គ្រាប់បែកផ្ទុះនៅមុខតុលាការអេហ្ស៊ីប ក្នុងថ្ងៃបោះឆ្នោតប្រជាមតិលើរដ្ឋធម្មនុញ្ញ
នៅអេហ្ស៊ីប ថ្ងៃអង្គារនេះ ភេរវកម្មបំផ្ទុះគ្រាប់បែកមួយ បានកើតឡើង នៅចំពីមុខតុលាការទីក្រុងគែរ ប៉ុន្តែ គ្រាប់បែកមានកម្រិតខ្សោយ មិនបានបណ្តាលអោយមានជនរងគ្រោះនោះទេ។ ការផ្ទុះគ្រាប់បែកនេះ ថ្ងៃអង្គារនេះ គឺចំថ្ងៃដែលអេហ្ស៊ីប ធ្វើការបោះឆ្នោតប្រជាមតិលើរដ្ឋធម្មនុញ្ញ ក្នុងប្រទេស។ គិតចាប់ពីអតីតប្រធានាធិបតីហូសស្ន៊ី មូប៉ារ៉ាក់ ត្រូវទំលាក់ចេញពីអំណាច នៅដើមឆ្នាំ២០១១មក នេះជាលើកទីបីហើយ ដែលប្រជាជនអេហ្ស៊ីបត្រូវបានអំពាវនាវអោយបញ្ចេញមតិលើគំរោងរដ្ឋធម្មនុញ្ញ។
ចុះផ្សាយនៅថ្ងៃ៖ កែប្រែថ្ងៃទី៖
គ្រាប់បែកដែលភេរវជនប្រើដើម្បីបំផ្ទុះ នៅមុខតុលាការក្រុងគែរ អេហ្ស៊ីប ព្រឹកថ្ងៃអង្គារនេះ ជាគ្រាប់បែកកម្រិតខ្សោយ។ គ្រាប់បៃកបានផ្ទុះឡើង ក្នុងសង្កាត់ដ៏មានប្រជាប្រិយភាពមួយ នៅខាងត្បូងក្រុងគែរ។ ភេរវកម្មនេះកើតឡើងចំថ្ងៃដែលប្រជាជនអេហ្ស៊ីប៥៣លាននាក់ ត្រូវបោះឆ្នោតប្រជាមតិលើរដ្ឋធម្មនុញ្ញ ក្នុងប្រទេស។ ការបោះឆ្នោតនេះ មានរយៈពេល២ថ្ងៃ ត្រូវបានគេចាត់ទុកថា ជាតេស្តសាកល្បង វាស់កម្រិតប្រជាប្រិយភាពរបស់រដ្ឋាភិបាលស្តីទី ដឹកនាំដោយប្រមុខទ័ពអេហ្ស៊ីប គឺលោក អាប់ឌែល ហ្វាតាល់ អាល់ស៊ីសស៊ី។
ដើម្បីពង្រឹងសន្តិសុខក្នុងថ្ងៃបោះឆ្នោតប្រជាមតិរដ្ឋធម្មនុញ្ញនេះ រដ្ឋាភិបាលស្តីទីអេហ្ស៊ីបបានប្រកាសពង្រាយទាហាន១សែន៦ម៉ឺននាក់ និងប៉ូលិស២សែននាក់ នៅទូទាំងប្រទេស។ អង្គការសិទ្ធិមនុស្សមួយចំនួនបរិហារថា ការបោះឆ្នោតប្រជាមតិលើរដ្ឋធម្មនុញ្ញ នេះ រៀបចំឡើងដោយមានការភ័យខ្លាច ខ្លាចថាមានការបង្ក្រាបលើចលនាប្រឆាំងណាមួយ។ គួររំលឹកថា កងទ័ពអេហ្ស៊ីបធ្លាប់ប្រើហិង្សាបង្ក្រាបបាតុកម្មរបស់សកម្មជនភាតរអ៊ីស្លាម ដែលគាំទ្រអតីតប្រធានាធិបតីមរស៊ី។ មនុស្សជាងមួយពាន់នាក់បានស្លាប់ ក្នុងអំពើហិង្សាបង្ក្រាបកន្លងមក។ បាតុករគាំទ្រអតីតប្រធានាធិបតីមរស៊ី រាប់ពាន់នាក់ត្រូវបានឃុំខ្លួន ហើយមួយចំនួនតូចនៅតែបន្តបាតុកម្មខ្លួនជាប្រចាំ។
ទោះយ៉ាងនេះក្តី ប្រជាជនអេហ្ស៊ីបភាគច្រើនបានគាំទ្ររដ្ឋាភិបាលស្តីទីដឹកនាំដោយប្រមុខទ័ពអាល់ស៊ីសស៊ី។ គួររំលឹកថា លោកអាល់ស៊ីសស៊ី បានដឹកនាំរដ្ឋប្រហារយោធា ទំលាក់អតីតប្រធានាធិបតី មរស៊ី កាលពីដើមខែកក្កដា ឆ្នាំ២០១៣។ បច្ចុប្បន្ន បុរសខ្លាំងរូបនេះ ជាឧបនាយករដ្ឋមន្ត្រី និងជាប្រមុខការពារជាតិអេហ្ស៊ីប។ លោកអាល់ស៊ីសស៊ី បានអំពាវនាវអោយប្រជាជនចូលរួមបោះឆ្នោតគាំទ្ររដ្ឋធម្មនុញ្ញអោយបានសន្ធឹកសន្ធាប់។ លោកលើកឡើងថា ប្រសិនបើប្រជាជនទាមទារ ហើយប្រសិនកងទ័ពគាំទ្របេក្ខភាពលោក លោកនឹងដាក់បេក្ខភាពសម្រាប់ការបោះឆ្នោតប្រធានាធិបតី ដែលនឹងត្រូវប្រព្រឹត្តទៅ ក្នុង៦ខែខាងមុខនេះ។
គំរោងច្បាប់រដ្ឋធម្មនុញ្ញថ្មី សម្រាប់ការបោះឆ្នោតប្រជាមតិនេះ ត្រូវបានតាក់តែងឡើងដោយគណៈកម្មការមួយ ចាត់តាំងដោយរដ្ឋាភិបាលស្តីទីអេហ្ស៊ីប។ គំរោងនេះបានទាត់ចោលខសំខាន់នានា ដែលអតីតប្រធានាធិបតីមរស៊ី បានដាក់បញ្ចូល ជាខសំខាន់ពង្រឹងកាតព្វកិច្ចសាសនាក្នុងប្រទេស។ គំរោងរដ្ឋធម្មនុញ្ញថ្មីនេះ កែប្រែតិចតួចណាស់នូវអំណាចស្ថាប័ននានា និងអំណាចប្រធានាធិបតី។ គំរោងនេះ បានពង្រឹងអំណាចអ្នកដឹកនាំយោធាមួយចំនួនផងដែរ។ គណបក្សភាតរអ៊ីស្លាមរបស់អតីតប្រធានាធិបតីមរស៊ី បានអំពាវនាវអោយធ្វើពហិការមិនចូលរួមបោះឆ្នោតប្រជាមតិនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ