ប៉ូលិសបារាំងតាមប្រមាញ់ឃាតករសម្លាប់គ្រូ និងសិស្សជ្វីវ នៅToulouse
នៅថ្ងៃនេះ គ្រប់សាលារៀននៅទូទាំងប្រទេសបារាំង ត្រូវរក្សាភាពស្ងៀមស្ងាត់រយៈពេលមួយនាទីដើម្បីចូលរួមរំលែកទុក្ខជាមួយគ្រួសារសពជនជាតិជ្វីវ ដែលត្រូវបានឃាតករបាញ់សម្លាប់ កាលពីព្រឹកថ្ងៃចន្ទ ទី ១៩ មីនា នៅខេត្ត Toulouse ដែលស្ថិតនៅភាគខាងជើងប្រទេសបារាំង។ ព្រឹត្តិការណ៍បាញ់សម្លាប់គ្រូ និងសិស្សជ្វីវនៅ ក្នុងប្រទេសបារាំងបានបង្កឲ្យមានប្រតិកម្មមិនសុខចិត្ត យ៉ាងភ្លូកទឹក ភ្លូកដី ពីសហគមន៍ជ្វីវក្នុងពិភពលោក និងសហគមន៍អន្តរជាតិជាទូទៅ ដោយរាប់តាំងពីលោកអគ្គលេខាធិការអង្គការសហប្រជាជាតិ បុរីវ៉ាទីកង់ សេតវិមាន ប្រេស៊ីល សហភាពអឺរ៉ុបទាំងមូល។ នៅថ្ងៃអង្គារនេះ សាកសពរបស់ជនរងគ្រោះបារាំងទាំងបួន ដែលមានសញ្ជាតិអ៊ីស្រាអែលនឹងត្រូវដឹកតាមយន្តហោះទៅបញ្ចុះក្នុងទឹកដីអ៊ីស្រាអែល។ តាំងពីថ្ងៃម្សិលមិញ ប្រព័ន្ធផ្សព្វផ្សាយអ៊ីស្រាអែលបានផ្អាកកម្មវិធីផ្សាយប្រចាំថ្ងៃរបស់ខ្លួន និងងាកមកផ្តោតលើព្រឹត្តិការណ៍បាញ់សម្លាប់ជនជាតិជ្វីវ ក្នុងប្រទេសបារាំង។ លោកនាយករដ្ឋមន្រ្តីអ៊ីស្រាអែល Benjamin Netanyahu ដែលបានអំពាវនាវឲ្យអាជ្ញាធរបារាំងស្វែងរកចាប់ឃាតករ បានលើកឡើងផងថា គំនិតស្អប់ជនជាតិជ្វីវអាចជាមូលហេតុមួយដែលធ្វើឲ្យឃាតករលើកដៃបាញ់សម្លាប់គ្រូនិងសិស្សជនជាតិជ្វីវនៅបារាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
លោកប្រធានាធិបតីបារាំងបានប្រកាសចាត់ទុកព្រឹត្តិការណ៍សម្លាប់គ្រូបង្រៀន និងកូនសិស្សជ្វីវបួននាក់ កាលពីថ្ងៃចន្ទម្សិលមិញថា ជាសោកនាកដកម្មជាតិ និងបានបញ្ជាឲ្យគេដាក់ខេត្តToulouse នៅក្នុងដំណាក់កាលក្រហម គឺកម្រិតប្រកាសអាសន្នខ្ពស់បំផុតដែលមិនធ្លាប់មានពីមុនមក។
តាំងពីល្ងាចថ្ងៃម្សិលមិញ ប៉ូលិសបារាំងបានបើកប្រតិបត្តិទ្រង់ទ្រាយធំមួយ ដើម្បីប្រមាញ់តាមចាប់ឃាតករដែល ប៉ូលិសបង្រ្កាបបារាំងចំនួន ១៤កងអង្គភាពត្រូវបានពង្រាយ នៅតាមវិហារ និងសហគមន៍ជ្វីវនៅក្នុងតំបន់ភាគខាងជើងបារាំងទាំងមូល។ ចំណែកប៉ូលិសយុត្តិធម៌បារាំងជិត ២០០នាក់ដែលមានជំនាញខាងគំនូសព្រាងមុខឃាតករត្រូវបានបញ្ជូនទៅកាន់ Toulouse នៅថ្ងៃអង្គារនេះ។
រហូតមកដល់ម៉ោងនេះ ប៉ូលិសបានទាញសន្និដ្ឋានបណ្តើរៗថា ឃាតករបាញ់សម្លាប់គ្រូ និងសិស្សជ្វីវ អាចជាប់ពាក់ព័ន្ធនឹងការបាញ់សម្លាប់ទាហានលោតឆ័ត្រយោងបារាំងបីនាក់ កាលពីជាងមួយសប្តាហ៍មុននេះនៅខេត្ត Toulouse និងMautauban ព្រោះថា អាវុធមួយដើមដែលឃាតករប្រើដើម្បីបាញ់រះទៅលើសិស្សសាលា ដូចគ្នានឹងប្រភេទអាវុធដែលឃាតករយកទៅបាញ់សម្លាប់ទាហានលោតឆ័ត្រយោងបារាំង។ ម្យ៉ាងទៀត បើតាមប៉ូលិស ឃាតករអាចជាទាហានព្រោះ បើមើលតាមលក្ខណៈបាញ់ទៅលើជនរងគ្រោះ គឺឃាតករបាញ់ត្រង់ក្នុងចម្ងាយ ១០ម៉ែត្រ និងបាញ់រះដូចទម្លាប់របស់ទាហាន។
ទាក់ទងនឹងករណីបាញ់សម្លាប់ទាហាននៅ Toulouse គេក៏កំពុងស៊ើបរកអតីតទាហានបីនាក់របស់កងវរសេនាធំទី ១៧ ដែលត្រូវបានថ្នាក់លើស្តីបន្ទោស និងដាក់ទណ្ឌកម្មខ្លាំងពីបទបានថតរូប និងធ្វើគំនាប់គោរពតាមហ៊ីត្លែ ដែលគេចាត់ទុកជាកាយវិការគាំទ្រពួកណាហ្ស៊ី។ ទាហានទាំងបីនាក់គឺជាជនជាតិបារាំង និងជាក្រុមណាហ៊្សីថ្មីដែលស្អប់ជនបរទេស។ អំណះអំណាងមួយទៀតដែលធ្វើឲ្យគេស្លុតចិត្ត គឺទាហានលោតឆ័ត្រយោងទាំងបីនាក់ដែលត្រូវឃាតករបាញ់សម្លាប់ គឺជាជនជាតិបារាំងដើមកំណើតអារ៉ាប់។
ក្នុងការសន្និដ្ឋានជាជំហានដំបូង ការរើសអើង ប្រកាន់ពូជសាសន៍ និងការស្អប់ពួកជ្វីវអាចជាមូលហេតុមួយដែរនៃការបាញ់សម្លាប់គ្រូ និងសិស្សសាលាជ្វីវ។ ហើយឧក្រិដ្ឋកម្មលើកនេះអាចបង្កដោយពួកស្តាំជ្រុលនិយម និងពួកណាហ្ស៊ីជំនាន់ថ្មី ព្រោះវាបានកើតឡើងនៅសាលារៀនរបស់ជនជាតិជ្វីវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ