កូរ៉េខាងជើងបាញ់គ្រាប់មីស៊ីល ធ្វើឲ្យផ្អើលសហគមន៍អន្តរជាតិសាជាថ្មី
មួយខែមិនទាន់រំលងផុតស្រួលបួលផង ដែលកូរ៉េខាងជើងបានធ្វើការសាកល្បងគ្រាប់បែកនុយក្លេអ៊ែរ នៅថ្ងៃអាទិត្យនេះ របបផ្តាច់ការនេះ បានធ្វើការបាញ់បង្ហោះគ្រាប់មីស៊ីលមួយគ្រាប់ទៀត។ តាមការបញ្ជាក់អះអាងពីរបបព្យុងយ៉ាង នេះជាការបាញ់មីស៊ីល ដើម្បីបង្ហោះផ្កាយរណបទៅលើអវកាស ក៏ប៉ុន្តែអ្វីដែលសហគមន៍អន្តរជាតិសង្ស័យនោះ តាមពិតវាគឺជាការបាញ់សាកល្បងគ្រាប់មីស៊ីលចំងាយឆ្ងាយ ប្រភេទបាលីស្ទីកទៅវិញទេ។ ប្រតិកម្មថ្កោលទោស បានធ្លាក់ចេញជាបន្តបន្ទាប់ ពីសំណាក់ប្រទេសជិតខាង និងប្រទេសមហាអំណាច។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៧:១៤
ប្រតិកម្មអន្តរជាតិ និងទណ្ឌកម្ម៖
ដោយមិនបង្អង់យូរ សហគមន៍អន្តរជាតិ បានធ្វើការថ្កោលទោសជាបន្តបន្ទាប់ ទៅលើរបបផ្តាច់ការគីម ជុងអ៊ុន។ គ្រាន់តែមីស៊ីលបានបាញ់បង្ហោះភ្លាម ៣០នាទីក្រោយមកលោកស៊ិន ហ្សូអាបេ នាយករដ្ឋមន្ត្រីជប៉ុនបានមានប្រតិកម្មថ្កោលទោសមុនគេ។ លោកមានប្រសាសន៍ថា នេះគឺជាទង្វើដែលមិនអាចទទួលយកបាន ហើយវាជាទង្វើដែលរំលោភទៅលើសេចក្តីសម្រេចចិត្តរបស់អង្គការសហប្រជាជាតិ។ ដូចគ្នាដែរ លោក ចន ឃែរី រដ្ឋមន្ត្រីការបរទេសអាមេរិក បានបញ្ជាក់ថា ការបាញ់គ្រាប់មីស៊ីលបាលីស្ទីករបស់កូរ៉េខាងជើងនៅថ្ងៃនេះ គឺជាការបំពានទៅលើសេចក្តីសម្រេចចិត្តរបស់អង្គការសហប្រជាជាតិទាំងស្រុង។ លោកស្រី ប៉ាក់ គិនហឺ ប្រធានាធិបតីកូរ៉េខាងត្បូង បានអំពាវនាវ ថាត្រូវតែដាក់ទណ្ឌកម្មរបបព្យុងយ៉ាង ឲ្យចាស់ដៃ។
ចំនែកខាងអឺរ៉ុបវិញ បារាំងនិងអង់គ្លេស ក៏បានថ្កោលទោសកូរ៉េខាងជើងយ៉ាងធ្ងន់ធ្ងរដែរ ដោយបានសំណូមពរឲ្យសហគមន៍អន្តរជាតិ ចាត់វិធានការដាក់ពិន័យកូរ៉េខាងជើងជាបន្ទាន់ ព្រោះនេះជាទង្វើផ្គើនម្តងហើយ ម្តងទៀតរបស់កូរ៉េខាងជើង។ ដោយឡែក រដ្ឋមន្ត្រីការបរទេសចិន បានថ្លែងពាក្យថា គួរឲ្យសោកស្តាយណាស់ ដែលកូរ៉េខាងជើងសម្រេចធ្វើដូច្នេះ។ ចិន អំពាវនាវឲ្យគ្រប់ភាគីទាំងអស់រក្សាការស្ងៀមស្ងាត់ កុំយកកំហឹងទល់កំហល់ ហើយងៀកមកពិភាក្សាគ្នារកវិធីដោះស្រាយ និងបញ្ចុះបញ្ចូលកូរ៉េខាងជើង។
ក្រុមប្រឹក្សាសន្តិសុខ និងធ្វើការប្រជុំបន្ទាន់មួយ នៅល្ងាចថ្ងៃអាទិត្យនេះតែម្តង នៅទីក្រុងញូយ៉ក ដើម្បីដាក់វិធានការឲ្យបានឆាប់។ ទាំងជប៉ុន កូរ៉េខាងត្បូង បារាំង និងអាមេរិក ម្នាក់ៗប្តេជ្ញាថាត្រូវតែដាក់ទណ្ឌកម្មឲ្យបានធ្ងន់។
ជាការបាញ់សាកល្បង ដោយជោគជ័យ រឺមិនជោគជ័យ?
នេះជាចំណុចដែលគេកំពុងតែមានមន្ទិលសង្ស័យ។ កូរ៉េខាងជើងអះអាងថា ការបាញ់កាំជ្រួចមីស៊ីលនេះ ជាការបាញ់យានធម្មតាដើម្បីនាំយកផ្កាយរណបទៅដាក់នៅក្នុងលំហអវកាស នៅខ្សែអកប៊ីត របស់ផែនដី។ ក៏ប៉ុន្តែអ្វីដែលអ្នកជំនាញអន្តរជាតិសង្ស័យគេថា តាមពិតវាគឺជាការបាញ់សាកល្បងគ្រាប់មីស៊ីលចំងាយឆ្ងាយ ប្រភេទបាលីស្ទីក។ គ្រាប់មីស៊ីលដែលកូរ៉េខាងជើងបាញ់នៅព្រឹកនេះ គឺអាចរត់បានចំងាយ១ម៉ឺនគីឡូម៉ែត្រឯណោះ។ រាល់ការសាកល្បងអាវុធនុយក្លេអ៊ែរ រឺក៏កំជ្រួចមីស៊ីលបាលីស្ទីកនេះ ត្រូវបានអង្គការសហប្រជាជាតិធ្វើការហាមឃាត់ មិនឲ្យកូរ៉េខាងជើងធ្វើជាដាច់ខាត។
មកត្រឹមពេលនេះ គេនៅមិនទាន់ច្បាស់ថាការបាញ់សាកល្បងមីស៊ីលបាលីស្ទីកនេះ បានជោគជ័យ រឺក៏បរាជ័យទេ។ តាមការរាយការណ៍ តួខ្លួនមីស៊ីលបានធ្លាក់នៅក្នុងសមុទ្រ ហើយផ្នែកទីពីរ បានធ្លាក់នៅលើកោះដាច់ស្រយ៉ាលមួយរបស់កូរ៉េខាងត្បូង។ អ្វីដែលគេមិនទាន់ច្បាស់គឺថា ក្បាលគ្រាប់ដែលតាមការអះអាងរបស់របបព្យុងយ៉ាងគឺជាផ្កាយរណបនោះ បានឡើងចូលទៅដល់ខ្សែអកប៊ីត មែនរឺក៏អត់ទេ។ ទូរទស្សន៍រដ្ឋកូរ៉េខាងជើង បានផ្សាយថាយាន Kwangmyong ទី៤ បាននាំយកផ្កាយរណបទៅលើអវកាស បានដោយជោគជ័យ។ ចំណែក ខាងភ្នាក់ងារអវកាសអាមេរិក បានផ្តល់ដំណឹងថា គេសង្កេតឃើញមានយានមួយហោះចូលក្នុងខ្សែអកប៊ីតមែន ក៏ប៉ុន្តែគេមិនប្រាកដទេថា យាននោះបានព្រលែងផ្កាយរណបឲ្យស្ថិតក្នុងខ្សែអកប៊ីត បានសម្រេចមែនរឺក៏អត់។
យកផ្កាយរណបទៅដាក់លើខ្សែអកប៊ីត មិនមែនជារឿងងាយ៖
យ៉ាងណាក៏ដោយ បើតាមការវិភាគយ៉ាងល្អិតល្អន់ ពីអ្នកជំនាញ គេពិបាកនឹងជឿណាស់ថា កូរ៉េខាងជើងអាចធ្វើវាដោយបានសម្រេច។ ទីមួយ យើងអាចទទួលស្គាល់ថា កូរ៉េខាងជើងបានបាញ់សាកល្បងគ្រាប់មីស៊ីលក្នុងចំងាយឆ្ងាយ បានជោគជ័យមែនចុះ ក៏ប៉ុន្តែដំណាក់កាលចុងក្រោយ ដែលយាននេះត្រូវហោះចូលទៅដល់ក្នុងគន្លងខ្សែអកប៊ីត របស់ផែនដី គឺជាការលំបាកណាស់ ហើយបើតាមការស្មាន បច្ចេកវិទ្យារបស់កូរ៉េខាងជើងបច្ចុប្បន្នក្នុងវិស័យនេះ គឺនៅមានកំរិតទាប មិនទាន់អាចធ្វើបានទេ។
ប៉ុន្តែអ្វីដែលគេព្រួយបារម្ភ គឺគ្រាប់មីស៊ីលនេះ អាចជាគ្រាប់មីស៊ីលបាលីស្ទីកចំងាយឆ្ងាយ ដែលកូរ៉េខាងជើងអាចកែច្នៃវា ដើម្បីបំពាក់ក្បាលគ្រាប់បែកនុយក្លែអ៊ែរ ហើយបន្ទាប់មកបាញ់ឆ្លងទ្វីប អាចទៅដល់ទឹកដីអាមេរិកនិងអឺរ៉ុប។ ត្រង់នេះហើយ ដែលជាបញ្ហា។
កូរ៉េខាងត្បូងនិងអាមេរិក ចង់ដាក់តាំងប្រព័ន្ធចាប់គ្រាប់មីស៊ីល នៅកូរ៉េខាងត្បូង៖
តាមការផ្តល់ដំណឹង អាមេរិក និងកូរ៉េខាងត្បូង នឹងចាប់ផ្តើមធ្វើការពិភាក្សាគ្នា ដើម្បីដាក់តាំងប្រព័ន្ធបំផ្លាញគ្រាប់មីស៊ីលបែបទំនើប ឈ្មោះ THAAD (Terminal High Altitude Area Defense) ដែលជាបច្ចេកវិទ្យារបស់អាមេរិក នៅលើដីកូរ៉េខាងត្បូង។ ប្រព័ន្ធនេះ និងអាចចាប់គ្រប់ គ្រាប់មីស៊ីល ទាំងអស់ដែលត្រូវបាញ់ចេញពីក្នុងតំបន់។ ការចរចារបៀបនេះ ធ្លាប់បរាជ័យច្រើនដងមកហើយដោយសារតែចិន បានបដិសេធដាច់អហង្ការ។ ចិនមិនចង់ឃើញប្រព័ន្ធចាប់គ្រាប់មីស៊ីលរបស់អាមេរិក មកនៅក្បែរដីខ្លួនទេ ព្រោះថាខ្លួនក៏ប្រហែលជាមានគ្រាប់មីស៊ីលដែរ។
កាលពីដើមខែមករា កូរ៉េខាងជើងបានបាញ់សាកល្បងគ្រាប់នុយក្លេអ៊ែរ ប្រភេទអ៊ីដ្រូហ្សែន។ មហាអំណាចនៅមិនទាន់ត្រូវរូវគ្នាដាក់ទណ្ឌកម្មផង ឥឡូវថ្ងៃនេះ លោកបងគីម ជុងអ៊ុន បាញ់សាកគ្រាប់មីស៊ីលមួយថែមទៀត។ ការយឺតយ៉ាវ រឺក៏ភាពអប្រសិទ្ធិភាពនៃទណ្ឌកម្មទាំងនេះ គឺមានមូលហេតុមួយធំ គឺបណ្តាលមកពី គោលជំហររបស់ចិន។ ចិនមាននយោបាយខោកក្បាលអង្អែលខ្នង។ ចិនថ្កោលទោសកូរ៉េខាងជើងនៅខាងមុខមែន ក៏ប៉ុន្តែចិនមិនចង់ឲ្យរបបព្យុងយ៉ាងរលំរលាយទេ។ ហេតុអី ព្រោះថាបើគេដាក់ទណ្ឌកម្មខ្លាំងលើកូរ៉េខាងជើង របបនេះអាចរលំ ហើយមិនយូរមិនឆាប់ កូរ៉េទាំងពីរ និងរួបរួមគ្នាវិញ។ អញ្ចឹងមានន័យថា កូរ៉េពីរនាក់បងប្អូនក្លាយជាសម្ព័ន្ធមិត្តរបស់អាមេរិក ដែលការនេះ គឺវាធ្វើឲ្យចិនបាត់បង់អំណាចឥទ្ធិពល នៅក្នុងតំបន់អាស៊ីប៉ាស៊ីហ្វិក។
គីម ជុងអ៊ុន សម្ញែងអាវុធ ដើម្បីរក្សាអំណាច៖
ក្រៅពីចង់បញ្ចេញសាច់ដុំប្រាប់ពិភពលោក កូរ៉េខាងជើងធ្វើការបាញ់សាកគ្រាប់មីស៊ីល និងគ្រាប់នុយក្លេអ៊ែរ ផ្ទួនៗគ្នាបែបនេះ ក៏មានមូលហេតុផ្ទៃក្នុងដែរ។ ទីមួយទណ្ឌកម្មអន្តរជាតិលើការបាញ់គ្រាប់នុយក្លេអ៊ែល នៅមិនទាន់ដាក់ ដូច្នេះបើបាញ់ថែមមួយទៀត គឺចំណេញទណ្ឌកម្ម។ មានន័យថា បាញ់សាកអាវុធពីរដង តែត្រូវគេដាក់ទណ្ឌកម្មតែម្តងទេ។ មូលហេតុផ្ទៃក្នុងមួយទៀត គឺថាគីម ជុងអ៊ុន ចង់សម្តែងថាខ្លួនជាមេដឹកនាំកំពូលរបស់កូរ៉េខាងជើង ជាទាយាទស្របច្បាប់តែមួយគត់របស់គីម អ៊ីលស៊ុង និងគីម ជុងអ៊ីល។
គួរបញ្ជាក់ថា នៅខែឧសភាខាងមុខនេះ នឹងមានបើកមហាសន្និបាទដ៏ធំមួយ របស់គណបក្សកុម្មុយនីស្តកូរ៉េខាងជើង ដែលមហាសន្និបាទរបៀបនេះ ខានធ្វើយូរហើយតាំងពីឆ្នាំ៨០មក។ នៅក្នុងផ្ទៃក្នុងបក្សកុម្មុយនីស្តិកូរ៉េខាងជើង មិនអត់ទេ អ្នកដែលចង់ទម្លាក់មេដឹកនាំផ្តាច់ការត្រកូលគីមនេះ ព្រោះថាកន្លងមកយើងឃើញហើយថា មានអ្នកត្រូវគេយកទៅកសាង បាត់ខ្លួនម្តងមួយៗ។ ដូច្នេះការសម្ញែងសមត្ថភាពយោធារបស់គីម ជុងអ៊ុន គឺជាអាវុធនយោបាយក្នុងស្រុក ដើម្បីប្រមូលមនុស្សឲ្យដើរតាមខ្លួន ហើយរក្សាអំណាចតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ