នាយករដ្ឋមន្ត្រីអង់គ្លេស ប្តេជ្ញាសើរើប្រព័ន្ធដាក់ទោសចំពោះបទល្មើសភេរវកម្ម
មួយថ្ងៃក្រោយភេរវកម្មវាយប្រហារដោយកាំបិត នៅកណ្តាលក្រុងឡុងឌ្រឺ លោក Boris Johnson នាយករដ្ឋមន្ត្រីអង់គ្លេសដែលបានចុះទៅដល់កន្លែងកើតហេតុដោយផ្ទាល់ បានប្រកាសជាសាធារណថា ប្រព័ន្ធលើកលែងទោសនិងបន្ធូរបន្ថយទោសរបស់អង់គ្លេស ត្រូវតែពិនិត្យសើរើមើលឡើងវិញ ហើយនិងត្រូវកម្រិតទោសធ្ងន់ធ្ងរបំផុត ចំពោះបទល្មើសភេរវកម្ម។ ការប្តេជ្ញារបស់ប្រមុខរដ្ឋាភិបាលអង់គ្លេសយ៉ាងដូច្នេះ គឺក្រោយពេលដែលខ្មាន់កាំបិតម្នាក់ ជាអតីតអ្នកទោសនិងត្រូវដោះលែងឱ្យរស់នៅក្រៅឃុំ ហើយបែរជាយកកំាំបិតដើរចាក់មនុស្ស ស្លាប់ពីរនាក់ និងរបួសបីនាក់ កាលពីថ្ងៃសុក្រទី២៩វិច្ឆិកា កន្លងទៅនេះ។
ចុះផ្សាយនៅថ្ងៃ៖
ស្តាប់ - ០២:០២
នាពេលកន្លងមក តាមច្បាប់ទម្លាប់ របស់អង់គ្លេស ចំពោះពិរុទ្ធជនដែលត្រូវកាត់ទោសឱ្យជាប់ពន្ធនាគារ និងបានអនុវត្តទោសជាច្រើនឆ្នាំនៅគុករួចមកហើយនេះ គឺអាចត្រូវបានទទួលការបន្ធូរបន្ថយទោសខ្លះ រហូតដល់អនុញ្ញាតដោះលែងឱ្យរស់នៅក្រៅឃុំផង ដោយត្រូវឋិតក្នុងលក្ខខណ្ឌតាមដានត្រួតពិនិត្យជាបន្តរបស់សមត្ថកិច្ច។ ទម្លាប់នេះ បានត្រូវអនុវត្តជាស្វ័យប្រវត្តិយូរមកហើយ។ រឿងនេះ ក៏ស្ថិតនៅក្នុងករណីរបស់ខ្មាន់កាំបិត Usman Khan ដែលចាក់មនុស្សស្លាប់ កាលពីថ្ងៃសុក្រទី២៩វិច្ឆិកា។ រូបគេត្រូវតុលាការអង់គ្លេស បានកាត់ទោសឱ្យជាប់ឃុំ ចំនួន១៦ឆ្នាំ កាលពីឆ្នាំ២០១២ ពីបទល្មើសចូលរួមសកម្មភាពភេរវកម្ម ប្រុងបំផ្ទុះគ្រាប់បែក ប៉ុន្តែទទួលទោសក្នុងមន្ទីរឃុំឃាំងបានត្រឹមតែ៦ឆ្នាំប៉ុណ្ណោះ យុវជនដែលមានពុកមាត់ស្រមូម Usman Khan ក៏បានត្រូវដោះលែងឱ្យមានសេរីភាពបណ្តោះអាសន្ន កាលពីឆ្នាំទៅមិញនេះ ហើយរូបគេក៏បានប្រព្រឹត្តសកម្មភាពសម្លាប់មនុស្សជាថ្មី។
តាមរយៈករណីជាក់ស្តែងមួយនេះ នាយករដ្ឋមន្ត្រីអង់គ្លេស បានរិះគន់ប្រព័ន្ធច្បាប់ទម្លាប់អង់គ្លេស ក្នុងការបន្ធូរបន្ថយទោសយ៉ាងដូច្នេះ។ លោក Boris Johnson ប្រកាសជាឱឡារិកថា អតីតជនល្មើសណា ដែលជាប់ពាក់ព័ន្ធនឹងបទឧក្រិដ្ឋធ្ងន់ធ្ងរ និងជាពិសេសបទល្មើសភេរវជកម្មតែម្តង និងដែលបានត្រូវដោះលែងឱ្យនៅក្រៅឃុំរួចហើយ គឺនឹងត្រូវពិនិត្យសើរើមើលឡើងវិញ។ ម្យ៉ាងវិញទៀត ចំពោះករណីដាក់ទោសចំពោះបទល្មើសភេរវកម្ម និងបទល្មើសឧក្រិដ្ឋហិង្សាធ្ងន់ធ្ងរ គឺត្រូវតែមានការកម្រិតទោសទណ្ឌឱ្យធ្ងន់បំផុត ឬក៏ត្រូវដាក់ទោសអស់មួយជីវិតតែម្តង បើអាចធ្វើទៅបាន។ បើតាមនាយករដ្ឋមន្ត្រីអង់គ្លេស ការធ្វើដូច្នេះ គឺដើម្បីការពារសុវត្ថិភាពរបស់សាធារណជនផ្សេងៗទៀត។ លោក Boris Johnson ក៏សម្រេចថា គណបក្សអភិរក្សនិយមរបស់លោក នឹងយករឿងនេះ ជាគោលនយោបាយមួយ ជាកិច្ចសន្យាមួយ សម្រាប់ការបោះឆ្នោតសភាអង់គ្លេស នាប៉ុន្មានថ្ងៃខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ