ការសិក្សា៖ មនុស្សស្លាប់ ជាង៥០០នាក់ ដោយគ្រោះថ្នាក់យន្តហោះ នៅឆ្នាំ២០១៨
នៅឆ្នាំ២០១៨ គឺមានមនុស្សជាង៥០០នាក់ បានស្លាប់ដោយសារតែគ្រោះថ្នាក់យន្តហោះ។ គឺជាចំនួនកើនឡើងយ៉ាងគំហុកបើធៀបនៅនឹងឆ្នាំ២០១៧។ បើទោះបីជាយ៉ាងនេះក្តី ការធ្វើដំណើរតាមផ្លូវអាកាស គឺនៅតែជាមធ្យោបាយដ៏សុវត្ថិភាពបំផុត។ នេះបើតាមរបាយការណ៍ការសិក្សាថ្មីមួយរបស់ បណ្តាញសុវត្ថិភាពអាកាសចរណ៍ ដែលមានមូលដ្ឋាននៅក្រុង ឡាអេ ប្រទេសហូឡង់។
ចុះផ្សាយនៅថ្ងៃ៖
ស្តាប់ - ០១:២៩
នៅឆ្នាំចាស់កន្លងទៅនេះ គ្រោះថ្នាក់យន្តហោះ បានកើតមាននៅបណ្តាប្រទេសមួយចំនួន ដូចជា គុយបា រុស្ស៊ី អ៊ីរ៉ង់ នេប៉ាល់ និងនៅឥណ្ឌូនេស៊ី ជាដើម។ ក្នុងចំណោមគ្រោះថ្នាក់ទាំងនេះ គឺយន្តហោះខ្លះ បានធ្លាក់ចូលទឹកសមុទ្រ ខ្លះទៀត ធ្លាក់នៅពេលដែលហោះទៅជិតដល់គោលដៅចុះចតទៅហើយ។ យន្តហោះដែលរងគ្រោះថ្នាក់ស្លាប់មនុស្សទាំងនោះ គឺជាប្រភេទក្រុមហ៊ុនដែលស្ថិតក្នុង«បញ្ជីខ្មៅ» របស់សហភាពអឺរ៉ុប។ បើតាមរបាយការណ៍សិក្សា គ្រោះថ្នាក់ធ្លាក់យន្តហោះភាគច្រើន គឺមូលហេតុបណ្តាលមកពីការបាត់បង់ម្ចាស់ការ។
ជារួម នៅឆ្នាំ២០១៨ គ្រោះថ្នាក់យន្តហោះ មានចំនួន១៥ដង ហើយសម្លាប់មនុស្សចំនួន៥៥៦នាក់។ ប្រធានសមាគមបណ្តាញសុវត្ថិភាពអាកាសចរណ៍ លោក Harro Ranter បានសង្កត់ធ្ងន់ថា ចំនួនគ្រោះថ្នាក់១៥ដងនេះ បើប្រៀបកាលពី១០ឆ្នាំមុនវិញនោះ គឺចំនួនអ្នកស្លាប់ ច្បាស់ជាកើនលើសនេះឆ្ងាយណាស់។ ការបាត់បង់ជីវិតតិចតួចដូច្នេះ គឺដោយសារតែមានការជឿនលឿននៃប្រព័ន្ធរក្សាសុវត្ថិភាព។
ទោះបីយ៉ាងណាក្តី បើគេប្រៀបធៀបទៅឆ្នាំ២០១៧ គឺមានមនុស្សស្លាប់តែ១៣នាក់ប៉ុណ្ណោះ។ ឆ្នាំ២០១៧ ជាឆ្នាំដែលមានសុវត្ថិភាពបំផុត សម្រាប់ការធ្វើដំណើរផ្លូវអាកាស បើរាប់ក្នុងរយៈកាល៧ទសវត្សរ៍មកនេះ។ ក៏ប៉ុន្តែ ឆ្នាំ២០១៨ ជាឆ្នាំដែលមានការធ្វើដំណើរតាមផ្លូវអាកាសច្រើនបំផុត បើសរុបទូទាំងពិភពលោក មានជើងហោះហើរ ប្រមាណ ៣៧.៨០០.០០០ ជើងហោះហើរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ