ខួប១០០ឆ្នាំ នៃសេចក្តីប្រកាសបង្កើតរដ្ឋអ៊ីស្ត្រាអែល
ថ្ងៃព្រហស្បតិ៍ ទី២វិច្ឆិកានេះ គឺជាថ្ងៃគម្រប់ខួប១០០ឆ្នាំ នៃសេចក្តីប្រកាស Balfour ដែលជាមូលដ្ឋានសំខាន់បង្កើតរដ្ឋអ៊ីស្ត្រាអែល។ ដោយសំអាងលើសេចក្តីប្រកាសនេះហើយ ទើបអ៊ីស្ត្រាអែលបានប្រកាសឯករាជ្យ។ ថ្ងៃនេះ សេចក្តីប្រកាស Balfour មានអាយុ១សតវត្សរ៍ទៅហើយ ក៏ប៉ុន្តែ ប្រទេសអ៊ីស្ត្រាអែល និងប៉ាឡេស្ទីន នៅតែបែងចែកទឹកដីគ្នាមិនដាច់ ហើយនិងបានកំពុងបន្តសង្គ្រាមបែកហួរគ្នារហូតមកទល់សព្វថ្ងៃ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
កាលពី១០០ឆ្នាំមុន ប្រទេសអង់គ្លេស គឺជាអ្នកកាន់កាប់មើលការខុសត្រូវ ទៅលើទឹកដីតំបន់ដើមបូព៌ា ដែលបច្ចុប្បន្ននេះ គឺទឹកដីអ៊ីស្ត្រាអែល និងប៉ាឡេស្ទីន។ រដ្ឋមន្ត្រីការបរទេសអង់គ្លេស លោក Athur Balfour កាលពីថ្ងៃទី២វិច្ឆិកាឆ្នាំ១៩១៧ បានសរសេរលិខិតមួយ ដោយបានគូសបញ្ជាក់ថា«ត្រូវបង្កើតផ្ទះជាតិមួយ នៅ តំបន់ប៉ាឡេស្ទីន សម្រាប់ជនជាតិជ្វីហ្វ»។ យោងតាមសេចក្តីប្រកាសនេះហើយ ទើបអ៊ីស្ត្រាអែល បានយកជាមូលដ្ឋានដ៏រឹងមាំ សម្រាប់ប្រកាសឯករាជ បង្កើតរដ្ឋអ៊ីស្ត្រាអែល នៅឆ្នាំ១៩៤៨។
នៅក្នុងស្មារតីនៃសេចក្តីប្រកាសនេះ គឺបានចែងយ៉ាងច្បាស់ថា ការបង្កើតផ្ទះជាតិមួយសម្រាប់ប្រជាជនជ្វីហ្វនោះ គឺមិនត្រូវឲ្យប៉ះពាល់សិទ្ធិជនស៊ីវិលរបស់ជាតិប៉ាឡេស្ទីននោះឡើយ។ ក៏ប៉ុន្តែ នៅទីបំផុត ប្រជាជនប៉ាឡេស្ទីន ប្រមាណជាង៧ម៉ឺន៥ពាន់នាក់ ត្រូវបានគេបណ្តេញចេញ។ ហើយរហូតមកទល់នឹងសព្វថ្ងៃ ប៉ាឡេស្ទីន នៅមិនទាន់មានការទទួលស្គាល់ថា ជាប្រទេសជាតិមួយនៅឡើយផង។
នៅអង់គ្លេសថ្ងៃទី១វិច្ឆិកាម្សិលមិញនេះ នាយករដ្ឋមន្ត្រីអ៊ីស្ត្រាអែល បានត្រូវទទួលឲ្យចូលរួមអបអរថ្ងៃខួបកំណើតប្រទេស ដោយលោកស្រីនាយករដ្ឋមន្ត្រីអង់គ្លេស Theresa May។ នាយករដ្ឋមន្ត្រី ប៊ែនយ៉ាងមែន ណែនតាន់យ៉ាហូ បានថ្លែងថា អ៊ីស្ត្រាអែល មិនអាចបង្កើតបានឡើង បើគ្មានការរួបរួមប្រគាកស្នាប្រយុទ្ធតស៊ូរបស់ពួកជ្វីហ្វ ក្នុងសង្គ្រាម៦ថ្ងៃ ឆ្នាំ១៩៦៧។
ក៏ប៉ុន្តែ នៅទីក្រុងឡុងដ៍នោះដែរ លោក Roderick Balfour ធនាគារិក អាយុ៦៨ ដែលត្រូវជាចៅទួត របស់លោកអតីតរដ្ឋមន្ត្រីការបរទេសអង់គ្លេស Athur Balfour បានសម្តែងក្តីសោកស្តាយចំពោះការអនុវត្តសេចក្តីប្រកាស Balfour នេះ។ លោកថាវាបានប៉ះពាល់ទៅដល់ប្រជាជាតិប៉ាឡេស្ទីន។
ចំពោះថ្នាក់ដឹកនាំ ប៉ាឡេស្ទីន វិញ បានលើកឡើងថា ប្រទេសអង់គ្លេស! ជំនួសឲ្យការប្រារព្ធខួបកំណើតនេះ អង់គ្លេសគួរតែកែប្រែកំហុស។ ពីចំណែកនាយករដ្ឋមន្ត្រីអង់គ្លេស Theresq May, លោកស្រីថា នៅមានកិច្ចច្រើនទៀត ដែលអង់គ្លេសត្រូវធ្វើ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ