត់ទោសលោកស្រីហ្កាវ យូពេលនេះថា ជាសញ្ញាថ្មីមួយទៀតដែលបញ្ជាក់ពីយុទ្ធនាការព្រមាន និងបំបិទមាត់ក្រុមប្រឆំាងពីរដ្ឋាភិបាលចិនក្នុងបំណងរក្សាអំណាចរបស់គណបក្សកុម្មុនិស្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ