នយោបាយជនភៀសខ្លួនដ៏ចម្រូងចម្រាសរបស់អូស្រ្តាលី
ចុះផ្សាយនៅថ្ងៃ៖
ស្តាប់ - ០៤:០១
កិច្ចព្រមព្រៀងបញ្ជូនជនភៀស ដែលអូស្រ្តាលីបានចុះជាមួយកម្ពុជា កាលពីពេលថ្មីៗនេះ កំពុងតែបង្កឲ្យមានការរិះគន់យ៉ាងផុសផុល ជាពិសេស ពីសំណាក់សកម្មជនការពារសិទ្ធិមនុស្ស។ ការចុះកិច្ចព្រមព្រៀងបញ្ជូនជនភៀសខ្លួនពីអូស្រ្តាលីឲ្យមករស់នៅក្នុងប្រទេសកម្ពុជានេះ គ្រាន់តែជាផ្នែកមួយប៉ុណ្ណោះ នៃនយោបាយជនភៀសខ្លួនដ៏សែនចម្រូងចម្រាសរបស់អូស្រ្តាលី។
អូស្រ្តាលីគឺជាប្រទេសមួយដែលសម្បូរធនធាន មានដីទំនេរច្រើន មានវប្បធម៌ចម្រុះ ហើយជាប្រជាជាតិដែលមានដើមកំណើតដំបូងពីចលនាអន្តោប្រវេសន៍។ នៅក្នុងពេលបច្ចុប្បន្ននេះ អូស្រ្តាលីក៏មិនមែនជាប្រទេសដែលប្រឈមមុខនឹងបញ្ហាជនភៀសខ្លួនខ្លាំងក្លានោះដែរ។ គេសង្កេតឃើញថា នៅក្នុងចំណោមជនភៀសខ្លួន នៅទូទាំងពិភពលោក មានតែប្រមាណជា ២% ប៉ុណ្ណោះ ដែលមកសុំសិទ្ធិជ្រកកោននយោបាយ នៅក្នុងប្រទេសអូស្រ្តាលី។ ក្នុងចំណោមអ្នកសុំសិទ្ធិជ្រកកោននយោបាយនេះទៀតសោត គេឃើញមានភាគច្រើនលើសលុប ត្រូវបានគេរកឃើញថាជាជនភៀសខ្លួននយោបាយពិតប្រាកដ។
ក៏ប៉ុន្តែ បើទោះបីជាយ៉ាងនេះក៏ដោយ អូស្រ្តាលីបានប្រកាន់យកនូវនយោបាយយ៉ាងតឹងរ៉ឹងបំផុតចំពោះជនភៀសខ្លួន ហើយនយោបាយតឹងរ៉ឹងចំពោះជនភៀសខ្លួននេះហាក់ដូចជាទទួលបាននូវការគាំទ្រពីសំណាក់ពលរដ្ឋអូស្រ្តាលី ពីព្រោះថា រដ្ឋាភិបាលបច្ចុប្បន្ន ដែលដឹកនាំដោយលោក Tony Abbott បានជាប់ឆ្នោតដោយយកការសន្យាទប់ស្កាត់ការហូរចូលនៃជនភៀសខ្លួនមកធ្វើជាចំណុចសំខាន់ នៅក្នុងយុទ្ធនាការឃោសនាបោះឆ្នោត កាលពីឆ្នាំ២០១៣កន្លងទៅនេះ។
វិធានការដ៏តឹងរ៉ឹង និងដ៏សែនចម្រូងចម្រាសបំផុតរបស់រដ្ឋាភិបាលលោក Tony Abbott គឺវិធានការដែលដាក់ទៅលើជនភៀសខ្លួនដែលធ្វើដំណើរតាមទូកដោយខុសច្បាប់ ចូលទៅសុំសិទ្ធិជ្រកកោនក្នុងប្រទេសអូស្រ្តាលី។ ជនភៀសខ្លួនទាំងនេះភាគច្រើនមកពីអាហ្វហ្កានីស្ថាន ស្រីលង្កា អ៊ីរ៉ាក់ និងអ៊ីរ៉ង់ ហើយធ្វើដំណើរតាមទូកពីប្រទេសឥណ្ឌូណេស៊ី។
នយោបាយរបស់រដ្ឋាភិបាលអូស្រ្តាលី ដែលបានដាក់ចេញចាប់តាំងពីលោក Tony Abbott ជាប់ឆ្នោត កាលពីឆ្នាំ២០១៣ ផ្តោតទៅលើចំណុចសំខាន់ ៣ គឺ រារាំង ឃុំឃាំង និងបញ្ជូនជនភៀសខ្លួនចេញពីប្រទេសអូស្រ្តាលី។ នៅក្នុងការអនុវត្តជាក់ស្តែង រដ្ឋាភិបាលរបស់លោក Tony Abbott បានចាត់ឲ្យឆ្មាំសមុទ្របង្កើនការល្បាតឆ្នេរសមុទ្រ ដើម្បីធ្វើយ៉ាងណាស្ទាក់ចាប់ទូកដឹកជនភៀសខ្លួនដែលព្យាយាមធ្វើដំណើរចូលទៅក្នុងប្រទេសអូស្រ្តាលី។ ទូកណាដែលមិនទាន់ចូលមកដល់ក្នុងដែនទឹករបស់អូស្រ្តាលីនៅឡើយ ត្រូវគេរុញច្រានឲ្យចេញទៅទីសមុទ្រ ឬទៅប្រទេសឥណ្ឌូណេស៊ីវិញ។ ចំណែកឯជនភៀសខ្លួនណា ដែលបានចូលមកដល់ក្នុងទឹកដីរបស់អូស្រ្តាលីហើយ ត្រូវចាប់យកទៅដាក់ឃុំនៅក្នុងជំរំជនភៀសខ្លួន ដែលអូស្រ្តាលីបានចុះកិច្ចព្រមព្រៀងបង្កើត នៅតាមបណ្តាប្រទេស ដែលជាកូនកោះ នៅក្នុងមហាសមុទ្រប៉ាស៊ីហ្វិក (ប៉ាពូអាស៊ីនូវែលហ្គីណេ និងកោះណាអ៊ូរូ)។ ចំនួនអ្នកសុំសិទ្ធិជ្រកកោននយោបាយ ដែលជាប់ឃុំនៅតាមមណ្ឌលឃុំឃាំងអស់ទាំងនេះ ត្រូវបានអង្គការ Amnesty International វាយតម្លៃថា មានប្រមាណជាង ៣ពាន់នាក់ ដោយក្នុងនោះ មានជាង ២រយនាក់ គឺជាកុមារ ហើយឃុំឃាំងនៅក្នុងលក្ខខណ្ឌមួយដែលគ្មានមនុស្សធម៌។
នៅទីនោះ ជនភៀសខ្លួនត្រូវជាប់ឃុំដោយគ្មានកាលកំណត់ ដើម្បីរង់ចាំសេចក្តីសម្រេចពីរដ្ឋាភិបាលអូស្រ្តាលីថា តើគេអាចទទួលសិទ្ធិជាជនភៀសខ្លួនដែរឬទេ? អ្នកដែលមិនត្រូវបានផ្តល់សិទ្ធិជាជនភៀសខ្លួនអាចនឹងត្រូវអាជ្ញាធរអូស្រ្តាលីបញ្ជូនឲ្យទៅកាន់ប្រទេសកំណើតរបស់ពួកគេវិញ ចំណែកអ្នកដែលបំពេញតាមលក្ខខណ្ឌគ្រប់គ្រាន់ជាជនភៀសខ្លួន ស្របទៅតាមអនុសញ្ញាអន្តរជាតិ អូស្រ្តាលីបានរកឃើញដំណោះស្រាយមួយ ដើម្បីចៀសវាងមិនទទួលយកជនភៀសខ្លួនទាំងនេះឲ្យទៅរស់នៅក្នុងប្រទេសអូស្រ្តាលី គឺបញ្ជូនជនភៀសខ្លួនឲ្យទៅរស់នៅប្រទេសទី៣។ ប្រទេសទី៣នេះ គឺមានកម្ពុជា ដែលទើបនឹងបានចុះហត្ថលេខាទទួលយកជនភៀសខ្លួនពីអូស្រ្តាលី កាលពីសប្តាហ៍មុន។
នៅក្នុងកិច្ចព្រមព្រៀងនេះ ទាំងរដ្ឋាភិបាលអូស្រ្តាលី និងទាំងរដ្ឋាភិបាលកម្ពុជាសុទ្ធតែបានអះអាងថា ការបញ្ជូនជនភៀសខ្លួនពីអូស្រ្តាលីមករស់នៅក្នុងប្រទេសកម្ពុជានឹងត្រូវធ្វើទៅតាមគោលការណ៍ស្ម័គ្រចិត្ត ពោលគឺ ជនភៀសខ្លួនអាចជ្រើសរើសថាតើពួកគេសុខចិត្តមកតាំងទីលំនៅ នៅក្នុងប្រទេសកម្ពុជាដែរឬទេ?
ក៏ប៉ុន្តែ គោលការណ៍ស្ម័គ្រចិត្តនេះប្រហែលជាមានន័យត្រឹមតែលើក្រដាសតែប៉ុណ្ណោះ ចំណែកឯនៅក្នុងការអនុវត្តជាក់ស្តែងវិញ ជនភៀសខ្លួនទំនងជាមិនសូវជាមានជម្រើសអ្វីច្រើនប៉ុន្មាននោះទេ ពីព្រោះថា តាមគម្រោង អូស្រ្តាលីចង់បញ្ជូនមកកម្ពុជា នូវជនភៀសខ្លួន ដែលកំពុងជាប់ឃុំនៅមណ្ឌលឃុំឃាំងរង់ចាំសេចក្តីសម្រេចផ្តល់សិទ្ធិជ្រកកោន។
ក្នុងករណីនេះ ជនភៀសខ្លួនមិនមានជម្រើសរវាងទៅរស់នៅអូស្រ្តាលី ឬទៅរស់នៅកម្ពុជានោះទេ ក៏ប៉ុន្តែ ជម្រើសរវាង ឬមួយសុខចិត្តទៅរស់នៅក្នុងប្រទេសកម្ពុជា ឬមួយត្រូវបន្តជាប់ឃុំតទៅទៀតដោយគ្មានសិទ្ធិជាជនភៀសខ្លួន ហើយត្រូវប្រឈមមុខនឹងការបញ្ជូនទៅប្រទេសកំណើតរបស់ពួកគេវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ