ប្រជាជនអង់គ្លេសបោះឆ្នោតសម្រេចថា បន្តនៅរឺដើរចេញពីសហភាពអឺរ៉ុប?
ចុះផ្សាយនៅថ្ងៃ៖
ស្តាប់ - ០៤:១៤
នៅថ្ងៃព្រហស្បតិ៍២៣មិថុនានេះ ប្រជាជនអង់គ្លេសនាំគ្នាបោះឆ្នោតដើម្បីសម្រេចថា តើអង់គ្លេសត្រូវបន្តនៅជាសមាជិកអឺរ៉ុប រឺក៏ត្រូវដើរចេញពីអឺរ៉ុប ? ការិយាល័យបោះឆ្នោតបានបើកទ្វារតាំងពីម៉ោង ៧ព្រឹក។ តួលេខអ្នកចុះឈ្មោះបោះឆ្នោត មានកម្រិតខ្ពស់ រហូតដល់៤៦លាន៥សែននាក់។ នាយករដ្ឋមន្ត្រីអង់គ្លេស ដាវីត ខាមេរូន ដែលគាំទ្រអោយអង់គ្លេសអោយបន្តនៅជាសមាជិកអឺរ៉ុប បានបោះឆ្នោតរួចហើយ តាំងពីព្រឹកមក។
យោងតាមការស្ទាបស្ទង់មតិចុងក្រោយ តួលេខក្រុមគាំទ្រអោយអង់គ្លេសនៅជាសមាជិកអឺរ៉ុប និងក្រុមអ្នកចង់ដើរចេញ មានកម្រិតប្រហាក់ប្រហែលគ្នា ដែលពិបាកអោយគេទាយទុកមុនថា តើខាងក្រុមណានឹងទទួលជោគជ័យ។ លទ្ធផលបោះឆ្នោតអាចនឹងត្រូវបានដឹងនៅយប់ថ្ងៃព្រហស្បតិ៍នេះ យ៉ាងយូរព្រឹកថ្ងៃសុក្រស្អែក។
ប្រជាមតិថ្ងៃនេះ សំខាន់ណាស់សម្រាប់សហភាពអឺរ៉ុប ព្រោះអង់គ្លេសអាចនឹងក្លាយជាប្រទេសទី១ ដែលដកខ្លួនចេញពីអឺរ៉ុប។ ហើយប្រទេសផ្សេងៗទៀត អាចនឹងយកគំរូតាមអង់គ្លេស ដើម្បីរៀបចំប្រជាមតិដកខ្លួនចេញពីអឺរ៉ុបដូចគ្នា។ ប្រធានគណៈកម្មការអឺរ៉ុប លោកJean Claude Junckerបានព្រមានអ្នកនយោបាយនិងពលរដ្ឋអង់គ្លេសថា ករណីអង់គ្លេសដើរចេញពីអឺរ៉ុប នោះគ្មានការចរចាបែបថ្មីអ្វី រវាងសហភាពអឺរ៉ុបនិងអង់គ្លេសទេ។
ដើមហេតុដំបូងនៃការបោះឆ្នោតប្រជាមតិថ្ងៃនេះ
គេនៅចាំបានថា អង់គ្លេសដើមឡើយសម្លឹងប្រយោជន៍សេដ្ឋកិច្ចអឺរ៉ុប បានអង្វរកអឺរ៉ុបសព្វបែបសព្វយ៉ាង ទំរាំអឺរ៉ុបព្រមអោយអង់គ្លេសធ្វើជាសមាជិកខ្លួន នៅឆ្នាំ១៩៧៣។
ទិសដៅនៃប្រជាមតិថ្ងៃនេះ ដំបូងឡើយ មិនបានបញ្ចូលន័យថា អោយអង់គ្លេសដើរចេញពីសហភាពអឺរ៉ុបទេ។ ដំបូងឡើយ ប្រជាមតិនេះ គឺគ្រោងធ្វើដើម្បីអោយលោកដាវីត ខាមេរូន អាចពង្រឹងជំហរអង់គ្លេស អោយកាន់តែខ្លាំង នៅសហភាពអឺរ៉ុបប៉ុណ្ណោះ។ ទិសដៅនេះមាន តាំងពីរបបដឹកនាំរបស់អតីតនាយករដ្ឋមន្ត្រី បក្សការងារ Tony Blair ម្ល៉េះ។ កាលពីឆ្នាំ២០០៤ លោកTony Blair ចង់អោយអង់គ្លេសបោះឆ្នោតលើសន្ធិសញ្ញាទាកទងរដ្ឋធម្មនុញ្ញអឺរ៉ុប។
កាលនោះ លោកTony Blair មើលឃើញថា តាំងពីចូលជាសមាជិកអឺរ៉ុបមក ពលរដ្ឋអង់គ្លេសពុំដែលបានបញ្ចេញមតិយោបល់ទាក់ទងនឹងអឺរ៉ុបនៅឡើយទេ។ ដូច្នេះ លោកBlair ចង់អោយអង់គ្លេសគូសបញ្ជាក់ឡើងវិញនូវជំហរខ្លួនក្នុងសហភាពអឺរ៉ុប។ តាំងពីពេលនោះមក ក្រុមប្រឆាំងនយោបាយអឺរ៉ុបនៅបក្សអភិរក្សបានឆ្លៀតទាមទារអោយមានការសួរយោបល់ ពីប្រជាជនសិន។
នៅឆ្នាំ២០១០ លោកខាមេរូន ក្នុងពេលកំពុងឃោសនាបោះឆ្នោត បានសន្យាថា រាល់ការកែប្រែសន្ធិសញ្ញាអឺរ៉ុប ត្រូវតែឆ្លងកាត់ប្រជាមតិសិន។ លោកខាមេរូនបានជាប់ឆ្នោតដូចបំណង។ ប៉ុន្តែ ក្រោយពេលជាប់ឆ្នោត លោកបានប្រឈមមុខខ្លាំងជាមួយក្រុមប្រឆាំងនយោបាយអឺរ៉ុប ក្នុងបក្សអភិរក្សរបស់លោក។
ច្រើនឆ្នាំមកនេះ សហភាពអឺរ៉ុបជួបបញ្ហាច្រើនយ៉ាង ដូចជាបញ្ហាជនគ្មានការងារធ្វើ វិបត្តិជនភៀសខ្លួន បញ្ហាភេរវកម្ម។ ក្រុមប្រឆាំងនយោបាយអឺរ៉ុបបានឆ្លៀតពេលនេះ ឃោសនាអោយប្រជាជនបោះឆ្នោតអោយអង់គ្លេសដើរចេញពីអឺរ៉ុប។ ក្រុមប្រឆាំងអឺរ៉ុបឃោសនាថា ពេលស្ថិតនៅក្រៅសហភាពអឺរ៉ុប អង់គ្លេសអាចនឹងយកកៅអីខ្លួន នៅអង្គការពាណិជ្ជកម្មពិភពលោកបានមកវិញ ហើយអាចធ្វើពាណិជ្ជកម្មផ្ទាល់តែម្តង ជាមួយប្រទេសធំៗ ដូចជាចិន ឥណ្ឌា រឺក៏ប្រទេសផ្សេងទៀត នៅអាស៊ីនិងអាមេរិកឡាទីន។ ។ ការឃោសនានេះហាក់មានប្រសិទ្ធភាព។ ជាក់ស្តែង ការស្ទាបស្ទង់មតិចុងក្រោយបង្ហាញថា សម្លេងអ្នកគាំទ្រ និងអ្នកមិនគាំទ្រ មានប្រហាក់ប្រហែលគ្នា។
ពេលនេះ អង់គ្លេសហាក់បានងាកក្បាលពីទិសដៅដើមដំបូងនៃប្រជាមតិ។ ពោលគឺជាជាងអោយពលរដ្ឋគាំទ្រ អោយអង់គ្លេសពង្រឹងជំហរអោយកាន់តែខ្លាំងនៅអឺរ៉ុប អង់គ្លេសបែរជាអាចនឹងដើរចេញពីអឺរ៉ុបទៅវិញ។
បើលទ្ធផលបង្ហាញថា អង់គ្លេសត្រូវចេញពីអឺរ៉ុប បន្ទាប់ពីនេះ ផ្អែកតាមមាត្រា៥០នៃសន្ធិសញ្ញាក្រុងលីស្បូន អង់គ្លេសត្រូវជូនដំណឹងអឺរ៉ុប ថាខ្លួនចង់ដកខ្លួនចេញពីសមាជិកអឺរ៉ុប។ ការចរចាលើដំណើរការដកខ្លួនពីអឺរ៉ុបនេះ អាចប្រើពេលជាង២ឆ្នាំឯណោះ។
លោកខាមេរូន ចង់បន្តធ្វើជានាយករដ្ឋមន្ត្រី ក្រោយការប្រកាសលទ្ធផលឆ្នោត
កន្លងមក លោកខាមេរូនធ្លាប់ប្រាប់ថា លោកនឹងនៅតែធ្វើជានាយករដ្ឋមន្ត្រី ព្រោះការបោះឆ្នោតនេះមិនទាក់ទងនឹងលក្ខណៈបុគ្គលផ្ទាល់ខ្លួនលោក ដែលគាំទ្រនយោបាយអឺរ៉ុបទេ។ ទោះយ៉ាងនេះក្តី សមាជិកបក្សអភិរក្សច្រើនរូបអាចនឹងទាមទារអោយលោកចុះពីអំណាច។ ហើយសភាក៏អាចបោះឆ្នោតដកទំនុកចិត្តពីលោកដែរ។ សភាត្រូវការឆ្នោតតែ៥០សម្លេងប៉ុណ្ណោះ ដើម្បីដកទំនុកចិត្តពីនាយករដ្ឋមន្ត្រី។
មេដឹកនាំអឺរ៉ុបខ្លាចប្រទេសផ្សេងៗយកគំរូតាមអង់គ្លេស
ដូចយើងធ្លាប់ដឹងរួចហើយថា ការដកខ្លួនពីអឺរ៉ុបធ្វើអោយអង់គ្លេសខាតប្រយោជន៍សេដ្ឋកិច្ចដែលខ្លួនធ្លាប់ទទួលពីអឺរ៉ុប។ ហើយអឺរ៉ុបក៏ដូចគ្នា។ រឿងនេះវាជាបញ្ហាសំខាន់មួយហើយ។ អ្វីដែលសំខាន់លើសពីនេះ គឺមេដឹកនាំអឺរ៉ុបធំៗ ខ្លាចថា ប្រទេសអឺរ៉ុបផ្សេងទៀត អាចយកគំរូតាមអង់គ្លេស ដោយធ្វើប្រជាមតិដកខ្លួនពីអឺរ៉ុបដូចគ្នា។ បែបយ៉ាង នៅប្រទេសដូចជាដាណឺម៉ាក ហូឡង់ រឺក៏ស៊ុយអែត ក្រុមប្រឆាំងនយោបាយអឺរ៉ុបចង់អោយមានប្រជាមតិដូចគ្នា។ នៅបារាំងវិញ បក្សស្តាំនិយមជ្រុលរបស់លោកស្រីឡឺពេន ក៏ចង់អោយមានប្រជាមតិដូចគ្នា។ បើប្រទេសអឺរ៉ុបទាំងនេះដើរចេញពីអឺរ៉ុប អឺរ៉ុបនឹងកាន់តែចុះខ្សោយ។
ងាកមកនិយាយពីផលវិបាកស្រដៀងគ្នានៅអង់គ្លេសវិញ បើថ្ងៃនេះ ពលរដ្ឋអង់គ្លេសសម្រេចចិត្តអោយអង់គ្លេសដើរចចេញពីអឺរ៉ុប ប្រជាជនអេកូសក៏អាចធ្វើប្រជាមតិទាមទារឯករាជ្យពីអង់គ្លេសបានដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ