ជប៉ុន៖ លោកស៊ិនហ្សូ អាបេ ជាប់ឆ្នោតជាប្រធានបក្សម្តងទៀត
លោកស៊ិនហ្សូ អាបេ នាយករដ្ឋមន្ត្រីជប៉ុន ទើបតែត្រូវបានសមាជិកគណបក្សរបស់លោក បោះឆ្នោតតែងតាំង ឲ្យធ្វើជាប្រធានដឹកនាំគណបក្សនេះតទៅទៀត។ ការជាប់ឆ្នោតជាថ្មីនេះ មានន័យថា លោកស៊ិនហ្សូ អាបេ អាចនឹងស្ថិតនៅអង្គុយកៅអីនាយករដ្ឋមន្ត្រីជប៉ុន ជាបន្តទៀត យ៉ាងហោចណាស់ ដល់ឆ្នាំ២០២១ ហើយក៏មានន័យថា លោកនឹងក្លាយជានាយករដ្ឋមន្ត្រីជប៉ុន ដែលកាន់តំណែងនេះបានយូរជាងគេ ក្នុងប្រវត្តិសាស្ត្រជប៉ុន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
នៅថ្ងៃព្រហស្បតិ៍ ទី២០កញ្ញានេះ គណបក្ស សេរីប្រជាធិបតេយ្យ ដែលជាគណបក្សអភិរក្សនិយម របស់ជប៉ុន បានសម្រេចបោះឆ្នោត ជ្រើលរើសលោក ស៊ិនហ្សូ អាបេ ឲ្យធ្វើជាប្រធានដឹកនាំបក្សបន្តទៀត។ លោកអាបេ បានទទួលសម្លេងឆ្នោត ៥៥៣សម្លេង ក្នុងចំណោមសម្លេងឆ្នោតទាំងអស់ ៨០៧សម្លេង។
ក្រោយទទួលលទ្ធផលឆ្នោត លោកអាបេ បានថ្លែងអរគុណ ចំពោះការផ្តល់ទំនុកចិត្ត ហើយបានប្តេជ្ញាថានឹងសម្រេចគោលដៅគូសវា និងការសន្យានានារបស់រដ្ឋាភិបាល។ ក្នុងចំណោមការប្តេជ្ញាទាំងនោះ លោកអាបេ បានសង្កត់ធ្ងន់លើចំណុចមួយ គឺការធ្វើកំណែទម្រងរដ្ឋធម្មនុញ្ញជប៉ុន។ ជាការធ្វើកំណែទម្រង់ ដែលលោកលើកឡើងថា ចាំបាច់ ដើម្បីពង្រឹងសន្តិសុខ និងកិត្តិយសជប៉ុន។ កម្មវត្ថុនៃកំណែទម្រង់ ដែលលោកអាបេចង់បាននោះ គឺធ្វើឲ្យជប៉ុន អាចវិលត្រលប់ទៅមានកងទ័ពជាតិឡើងវិញ។
យ៉ាងណាក៏ដោយ លោកស៊ិនហ្សូ អាបេ ដែលបានចូលកាន់តំណែង ជានាយករដ្ឋមន្ត្រីជប៉ុន តាំងតែពីឆ្នាំ២០១២មក បានទទួលស្គាល់ពីការងារ ដែលត្រូវតែប្រឹងប្រែង សម្រាប់២-៣ឆ្នាំខាងមុខ។ លោកអាបេ បានលើកឡើង ថារដ្ឋាភិបាលលោក នឹងប្រឹងប្រែង ធ្វើកំណែទម្រង់ហេដ្ឋារចនាសម្ព័ន្ធសាធារណៈឲ្យប្រសើរ ដើម្បីទប់ទល់ជាមួយគ្រោះមហន្តរាយធម្មជាតិ ដែលកាន់តែញឹកញាប់ និងធ្ងន់ធ្ងរ។ ឆ្នាំ២០១៩ ជប៉ុន និងត្រូវរៀបចំជំនួបកំពូល G20 ដែលនេះគឺជាលើកទីមួយសម្រាប់ជប៉ុន។ ហើយឆ្នាំបន្ទាប់ទៀត ជប៉ុន ត្រូវធ្វើជាម្ចាស់ផ្ទះ រៀបចំកីឡាអូឡាំពិក និងកីឡាបារ៉ាឡាំពិក។
គួរកត់សំគាល់ថា ចំពោះមុខនឹងជោគជ័យ ក្នុងការបោះឆ្នោតក្នុងបក្សនេះ លោកអាបេ មិនមែនមានសុទ្ធតែអ្នកគាំទ្រស្រលាញ់ទាំងអស់នោះទេ។ លោក Shinichi Nishikawa សាស្ត្រាចារ្យវិទ្យាសាស្ត្រនយោបាយ នៅសកលវិទ្យាល័យ Meiji ក្រុងតូក្យូ បានលើកឡើងថា គណបក្សសេរីប្រជាធិបតេយ្យ បច្ចុប្បន្នមានការបែងចែកជាបក្សពួកតូចៗ។ អ្នកនយោបាយតូចតាចមួយចំនួនធំ មិនពេញចិត្តនឹងលោកអាបេទេ តែត្រូវបង្ខំចិត្តគោរពទៅតាមការសម្រេច របស់មេក្រុមរៀងៗខ្លួន ដែលពួកគេសុទ្ធតែជាមិត្តភ័ក្តស្និទនឹងលោកអាបេ។
ផ្ទុយទៅវិញ ក្នុងចំណោមសម្លេងឆ្នោតទាំង៤០៥សម្លេង ដែលតំណាងឲ្យសកម្មជននយោបាយតូចតាច គឺលោកអាបេ អាចគៀងគបានប្រមាណតែ២២៤សម្លេងប៉ុណ្ណោះ ចំណែកគូប្រជែងលោក គឺលោក Shigeru Ishiba បានចំនួន១៨១សម្លេង។ នេះមានន័យថា សម្រាប់សកម្មជនបក្សប្រមាណជា១លាននាក់ទូទាំងប្រទេស គឺលោក Shigeru Ishiba ជាមនុស្សដ៏សំខាន់ម្នាក់ ក្នុងបក្ស និងក្នុងឆាកនយោបាយជប៉ុន។ ទន្ទឹមគ្នានេះ ប្រជាប្រិយភាពរបស់លោកអាបេ ក្នុងចំណោមប្រជាជនជប៉ុនទូទៅ ក៏បានធ្លាក់ចុះដែរ ដោយសារតែមានរឿងអាស្រូវជាច្រើន បានលេចឮ ថាលោកស៊ុនហ្សូ អាបេ គឺជាមនុស្សបក្សពួកនិយម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ