កសិករឆ្នើមឆ្នាំ ២០១៣ លើកតម្កើងរបៀបធ្វើកសិកម្មរបស់ប្រជាជន
កម្មវិធីកសិករឆ្នើម ដែលគាំទ្រដោយអង្គការ USAID, ADB និង GIZ បានរៀបចំជាថ្មីម្តងទៀត នៅថ្ងៃទី ២៦មករា ឆ្នាំ នៅក្នុងខេត្តពោធិសាត់។ ជាកម្មវិធី ដែលបង្កើតឡើង ក្នុងគោលបំណង លើកកម្ពស់ការចិញ្ចឹមសត្វ និងការដាំដុះរបស់កសិករខ្មែរ តាមរយៈការប្រកួតប្រជែងរបៀបធ្វើកសិកម្មទាំងនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
នៅក្នុងខេត្តពោធិសាត់ កាលពីថ្ងៃទី ២៦មករា មានការរៀបចំកម្មវិធីប្រកួតប្រជែង របៀបចិញ្ចឹមសត្វ និងដាំដំណាំមួយ ដែលមានឈ្មោះថា កសិករឆ្នើម ឆ្នាំ ២០១៣។ ជាកម្មវិធី ដែលបង្កើតឡើង ក្នុងគោលបំណង លើកតំលៃកសិករខ្មែរ ដើម្បីឲ្យកសិករទាំងអស់បានមកជួបជុំគ្នា ចែករំលែកបទពិសោធន៍ ហើយយល់ដឹងពីរបៀបដាំដុះ និងការចិញ្ចឹមសត្វថ្មីៗ។ នេះបើតាមកញ្ញា នាង សុភីណា អ្នកគ្រប់គ្រងកម្មវិធីកសិករឆ្នើម ឆ្នាំ២០១៣នេះ។
កសិករចំនួន១៨១នាក់ បានមកប្រមូលផ្តុំគ្នា នៅសាលាគរុកោសល្យ ក្នុងទីរួមខេត្តពោធិសាត់ តាំងពីព្រឹកព្រលឹម។ បន្ទាប់មក បេក្ខជន ដែលជាកសិករទាំងនោះ បានស្តាប់ការណែនាំពីក្រុមអ្នកជំនាញ ពីរបៀបដាំដុះ ចិញ្ចឹមសត្វ និងការធ្វើជីកំប៉ុស។ ក្រោយមក អ្នកជំនាញ បានផ្តល់វេទិកា សំណួរ-ចម្លើយ ដល់អ្នកចូលរួម។ ចប់ពីការចែករំលែករបស់អ្នកជំនាញ កសិករត្រូវចាប់ផ្តើមប្រកួតប្រជែងសមត្ថភាពដាំដុះ និងចិញ្ចឹមសត្វ ដើម្បីចំរាញ់យកតែកសិករចំនួន ២៥នាក់ តែប៉ុណ្ណោះ ដែលទទួលបានជ័យលាភី ក្លាយជាកសិករឆ្នើម ឆ្នាំ ២០១៣នេះ។ ការជ្រើសរើសជ័យលាភី គឺក្រោមការដាក់ពិន្ទុ និងកាត់សេចក្តីពីគណៈកម្មការ ដែលមានជំនាញ និងបទពិសោធន៏ ក្នុងផ្នែកកសិកម្ម។ កសិករដែលបានទទួលជ័យលាភី ២៥នាក់ ក៏ត្រូវឡើងមកចែករំលែក បទពិសោធន៏របស់ពួកគេ បន្ទាប់ពីការប្រកាសលទ្ធផលផងដែរ។
កម្មវិធីនេះ ក៏មានការចូលរួម ពីលោក កុយ សុខា ប្រធានមន្ទីរកសិកម្ម នៅក្នុងខេត្តពោធិ៏សាត់ផងដែរ។ ចំពោះជ័យលាភី ទាំង២៥នាក់ ទទួលបានប្រាក់រង្វាន់ និងវត្ថុអនុស្សាវរីយ៏ ដែលសរុបមានទឹកប្រាក់ ៨ពាន់ដុល្លារអាមេរិក។
តាមកញ្ញា នាង សុភីណា កម្មវិធីកសិករឆ្នើម ឆ្នាំ២០១៣នេះ បានធ្វើឡើង ក្នុងខេត្តចំនួន ៣ ដែលរួមមានខេត្ត កំពង់ឆ្នាំង កំពង់ធំ និងខេត្តពោធិ៍សាត់។ កម្មវិធីនេះ នឹងនៅតែបន្តធ្វើនៅឆ្នាំ ២០១៤ទៀត ហើយក៏គ្រោងនឹងពង្រីក ទៅតាមបណ្តាខេត្តផ្សេងៗទៀតផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ