ទស្សនកិច្ចជាប្រវត្តិសាស្រ្តរបស់នាយករដ្ឋមន្រ្តីអង់គ្លេសនៅភូមា
ចុះផ្សាយនៅថ្ងៃ៖
ស្តាប់ - ០៣:២១
លោក David Cameron នាយករដ្ឋមន្រ្តីអង់គ្លេស បានទៅដល់ប្រទេសភូមា នៅថ្ងៃសុក្រ ១៣ មេសា ២០១២នេះ ក្នុងដំណើរទស្សនកិច្ចផ្លូវរដ្ឋ រយៈពេល ១ថ្ងៃ។ នៅពេលនេះ អង់គ្លេស និងសហភាពអឺរ៉ុបនៅមិនទាន់បានដកទណ្ឌកម្មចេញពីភូមាទាំងស្រុងនៅឡើយទេ ក៏ប៉ុន្តែ មានប្រមុខដឹកនាំក្រុមហ៊ុនអង់គ្លេសជាច្រើនរូប បានរួមដំណើរជាមួយលោក Cameron ទៅប្រទេសភូមា នៅក្នុងអំឡុងទស្សនកិច្ចនេះ។
នៅក្នុងមួយរយៈកាលចុងក្រោយនេះ នៅក្រោយពេលដែលរបបសឹកភូមាបានសុខចិត្តរៀបចំធ្វើកំណែទម្រង់នយោបាយ គេសង្កេតឃើញមានមេដឹកនាំលោកខាងលិចជាច្រើនរូប បាននាំគ្នាទៅបំពេញទស្សនកិច្ចជាបន្តបន្ទាប់ នៅភូមា ក្នុងនោះ ក៏រួមមាន រដ្ឋមន្រ្តីការបរទេសអាមេរិក និងរដ្ឋមន្រ្តីការបរទេសអង់គ្លេសផងដែរ។
ក៏ប៉ុន្តែ ដំណើរទស្សនកិច្ចរបស់លោក David Cameron គឺជាដំណើរទស្សនកិច្ចលើកដំបូងបង្អស់របស់ប្រមុខរដ្ឋាភិបាលលោកខាងលិច ចាប់តាំងពីរបបសឹកចូលកាន់អំណាច កាលពីឆ្នាំ១៩៦២មក។ ម្យ៉ាងវិញទៀត លោក David Cameron គឺជានាយករដ្ឋមន្រ្តីអង់គ្លេស លើកដំបូងបង្អស់ ដែលទៅបំពេញទស្សនកិច្ច នៅភូមា ចាប់តាំងពីអង់គ្លេសប្រគល់ឯករាជ្យឲ្យទៅភូមា កាលពីឆ្នាំ១៩៤៨។
ក្រោយពីបានជួបជាមួយលោកប្រធានាធិបតី ថេន សេន លោក David Cameron គ្រោងនឹងជួបជាមួយលោកស្រីអ៊ុង សាន ស៊ូជី នៅរសៀលថ្ងៃសុក្រនេះ។
កន្លងមក គេសង្កេតឃើញថា អង់គ្លេស ដែលធ្លាប់ដាក់អាណានិគមលើភូមា តែងតែប្រកាន់ជំហរតឹងរ៉ឹងជាងគេ ចំពោះការដាក់ទណ្ឌកម្មលើរបបសឹកភូមា។ ក៏ប៉ុន្តែ នៅពេលនេះ អង់គ្លេសហាក់ដូចជាកំពុងតែផ្លាស់ប្តូរជំហរទាក់ទងនឹងបញ្ហានេះ។
មុនពេលមកដល់ភូមា លោក David Cameron បានលើកសរសើរអំពីភាពក្លាហានរបស់មេដឹកនាំភូមាក្នុងការរៀបចំធ្វើកំណែទម្រង់។ ក្នុងពេលជាមួយគ្នា លោកក៏បានលើកសរសើរលោកស្រី អ៊ុង សានស៊ូជី ដែលជាមេដឹកនាំប្រឆាំងដ៏ល្បីល្បាញរបស់ភូមាផងដែរ។
កាលពីថ្ងៃព្រហស្បតិ៍ ក្នុងអំឡុងពេលបំពេញទស្សនកិច្ចនៅក្នុងប្រទេសម៉ាឡេស៊ី លោកនាយករដ្ឋមន្រ្តីអង់គ្លេសបានថ្លែងថា លោកនឹងជំរុញឲ្យសហភាពអឺរ៉ុបបន្ធូរបន្ថយទណ្ឌកម្មលើភូមា ប្រសិនបើក្នុងពេលបំពេញទស្សនកិច្ច នៅភូមា លោកពិនិត្យឃើញថា កំណែទម្រង់នៅភូមាពិតជាដំណើរការទៅមុខដោយមិនបែរក្រោយវិញមែន។
នៅពេលនេះ សហភាពអឺរ៉ុបកំពុងពិចារណាថា តើត្រូវបន្ធូរបន្ថយទណ្ឌកម្មលើភូមាដែរឬទេ? ហើយបើបន្ធូរបន្ថយ តើត្រូវបន្ធូរបន្ថយត្រឹមកម្រិតណា? រដ្ឋមន្រ្តីការបរទេសសហភាពអឺរ៉ុបគ្រោងនឹងប្រជុំសម្រេចជុំវិញបញ្ហានេះ នៅថ្ងៃទី២៣ មេសាខាងមុខ។
គួរបញ្ជាក់ថា ទណ្ឌកម្មរបស់សហភាពអឺរ៉ុបទៅលើភូមា រួមមាន ដូចជា ការផ្អាប់ទ្រព្យរបស់មេដឹកនាំភូមា ការហាមឃាត់មិនឲ្យលក់អាវុធទៅភូមា ការហាមឃាត់ការធ្វើវិនិយោគ ឬការធ្វើជំនួញជាមួយភូមា ក្នុងវិស័យរ៉ែ ព្រៃឈើ ។ល។
គេមិនរំពឹងថា សហភាពអឺរ៉ុបនឹងដកទណ្ឌកម្មទាំងអស់នេះពីភូមា ក្នុងពេលតែមួយនោះទេ។ យុទ្ធសាស្រ្តរបស់អឺរ៉ុប ក៏ដូចជា អាមេរិកដែរ គឺចង់បន្ធូរបន្ថយទណ្ឌកម្មមួយផ្នែក ដើម្បីលើកទឹកចិត្តដល់រដ្ឋាភិបាលភូមា ក្នុងការធ្វើកំណែទម្រង់កន្លងមក ក៏ប៉ុន្តែ ចង់រក្សាទុកទណ្ឌកម្មខ្លះ ដើម្បីជំរុញឲ្យភូមាបន្តធ្វើកំណែទម្រង់តទៅមុខទៀត។
ក្រៅពីចង់លើកទឹកចិត្តដល់កំណែទម្រង់ភូមា ប្រទេសលោកខាងលិចក៏កំពុងតែសម្លឹងឃើញផងដែរពីផលប្រយោជន៍នៅភូមា ជាពិសេស ធនធានធម្មជាតិ ដូចជា ប្រេង ឧស្ម័នធម្មជាតិ រ៉ែ ត្បូងមានតម្លៃ និងព្រៃឈើ ជាដើម។ ក្រុមហ៊ុនធំៗរបស់ប្រទេសលោកខាងលិច កំពុងតែបារម្ភថា ឱកាសរកស៊ី នៅភូមា នឹងត្រូវធ្លាក់ក្នុងដៃគូប្រជែងនៅអាស៊ី ដូចជា ក្រុមហ៊ុនចិន ឥណ្ឌា ជប៉ុន ថៃ និងកូរ៉េខាងត្បូង ជាដើម ដែលកំពុងតែចាក់ឫសកាន់តែរឹងមាំឡើង នៅភូមា ក្នុងពេលដែលប្រទេសលោកខាងលិចបន្តដាក់ទណ្ឌកម្មហាមមិនឲ្យក្រុមហ៊ុនរបស់ខ្លួនមករកស៊ី នៅភូមា។
នៅក្នុងអំឡុងដំណើរទស្សនកិច្ចរបស់ David Cameron នៅភូមា នៅថ្ងៃនេះ គេក៏ឃើញមានអ្នកជំនួញអង់គ្លេសជាច្រើនរូបអមដំណើរជាមួយដែរ។ ក៏ប៉ុន្តែ អ្នកជំនួញទាំងនេះមិនអាចធ្វើការរកស៊ីនៅភូមាបានទេ ដោយសារតែមានទណ្ឌកម្មរបស់រដ្ឋាភិបាលអង់គ្លេស និងរបស់សហភាពអឺរ៉ុបលើភូមា។ កាសែតអង់គ្លេស The Guardian ដែលបានដកស្រង់សម្តីមន្រ្តីរដ្ឋាភិបាលអង់គ្លេស បានផ្សាយឲ្យដឹងថា អ្នកជំនួញអង់គ្លេស ដែលអមដំណើរនាយករដ្ឋមន្រ្តី ទៅភូមានេះ គឺទៅក្នុងឋានៈជា “អ្នកទេសចរ” ប៉ុណ្ណោះ មិនមែនក្នុងគោលដៅធ្វើជំនួញនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ