ភេរវកម្មនៅបួរគីណា ហ្វាសូ៖ ស្លាប់មនុស្សជិត៣០នាក់
ស្លាប់មនុស្ស ជិត៣០នាក់ និងរបួសប្រមាណ៨០នាក់ ដោយសារការវាយប្រហារភេរវកម្ម ចំនួន២ នៅប្រទេសបួរគីណា ហ្វាសូ ពីថ្ងៃសុក្រ ទី២មីនា។ ហេតុការណ៍ពីរនេះ បានកើតឡើងក្នុងពេលព្រមៗគ្នា គឺមួយ នៅស្ថានទូតបារាំង ហើយមួយទៀត នៅទីបញ្ជាការកងទ័ពបួរគីណា ហ្វាសូ។
ចុះផ្សាយនៅថ្ងៃ៖
ស្តាប់ - ០១:៤០
ប្រហែលម៉ោង១០ព្រឹក ថ្ងៃសុក្រ ទី២មីនា ជនមួយក្រុមទៀត បានបំផ្ទុះឡាននិងបាញ់រះ នៅទីបញ្ជាការកងទ័ពបួរគីណា ហ្វាសូ ដែលធ្វើនាំឲ្យមានការខូចខាតយ៉ាងដំណំ ហើយក្នុងពេលជាមួយគ្នា ក្រុមខ្មាន់កាំភ្លើងមួយក្រុមមួយទៀត បានបាញ់ប្រហារនៅស្ថានទូតបារាំង។
តុល្យការបឋម កន្លែងបាញ់រះនៅស្ថានទូតបារាំង គ្មានមនុស្សស្លាប់ទេ តែរងទុក្ខធ្ងន់ឯកន្លែងកើតហេតុនៅទីបញ្ជាការកងទ័ព ដោយស្លាប់មនុស្សជិត៣០នាក់ ក្នុងនោះ ទាហានបួរគីណាបេ៨នាក់។ ចំណែកក្រុមខ្មាន់កាំភ្លើង ចំនួន៨នាក់ ក៏ត្រូវបាញ់សម្លាប់ដែរ។ ក្រោយកើតហេតុ គ្មានទាន់មានក្រុមភេរវជនណាចេញមុខទទួលស្គាល់ថាជាស្នាដៃរបស់ខ្លួននៅឡើយទេ។
លោក Clément Sawadogo រដ្ឋមន្ត្រីក្រសួងសន្តិសុខ បួរគីណាបេ បានបញ្ជាក់ថា នៅពេលនេះ សភាពការណ៍បានត្រឡប់មកស្ងប់ស្ងាត់វិញហើយ។ លោកចាត់ទុកថា ទង្វើនេះ ជាអំពើភេរវកម្ម ហើយដែលទំនងជាមានចេតនា ប្រឆាំងចំពោះការរួបរួមគ្នាក្នុងយុទ្ធនាការប្រឆាំងភេរវនិយមជីហាត របស់បារាំងនិងកងកម្លាំងអាហ្វ្រិកទាំង៥ប្រទេស នៅតំបន់សាហែ។ ប្រតិកម្មភ្លាមៗ ប្រធានាធិបតីបារាំង អេម៉ានុយអែលម៉ាក្រុង ប្រមុខរដ្ឋនីហ្សេ ថ្នាក់ដឹកនាំបួរគីណាបេ ជាដើម សុទ្ធតែបានបន្តប្តេជ្ញាចិត្តចូលរួមប្រឆាំងភេរវកម្មអន្តរជាតិ នៅតំបន់សាហែ តទៅទៀត។
សូមជម្រាបដែរថា ជាច្រើនឆ្នាំចុងក្រោយនេះ រដ្ឋធានី Ouagadougou របស់ប្រទេសបួរគីណបេ បានក្លាយជាផ្ទាំងស៊ីបនៃអំពើភេរវកម្មជីហាត ប្រឆាំងទៅនឹងពួកអឺរ៉ុប។ ភេវរកម្មខែសីហាឆ្នាំមុន នៅហាងកាហ្វេមួយ សម្លាប់មនុស្ស១៩នាក់ គ្មានអ្នកចេញមុខអះអាងពីស្នាដៃខ្លួនទេ។ ប៉ុន្តែនៅឆ្នាំ២០១៦ ស្លាប់៣០នាក់ គឺពួកជីហាត បានចេញមុខទទួលស្គាល់ថាជាអំពើរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ