ការបោះឆ្នោតទម្លាក់ប្រធានាធិបតីប្រេស៊ីលបង្កឲ្យមានវិបត្តិការទូតក្នុងតំបន់
លោកស្រី ឌីលម៉ា រូសេហ្វ ប្រធានាធិបតីប្រេស៊ីល ត្រូវបានសភាបោះឆ្នោតទម្លាក់ពីតំណែង កាលពីថ្ងៃពុធម្សិលមិញ។ ដំណើរការនីតិវិធីដែលបានអូសបន្លាយពេលជាច្រើនខែត្រូវបិទបញ្ចប់ ក៏ប៉ុន្តែ វិបត្តិនយោបាយប្រេស៊ីលនៅតែបន្តកើតមាន ហើយបន្ថែមពីលើនេះទៅទៀត ការបោះឆ្នោតទម្លាក់លោកស្រី ឌីលម៉ា រូសេហ្វ ក៏កំពុងតែបង្កឲ្យមានវិបត្តិការទូត នៅក្នុងតំបន់ផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
ការបោះឆ្នោតទម្លាក់លោកស្រី ឌីលម៉ា រូសេហ្វ កាលពីថ្ងៃពុធ គឺជាការបិទបញ្ចប់ការកាន់អំណាចរយៈពេល ១៣ឆ្នាំ នៃគណបក្សពលករប្រេស៊ីល ដែលជាទូទៅមានទំនាក់ទំនងយ៉ាងជិតស្និទ្ធជាមួយនឹងប្រទេសវេណេស៊ុយអេឡា បូលីវី និងអេក្វាទ័រ ដែលសុទ្ធសឹងជាប្រទេសដឹកនាំដោយគណបក្សឆ្វេងនិយម។
ភ្លាមៗក្រោយពីសភាបោះឆ្នោតទម្លាក់លោកស្រី ឌីលម៉ា រូសេហ្វ រដ្ឋាភិបាលវេណេស៊ុយអេឡា បូលីវី និងអេក្វាទ័រ បាននាំគ្នាប្រកាសដកទូតរបស់ខ្លួនចេញពីប្រទេសប្រេស៊ីល។
លោកប្រធានាធិបតីវេណេស៊ុយអេឡា គឺលោកនីកូឡា ម៉ាឌូរ៉ូ បានធ្វើសេចក្តីប្រកាសតាមទូរទស្សន៍ថា អ្វីដែលបានកើតឡើងនៅប្រេស៊ីល គឺជា “ការធ្វើរដ្ឋប្រហារ ដែលមិនមែនសំដៅតែទៅលើលោកស្រីឌីលម៉ា រូសេហ្វប៉ុណ្ណោះទេ តែជាការធ្វើសំដៅប្រឆាំងនឹងចលនាឆ្វេងនិយមនៅក្នុងតំបន់ការ៉ាអ៊ីបទាំងមូល”។ សម្រាប់រដ្ឋាភិបាលវេណេស៊ុយអេឡា អ្វីដែលកើតឡើងនៅប្រេស៊ីលនេះ គឺជាស្នាដៃរបស់សហរដ្ឋអាមេរិក។
ឆ្លើយតបមកវិញ រដ្ឋាភិបាលប្រេស៊ីលក៏បានប្រកាសដកទូតរបស់ខ្លួនចេញពីប្រទេសទាំងបីខាងលើនេះដែរ ហើយរដ្ឋមន្រ្តីការបរទេសប្រេស៊ីលបានធ្វើការបរិហាបកទៅលើវេណេស៊ុយអេឡាវិញថា រដ្ឋាភិបាលវេណេស៊ុយអេឡាបច្ចុប្បន្ននេះមិនស័ក្តិសមនឹងនិយាយរិះគន់ពីដំណើរការប្រជាធិបតេយ្យនៅប្រេស៊ីលនោះទេ ក្នុងពេលដែលខ្លួនឯងមិនមែនជារបបប្រជាធិបតេយ្យផងនោះ។
គួរបញ្ជាក់ថា នៅក្នុងពេលដែលវេណេស៊ុយអេឡា បូលីវី និងអេក្វាទ័រ ចេញមុខតវ៉ាចំពោះការដកតំណែងលោកស្រី ឌីលម៉ា រូសេហ្វ រដ្ឋាភិបាលនៅក្នុងប្រទេសមួយចំនួនផ្សេងទៀត នៅក្នុងតំបន់អាមេរិកឡាទីន រួមមានដូចជា អាហ្សង់ទីន ស្ហ៊ីលី និងប៉ារ៉ាហ្កាយ ជាដើម សុទ្ធតែបាននាំគ្នាលើកឡើងថា “ពួកគេគោរពសេចក្តីសម្រេចរបស់សភាប្រេស៊ីល” ព្រមទាំងបាន “បង្ហាញនូវការជឿជាក់ថា ប្រេស៊ីលនឹងអាចដោះស្រាយវិបត្តិនយោបាយបច្ចុប្បន្ន តាមរយៈស្ថាប័ន និងដំណើរការប្រជាធិបតេយ្យរបស់ខ្លួន”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ