មន្ត្រីទូតបង់ក្លាដែស ៖ ភូមា ស្នើបង់ក្លាដែស កុំឲ្យផ្តល់ជំនួយដល់ជនជាតិរ៉ូហ៊ីងយ៉ា នៅតាមព្រំដែន
ថ្នាក់ដឹកនាំភូមា បានស្នើសុំបង់ក្លាដែស ឲ្យបញ្ឈប់ការផ្តល់ជំនួយមនុស្សធម៌ដល់ជនជាតិរ៉ូហ៊ីងយ៉ា នៅតាមបណ្តោយព្រំដែន។ ដំណឹងនេះ ធ្លាយចេញពី មន្ត្រីការទូតរបស់បង់ក្លាដែស ដែលបានប្រាប់អ្នកកាសែតនៅចុងសប្តាហ៍កន្លងទៅនេះ ក្រោយពីបានជួបប្រជុំជាមួយមន្ត្រីទូតជាន់ខ្ពស់របស់ភូមា នៅទីក្រុងណៃពិដោរ ។
ចុះផ្សាយនៅថ្ងៃ៖ កែប្រែថ្ងៃទី៖
មន្ត្រីការទូតជាន់ខ្ពស់របស់បង់ក្លាដែស បានឲ្យដឹងថា ថ្នាក់ដឹកនាំភូមា បានស្នើកុំឲ្យបង់ក្លាដែស បន្តផ្តល់ជំនួយមនុស្សធម៌ ដល់ជនជាតិរ៉ូហ៊ីងយ៉ា ប្រមាណជា ៦ ពាន់នាក់ ដែលជ្រកខ្លួន ក្នុងជំរំព្រំដែន”តំបន់ស” នៃប្រទេសទាំងពីរតទៅទៀត។ ថ្នាក់ដឹកនាំភូមា ចង់ឲ្យមានការផ្តល់ជំនួយមនុស្សធម៌ ចេញពីភូមាប្រទេសរបស់ខ្លួនវិញ។
ក៏ប៉ុន្តែ តំណាងក្រុមជនភៀសខ្លួនរ៉ូហ៊ីងយ៉ា ដែលកំពុងរស់នៅក្នុងជំរំនោះ បានប្រាប់អ្នកកាសែតបារាំងAFP ថា “ប្រសិនបើបង់ក្លាដែសឈប់ជួយជនជាតិរ៉ូហ៊ីងយ៉ា ពួកគេនឹងជួបបញ្ហាធំជាមិនខាន។ ពីព្រោះ ពួកគេមិនជឿជាក់លើអាជ្ញាធរភូមាឡើយ ហើយក៏មិនប្រាកដទេថានឹងអាចទទួលជំនួញពីភូមាបានពិតមែនឬយ៉ាងណា។”
នៅពេលនេះ គេនៅមិនទាន់មានប្រតិកម្មជាជំហរផ្លូវការរបស់រដ្ឋអំណាចបង់ក្លាដែសនៅឡើយទេ។ សូមជ្រាបថា រដ្ឋអំណាចភូមា បានធ្វើទុក្ខបុកម្នេញពលរដ្ឋរ៉ូហ៊ីងយ៉ាងខ្លាំង។ សព្វថ្ងៃនេះ រ៉ូហ៊ីងយ៉ា មិនតិចជាង៣០ម៉ឺននាក់ទេ ដែលបានរត់ភៀសខ្លួន ចូលទៅនៅជំរំងក្នុងទឹកដីបង់ក្លាដែស។
គួររម្លឹកជូនដែរថា កាលខែសីហា ឆ្នាំ២០១៧ អាជ្ញាធរភូមា បានបើកយុទ្ធនាការវាយប្រហារទ្រង់ទ្រាយធំ ទៅលើពលរដ្ឋរ៉ូហ៊ីងយ៉ា នៅរដ្ឋរ៉ាក់ឃីន ហើយបានធ្វើឲ្យពលរដ្ឋរ៉ូហ៊ីងយ៉ា ជាង ៧០០ ០០០នាក់ ត្រូវបង្ខំចិត្តភៀសខ្លួន រត់ចោលទីជម្រក។ របាយការណ៍ស្តីពីសិទ្ធិមនុស្សថ្មីៗនេះ បានបញ្ជាក់ថា យុទ្ធនាការនេះ មិនមែនជាប្រតិបត្តិការធ្វើឡើងដោយចៃដន្យទេ តែជាគម្រោងផែនការដែលរដ្ឋអំណាចភូមាបានរៀបចំអស់រយៈពេលជាច្រើនសប្តាហ៍រហូតដល់ច្រើនខែទៀតផង។
ចំណែក អង្គការសិទ្ធិមនុស្ស Amnesty International ក៏បានអំពាវវនាវឲ្យ ក្រុមប្រឹក្សាសន្តិសុខអង្គការសហប្រជាជាតិ លើកយកសំណុំរឿងមួយនេះ ទៅពិចារណា ហើយត្រូវអូស ក មេបញ្ជាការកងទ័ពដ៏គ្រាក់ៗរបស់ភូមា ទៅជំនុំជម្រះក្តី នៅតុលាការព្រហ្មទណ្ឌអន្តរជាតិ ក្រុងឡាអេ។ ក៏ប៉ុន្តែ រដ្ឋាភិបាលភូមា បានបដិសេធមិនសហការជាមួយតុលាការព្រហ្មទណ្ឌអន្តរជាតិ ហើយបានរិះគន់និងចោទប្រកាន់ប្រឆាំងស្ថាប័នតុលាការអន្តរជាតិនេះថា គ្មានតម្លាភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ