ហុងកុង៖ បាតុកម្មប្រឆាំងនឹងជនជាតិចិន ដែលរកស៊ីរត់ពន្ធទំនិញឆ្លងដែន
កាលពីថ្ងៃសៅរ៍ទី១៣កក្កដា ប្រជាជនហុងកុង បានធ្វើបាតុកម្ម ក្នុងសង្កាត់ភាគខាងជើង ជាប់នឹងព្រំដែនជាមួយចិនដីគោក ដើម្បីប្រឆាំងនឹងក្រុមជនជាតិចិន ដែលមករស់នៅ និងរកស៊ីនាំទំនិញគេចពន្ធឆ្លងដែន។ នគរបាលចិន បានប្រើកម្លាំងបំបែកហ្វូងបាតុករ បង្ករឲ្យមានការប្រឈមមុខដាក់គ្នាដោយហិង្សា។ គួរកត់សម្គាល់ថា បាតុកម្មនេះ គឺជាទំរងថ្មីមួយទៀត នៃការតវ៉ា របស់ប្រជាជនហុងកុង ដែលកើតទុក្ខមិនសុខចិត្តនិងរដ្ឋអំណាចចិនដីគោក ក៏ដូចជាជនជាតិចិន ដែលឆក់ឱកាសកេងចំណេញ តាមរយៈការបើកផ្លូវទំនាក់ទំនង រវាងចិននិងហុងកុង។
ចុះផ្សាយនៅថ្ងៃ៖ កែប្រែថ្ងៃទី៖
បាតុកម្មរបស់ប្រជាជនហុងកុង បានធ្វើឡើង នៅសង្កាត់ Sheung Shui ភាគខាងជើងហុងកុង ជាប់នឹងព្រំដែនចិនដីគោក។ កម្មវត្ថុរបស់បាតុករ ដែលភាគច្រើនសុទ្ធតែជាយុវជន គឺប្រឆាំងតវ៉ា ចំពោះការមកតាំងទីស្នាក់នៅយ៉ាងគំហុក របស់ជនជាតិចិនដែលរកស៊ីគេចពន្ធ នាំទំនិញឆ្លងដែនដោយខុសច្បាប់។ បាតុកម្មនៅថ្ងៃសៅរ៍ ទី១៣កក្កដានេះ បានឈានទៅដល់ការប្រឈមមុខដាក់គ្នា រវាងបាតុករ និងសមត្ថកិច្ច។ នគរបាលបានប្រើបំពង់ឧស្ម័នបង្ហូរទឹកភ្នែក ដំបងឆក់ ដើម្បីវាយបំបែកហ្វូងបាតុករ។
សូមរំលឹកថា បន្ទាប់ពីហុងកុង ត្រូវបានទទួលស្គាល់ជាតំបន់ស្វ័យត្នរបស់ចិន សង្កាត់Sheung Shui ដែលស្ថិតនៅជាប់ព្រំដែនចិនដីគោក បានក្លាយទៅច្រកចេញចូល និងស្នាក់នៅរបស់ជនជាតិចិន ដែលរកស៊ីនាំទំនិញគេចពន្ធ។ បន្តិចម្តងៗ សង្កាត់នេះ បានក្លាយទៅជាភូមិរបស់ក្រុមអ្នកជួញទំនិញគេចពន្ធ នាំទំនិញគុណភាពល្អៗពីហុងកុង ឆ្លងទៅចិនដីគោកយ៉ាងព្រោងព្រាត។ ប្រការនេះ បានធ្វើឲ្យមានការតវ៉ា ពីសំណាក់ប្រជាជនហុងកុង ដែលលើកឡើងថា តម្រូវការទំនិញរបស់ចិនដីគោក មានច្រើនហួសហេតុពេក ដែលធ្វើឲ្យពុំមានទំនិញលក់គ្រប់គ្រាន់នៅហុងកុង ហើយជាងនេះ ការមកដល់យ៉ាងគំហុក របស់ពួកចិនរកស៊ីគេចពន្ធទាំងនោះ បានធ្វើឲ្យថ្លៃឈ្នួលផ្ទះឡើងថ្លៃ ព្រមទាំងអំពើហិង្សាផ្សេងៗ។
គួតកត់សំគាល់ថា នេះគឺជាការតវ៉ាថ្មីមួយទៀត របស់ប្រជាជនហុងកុង ដែលកាន់តែមិនពេញចិត្ត ទៅនឹងវត្តមានរបស់ជនជាតិចិនដីគោក នៅហុងកុង។ ការតវ៉ានេះ គឺវាផ្សារភ្ជាប់ទៅនឹងការតវ៉ាប្រឆាំងនឹង នយោបាយក្តោបក្តាប់អំណាច បំបិទសិទ្ធិសេរីភាពពីសំណាក់រដ្ឋអំណាចចិនប៉េកាំង មកលើជីវភាពរបស់ប្រជាជនហុងកុង។ ថ្វីត្បិតតែលោកស្រី ការី ឡាំ ប្រមុខរដ្ឋបាលក្រុងហុងកុង បានប្រកាសថា គម្រោងច្បាប់ធ្វើបត្យាប័ន មានស្លាប់ទៅវិញទៅហើយក្តី តែបាតុករហុងកុង នៅតែបន្តការតវ៉ា ទាមទារឲ្យលោកស្រីចុះចេញពីតំណែង។
យ៉ាងណាមិញ គេសង្កេតឃើញ មានទំរង់តវ៉ាថ្មីមួយទៀតរបស់ប្រជាជនហុងកុង គឺការអំពាវនាវតៗគ្នា ឲ្យទៅដក់សាច់ប្រាក់ ចេញពីគណនីធនាគារចិន។ សកម្មជនហុងកុង អះអាងថា ទំរង់តវ៉ាថ្មីនេះ គ្មានឥទ្ធិពលធំដំ ហើយក៏គ្មានបំណង ធ្វើឲ្យធនាគារចិនរលំឡើយ។ តែការតវ៉ារបៀបនេះ គឺជានិម្មិតរូប បង្ហាញថាប្រជាជនហុងកុង មិនចុះចាញ់ មិនញញើតនឹងកណ្តាប់ដៃនយោបាយ ឬហិរញ្ញវត្ថុរបស់ចិនប៉េកាំងទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ