អូស្ត្រាលី បិទជំរុំជនភៀសខ្លួន នៅកោះ Nauru ប៉ុន្តែជនភៀសខ្លួននៅតែមិនព្រមចាកចេញ
ថ្ងៃទី៣១តុលានេះ គឺដល់ថ្ងៃកំណត់ដែលរដ្ឋាភិបាលអូស្ត្រាលី ត្រូវបិទជំរុំជនភៀសខ្លួន នៅកោះNauru និងនៅជំរុំកោះ Manus។ ក៏ប៉ុន្តែអ្នកភៀសខ្លួនជាង៦០០នាក់ នៅទីនោះ បានក្រាញននៀលមិនព្រមចាកចេញនោះទេ ព្រោះមិនដឹងត្រូវទៅរស់នៅទីណា។ ជនភៀសខ្លួននៅទីនោះ បានរៀបរាប់ប្រាប់កាសែតបារាំងAFP ថា «ប្រព័ន្ធទឹកភ្លើង គឺត្រូវកាត់ផ្តាច់អស់ពីជំរុំ Nauru និងManus នៅត្រឹមម៉ោង៥ល្ងាច ម៉ោងនៅក្នុងស្រុក។ បុគ្គលិក ដែលធ្វើការនៅក្នុងជំរុំកោះទាំងពីរនោះ បានចាកចេញអស់ហើយ»។ នៅឡើយតែជនភៀសខ្លួនតែប៉ុណ្ណោះ ដែលបដិសេធមិនព្រមចាកចេញ។
ចុះផ្សាយនៅថ្ងៃ៖ កែប្រែថ្ងៃទី៖
ជាការកត់សម្គាល់ តាំងតែពីប៉ុន្មានថ្ងៃមុនមកម្ល៉េះ ដែលគ្រឿងសម្ភារៈប្រើប្រាស់ផ្សេងៗសម្រាប់ផ្គត់ផ្គង់ជនភៀសខ្លួន ក៏ត្រូវកាត់ផ្តាច់ ហើយចំណែកស្បៀងអាហារ ត្រូវកាត់បន្ថយបណ្តើរៗរហូតមក។ អ្នកភៀសខ្លួនភាគច្រើន ជាជនជាតិឥណ្ឌា អ៊ីរ៉ាក់ អ៊ឺរង់ សូម៉ាលី អាហ្គានីស្ថាន និងវៀតណាមជាដើម បានអះអាងតាំងដំបូងហើយថា ពួកគេនឹងមិនចាកចេញពីជំរុំជ្រកកោននោះឡើយ។ ដ្បិតថា បន្ទាប់ពីធ្វើដំណើរកាត់សមុទ្រនិងហែលឆ្លងឧបសគ្គមកដល់ទីនោះ ពួកគេមិនដឹងជាទៅរស់នៅទីណាទៀតទេ ដែលអាចមានសុវត្ថិភាព និងអាចកសាងជីវិតថ្មី។
សូមជ្រាបថា Nauru ជាកោះតូច មានផ្ទៃដីជាង២០គីឡូម៉ែត្រ និង មានប្រជាជនជាង១ម៉ឺននាក់ តែមានអ្នកភៀសខ្លួនរាប់រយនាក់។ ប្រឈមមុខនឹងវិបត្តិជនភៀសខ្លួនដ៏ចម្រូងចម្រាសនេះ អូស្ត្រាលី បានអនុវត្តនយោបាយ រឹងថ្អឹងកាន់តែខ្លាំង ដោយយល់ព្រមដល់សិទ្ធិជ្រកកោនដល់ជនភៀសខ្លួន ទាំងនោះលើយ។
សូមជម្រាបថា កន្លងមក រដ្ឋាភិបាលអូស្ត្រាលី បានខំសាកល្បងដោះស្រាយវិបត្តិនេះ ដោយសុំឲ្យប្រជាជនរបស់ខ្លួនទទួលយកជនភៀសខ្លួនខ្លះ ឲ្យទៅរស់នៅតាមផ្ទះរបស់ពួកគេ។ ក៏ប៉ុន្តែ មានពលរដ្ឋតិចតួចបំផុត ដែលបានស្មគ្រចិត្ត ព្រមទទួលយក។ លើសពីនេះ រដ្ឋាភិបាលអូស្ត្រាលី បានខំចរចាជាមួយរដ្ឋាភិបាលប្រទេសផ្សេងៗទៀត ដើម្បីឲ្យទទួលយកជនភៀសខ្លួន ពីកោះ Nauru។ ក្នុងនោះ មានប្រទេសកម្ពុជា និងសហរដ្ឋអាមេរិកក្នុងរដ្ឋបាលរបស់លោក អូបាម៉ា។ ពីដំបូងឡើយ រដ្ឋាភិបាលអាមេរិក អាណត្តិរបស់លោក អូបាម៉ា បានសន្យាទទួលយកមនុស្ស ជាង៥០នាក់ តែសម្រេចសម្រួចទៅ គឺមានតែជាង២០នាក់ប៉ុណ្ណោះ ដែលបានចេញទៅរស់នៅសហរដ្ឋអាមេរិក។ ចំណេកនៅកម្ពុជា អ្នកភៀសខ្លួនពីកោះ Nauru ខ្លះ បានបន្តរស់នៅទីក្រុងភ្នំពេញ តែអ្នកខ្លះទៀត បានសុំចេញទៅប្រទេសដើមរបស់ពួកគេវិញ។
គួរបញ្ជាក់ថា លក្ខខណ្ឌរស់នៅ និងស្ថានភាពជីវភាពរបស់ជនភៀសខ្លួន នៅលើកោះ Nauru និងនៅជំរុំកោះ Manus គឺត្រូវអង្គការការពារសិទ្ធិមនុស្ស ដូចជា Human Rights Watch និង ស្នងការសិទ្ធិមនុស្សរបស់អង្គការសហប្រជាជាតិ តែងតែរិះគន់ជាញឹកញយ ពីការមិនយកចិត្តទុកដាក់របស់រដ្ឋាភិបាលអូស្ត្រាលី។ គ្រូពេទ្យចិត្តសាស្ត្រ របស់អង្គការទាំងនេះ ក៏បានកត់សម្គាស់ឃើញថា ស្ថានភាពផ្លូវចិត្តរបស់ជនភៀសខ្លួនទាំងនោះ គឺលំបាកខ្លាំងណាស់ រហូតដល់អ្នកខ្លះមានបំណងចង់សម្លាប់ខ្លួនទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ