អូស្ត្រាលីបន្តឹងច្បាប់ដើម្បីបញ្ចប់ក្តីស្រមៃរបស់ជនភៀសខ្លួនដែលចង់សុំសិទ្ធិជ្រកកោន
ចុះផ្សាយនៅថ្ងៃ៖
បន្ទាប់ពីត្រូវពិភាក្សាយ៉ាងតឹងសសៃក នៅព្រឹទ្ធសភា កាលពីយប់ថ្ងៃព្រហស្បតិ៍ទី ៤ ធ្នូ នៅទីបំផុត វិសោធនកម្មច្បាប់អន្តោប្រវេសន៍ដែលស្នើដោយរដ្ឋាភិបាល ត្រូវបានរដ្ឋសភាអូស្ត្រាលីបោះឆ្នោត អនុម័តគាំទ្រ នៅព្រឹកថ្ងៃសុក្រទី៥ធ្នូ។ ច្បាប់អន្តោប្រវេសន៍ដែលតឹងរួចទៅហើយ ត្រូវបានរដ្ឋាភិបាលអូស្ត្រាលីទាមទារឲ្យធ្វើវិសោធនកម្ម ដើម្បីរឹតបន្តឹងបន្ថែមនយោបាយជនភៀសខ្លួន ដែលជាសំណុំរឿងដ៏ចម្រូងចម្រាស នៅអូស្ត្រាលី។ សម្រាប់លោកនាយករដ្ឋមន្រ្តីតូនី អាបូត ការបោះឆ្នោតគាំទ្ររបស់សភាទៅលើវិសោធនកម្មច្បាប់អន្តោប្រវេសន៍ ជាជោគជ័យរបស់អូស្ត្រាលីសម្រាប់ទប់ស្កាត់ការហូរចូលនៃជនភៀសខ្លួនតាមផ្លូវសមុទ្រ។
ច្បាប់អន្តោប្រវេសន៍របស់អូស្រាលីធ្លាប់តែតឹងរួច មែនហើយ ប៉ុន្តែ នៅមិនទាន់តឹងរ៉ឹងមែនទែន ដើម្បីបំពេញចិត្តនាយករដ្ឋមន្រ្តីអូស្ត្រាលី បច្ចុប្បន្ននេះទេ។ លោកតូនី អាបូតបានឈ្នះឆ្នោត ដោយសារលោកបានជាប់សន្យាទៅប្រជាជនអូស្ត្រាលីថា នឹងរឹតបន្តឹងនយោបាយគ្រប់គ្រងជនអន្តោប្រវេសន៍ ដែលប្រជាជនអូស្ត្រាលីចាត់ទុកថា ជាអ្នកទៅដណ្តើមការងារពីប្រជាជនអូស្រ្តាលី។ ចាប់តាំងពីចូលកាន់តំណែង នៅឆ្នាំ ២០១៣ លោកបានរឹតបន្តឹងជាបន្តបន្ទាប់ ច្បាប់អន្តោប្រវេសន៍។ កាលពីពេលថ្មីៗនេះ លោកបានស្នើវិសោធនកម្មច្បាប់អន្តោប្រវេសន៍ ដោយបានដាក់បញ្ចូលវិធានមួយចំនួន ដែលធ្លាប់ជាវិធានដ៏ចម្រូងចម្រាស ក្នុងអាណត្តិរដ្ឋាភិបាលអភិរក្សមុនៗ កាលពី៧ឆ្នាំមុន។
វិសោធនកម្មច្បាប់នៅថ្ងៃនេះ បាននិយាយពីការផ្តល់ទិដ្ឋាការ រយៈពេលបណ្តោះអាសន្នមួយ ដល់ជនអន្តោប្រវេសន៍ ដែលរដ្ឋាភិបាលអូស្ត្រាលីទទួលស្គាល់ថា ជាជនភៀសខ្លួនពិតប្រាកដ។ មានន័យថា ច្បាប់នេះនឹងអនុញ្ញាតឲ្យជនភៀសខ្លួន ដែលចង់សុំសិទ្ធិជ្រកកោន នៅអូស្រ្តាលី បានទទួលទិដ្ឋាការរស់នៅក្នុងទឹកដីអូស្ត្រាលី រយៈពេលបណ្តោះអាសន្ន តែពី៣ ទៅ៥ឆ្នាំប៉ុណ្ណោះ ប៉ុន្តែ ពួកគេមិនអាចទទួលសិទ្ធិរស់នៅអូស្ត្រាលី ជាអចិន្ត្រៃយ៍នោះទេ។ បន្ទាប់ពីអស់ទិដ្ឋាការបណ្តោះអាសន្ន រដ្ឋាភិបាលអូស្ត្រាលីនឹងពិចារណា ទៅលើស្ថានភាពរបស់ជនភៀសខ្លួន និងស្ថានភាពរបស់ប្រទេសកំណើតរបស់ជនភៀសខ្លួន។ ប្រសិនបើស្ថានភាពប្រទេសកំណើតរបស់ជនភៀសខ្លួនមានលក្ខណៈល្អប្រសើរ ឬជនភៀសខ្លួនលែងទទួលការគំរាមកំហែងក្នុងប្រទេសកំណើតរបស់ខ្លួន នោះអាជ្ញាធរអូស្រា្តលីនឹងអាចបដិសេធមិនផ្តល់ទិដ្ឋាការបណ្តោះអាសន្ន និងអាចបញ្ជូនជនភៀសខ្លួនទៅប្រទេសកំណើតវិញ។
សម្រាប់ក្រុមអ្នកការពារសិទ្ធិមនុស្ស វិធានការថ្មីនេះនេះអាចបើកផ្លូវឲ្យគេចាប់បញ្ជូនជនរងគ្រោះទៅមេពេជ្ឃឃាដកាប់សម្លាប់នោះទេ ព្រោះថា ជនភៀសខ្លួនភាគច្រើន មកពីអ៊ីរ៉ាក់ អ៊ីរ៉ង់ ឬអាហ្វហ្កានីស្ថាន សុទ្ធតែធ្លាប់បានទទួលរងការធ្វើទុកម្នេញក្នុងប្រទេសកំណើតរបស់ខ្លួនរួចហើយ មុននឹងហ៊ានប្រថុយជីវិត ធ្វើដំណើរតាមទូកចូលដែនទឹកអូស្ត្រាលី នោះ។
នៅក្រោយសភាបោះឆ្នោតគាំទ្រវិសោធនកម្មច្បាប់ លោកតូនី អាបូត បាននិយាយថា នេះជាជោគជ័យមួយសម្រាប់អូស្ត្រាលី។ សម្រាប់លោកនាយករដ្ឋមន្រ្តីដ៏អភិរក្សនិយមមួយនេះ អូស្ត្រាលីបានសម្រេច គោលការណ៍សំខាន់បី ដើម្បីទប់ស្កាត់កុំឲ្យទូកដឹកជនបរទេស ធ្វើដំណើរសំដៅអូស្ត្រាលី។ ទីមួយ គឺការត្រួតពិនិត្យពាក្យសុំសិទ្ធិជ្រកកោណ ត្រូវធ្វើឡើងនៅក្រៅទឹកដីអូស្ត្រាលី។ ទីពីរ គឺការបង្កើនការងាររបស់នាវាល្បាតអូស្ត្រាលី ដើម្បីបង្កា ទប់ស្កាត់ កុំឲ្យទូកដឹកជនបរទេស អាចបើកចូលក្នុងដែនទឹករបស់អូស្ត្រាលី។
ចំណែកគោលការណ៍ទីបី គឺការផ្តល់ទិដ្ឋាការបណ្តោះអាសន្ននេះតែម្តង ដែលសភាទើបបោះឆ្នោតអនុម័តនៅថ្ងៃនេះ។ សម្រាប់រដ្ឋាភិបាលអូស្ត្រាលី ចំណាត់ការទាំងបីនេះល្មមអាចបំបាក់ទឹកចិត្តកុំឲ្យពួកឈ្មួញបានចំណេញ ពីការជួញដូរ ដឹកមនុស្សចូលក្នុងទឹកដីអូស្ត្រាលី។
តាមរដ្ឋមន្រ្តីអន្តោប្រវេសន៍អូស្ត្រាលី កងទ័ពអូស្ត្រាលីធ្លាប់ស្ទាក់ឃាត់ទូក ដឹកជនបរទេស ចំនួន ១២ទូក មិនឲ្យចូលទាន់ ក្នុងដែនទឹកអូស្ត្រាលី។ កាលពីខែវិច្ឆិកាកន្លងទៅ រដ្ឋមន្រ្តីអន្តោប្រវេសន៍ អូស្ត្រាលីបានប្រកាស មិនទទួលឲ្យចូលទឹកដីអូស្ត្រាលី នូវរាល់ជនភៀសខ្លួន ដែលមកដល់ជំរំប្រទេសឥណ្ឌូណេស៊ី ចាប់ពីខែកក្កដា នោះបើទោះបីជា ពួកគេទាំងនោះត្រូវបានអង្គការសហប្រជាជាតិចាត់ទុកថា ជនរងគ្រោះ និងដែលអាចសុំសិទ្ធិជ្រកកោណនយោបាយ នៅអូស្ត្រាលី ក៏ដោយ។
សម្បទាន ឬនយោបាយបោកបញ្ឆោត?
ដើម្បីឲ្យព្រឹទ្ធសភាបោះឆ្នោតគាំទ្រវិសោធនកម្មច្បាប់ រដ្ឋាភិបាលអូស្ត្រាលីបានធ្វើសម្បទានមួយចំនួន ដូចជា នឹងអនុញ្ញាតឲ្យអ្នកសុំសិទ្ធិជ្រកកោណចំនួន ១៥០០នាក់ ដែលក្នុងនោះមានកុមារ ៤៧០នាក់ និងដែលកំពុងរស់នៅក្នុងជំរំជនភៀសខ្លួន ឲ្យចូលទៅរស់នៅដោយមានសេរីភាព លើកោះChrisman ដែលជាកោះរបស់ប្រទេសអូស្ត្រាលី។ រដ្ឋាភិបាលបានសន្យាផងដែរថា នឹងបង្កើនកូតាទទួលជនភៀសខ្លួនក្នុងមួយឆ្នាំៗ ពីចំនួន ៧៥០០នាក់ នៅឆ្នាំនេះ ទៅ ដល់ ចំនួន ១៨ ៧៥០នាក់ ក្នុងឆ្នាំ ២០១៨។
តាមសមាជិកសភាមកពីគណបក្សប្រឆាំង គឺលោកTony Burkeរដ្ឋាភិបាលរបស់លោកតូនី អាបូតបានសន្យាធ្វើសម្បទាន ដើម្បីឲ្យវិសោធនកម្មអាចចេញរួចពីសភា ប៉ុន្តែ រដ្ឋាភិបាលអាចនឹងប្រែក្រឡាស់មិនធ្វើតាមការសន្យា។ ពោលគឺរដ្ឋាភិបាលនឹងយកបញ្ហាជនអន្តោប្រវេសន៍មកធ្វើជាកូនអុក ដើម្បីទាមទារឲ្យសភាគាំទ្រច្បាប់ថ្មីៗដែលខ្លួនចង់បាន ម្តងហើយ ម្តងទៀត។
យ៉ាងណាក៏ដោយ ការរឹតបន្តឹងច្បាប់អន្តោប្រវេសន៍របស់អូស្ត្រាលីត្រូវបានគេមើលឃើញថា ជាអាវុធដែលរដ្ឋាភិបាលអូស្ត្រាលីប្រើសម្រាប់បំផ្លាញក្តីស្រមៃរបស់ជនភៀសខ្លួន ដែលធ្លាប់តែគិតថា ចង់គេចពីកន្លែងគ្រោះថ្នាក់ និងទៅស្វែងរកសុខ នៅប្រទេសឋានសួគ៍អូស្ត្រាលី។ សម្រាប់ក្រុមអ្នកការពារសិទ្ធិមនុស្ស ទិដ្ឋការបណ្តោះអាសន្ន នឹងនៅតែធ្វើឲ្យជនភៀសខ្លួនរស់នៅក្នុងស្ថានភាពមិនច្បាស់លាស់ គ្មានគោលដៅពិតប្រាកដ និងគ្មានថ្ងៃបានសាងអនាគតភ្លឺស្វាង នៅក្នុងទឹកដីអូស្ត្រាលីនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ