ឥណ្ឌានិងអាហ្វហ្កានីស្ថានបើកសម្ពោធទំនប់វារីអគ្គិសនីមិត្តភាព តម្លៃ២៩០លានដុល្លារ
ឥណ្ឌានិងអាហ្វហ្កានីស្ថានបានបើកសម្ពោធទំនប់វារីសាល់ឡាម៉ា Salma នៅថ្ងៃសៅរ៍ម្សិលមិញ នៅក្រុង Hérat ភាគខាងលិចអាហ្វហ្កានីស្ថាន ក្រោមវត្តមានចូលរួមរបស់នាយករដ្ឋមន្ត្រីឥណ្ឌា លោក ណារិនដ្រា ម៉ូឌី និងប្រធានាធិបតីអាហ្វហ្កានីស្ថាន លោកអាស្រាហ្វ ហ្កានី។ ឥណ្ឌាចេញលុយ ២៩០លានដុល្លារ ទាំងស្រុងដើម្បីសង់ទំនប់វារីអគ្គិសនីមិត្តភាពនេះឡើង។ ទំនប់វារីអគ្គិសនីនេះនឹងផ្តល់អគ្គិសនីដល់ប្រជាជន២៤០ ០០០គ្រួសារក្នុងតំបន់។
ចុះផ្សាយនៅថ្ងៃ៖
ស្តាប់ - ០១:១២
ថ្ងៃសៅរ៍ម្សិលមិញ នាយករដ្ឋមន្ត្រីឥណ្ឌា បានចុះទៅសម្ពោធទំនប់វារីអគ្គសនីនេះផ្ទាល់ នៅក្រុងហេរ៉ា ភាគខាងលិចអាហ្វហ្កានីស្ថាន។ លោកណារិនដ្រា ម៉ូឌី លើកឡើងថា នេះជាជំហានដ៏ធំធេងរបស់អាហ្វហ្កានីស្ថាន ក្នុងដំណើរឆ្ពោះទៅរកការអភិវឌ្ឍន៍។
គម្រោងទំនប់វារីអគ្គិសនីមិត្តភាពរវាងឥណ្ឌានិងអាហ្វហ្កានីស្ថាន អាចហៅម្យ៉ាងទៀតថា ទំនប់សាល់ឡាម៉ា Salma មានតាំងពីទសវត្សឆ្នាំ១៩៧០ម្ល៉េះ ប៉ុន្តែដំណើរការសាងសង់យឺតយ៉ាវដោយសារតែសង្គ្រាមអូសបន្លាយរាប់ទសវត្ស។ ទំនប់វារីអគ្គិសនីនេះ នឹងផ្តល់អគ្គិសនីអោយប្រជាជនក្នុងតំបន់ ប្រមាណ២សែន៤ម៉ឺនគ្រួសារបានប្រើប្រាស់។ ទំនប់វារីអគ្គិសនីនេះក៏ចូលរួមស្រោចស្រពផ្ទៃដីប្រើប្រាស់ ៨០ ០០០ ហិចតាផងដែរ។
សង្គ្រាម៣៥ឆ្នាំមកនេះ បានបំផ្លាញហេដ្ឋារចនាសម្ព័ន្ធអាហ្វហ្កានីស្ថានធ្ងន់ធ្ងរ។ ឥណ្ឌាជាប្រទេសដ៏ធំមួយ ដែលចូលរួមកសាងអាហ្វហ្កានីស្ថានឡើងវិញ។ ទំនប់វារីអគ្គិសនីសាល់ឡាម៉ា គ្រាន់តែជាការចាប់ផ្តើមប៉ុណ្ណោះ សម្រាប់ឥណ្ឌា។ កាលពីខែឧសភាកន្លងទៅ ឥណ្ឌាបានចុះហត្ថលេខា ជាមួយអ៊ីរ៉ង់ និងអាហ្វហ្កានីស្ថាន លើកិច្ចព្រមព្រៀងអភិវឌ្ឍន៍កំពង់ផែអ៊ីរ៉ង់ ឆាបាហា ដើម្បីពង្រីកការផ្តោះប្តូរពាណិជ្ជកម្មរវាងប្រទេសទាំង៣៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ