អាជ្ញាធររារាំងសហជីពកម្មករមិនអោយជួបជុំសំដែងមតិនៅក្នុងទិវាសិទ្ធិនារីអន្តរជាតិ៨មិនា
នៅក្នុងថ្ងៃប្រារព្ធទិវាសិទ្ធិនារីអន្តរជាតិ ៨មីនា នាព្រឹកថ្ងៃសៅរ៍នេះ ក្រុមអង្គការសមាគម និងសហជីពកម្មករប្រមាណជា១៨ បានទៅជួបជុំគ្នាធ្វើវេទិកាសាធារណៈ នៅទីលានប្រជាធិបតេយ្យ ជិតរមណីយដ្ឋានវត្តភ្នំ ក្នុងរាជធានីភ្នំពេញ។ ប៉ុន្តែការជួបជុំត្រូវបានរារាំងដោយកំលាំងអាជ្ញាធរក្រុងភ្នំពេញ ដោយលើកហេតុផលលើបញ្ហាសន្តិសុខ សណ្តាប់ធ្នាប់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
ចាប់តាំងពីព្រឹកម៉ោង៧ ក្រុមកម្មករ រួមជាមួយមេដឹកនាំសហជីព និងសកម្មជនសិទ្ធិមនុស្សរាប់រយនាក់ បានទៅប្រមូលផ្តុំគ្នានៅលើសួនច្បារស្ពាននាគ ក្បែរទីលានប្រជាធិបតេយ្យ ប៉ុន្តែពួកគេត្រូវបានរារាំងដោយកំលាំងសន្តិសុខសណ្តាប់ធ្នាប់ខណ្ឌដូនពេញ ដែលប្រដាប់ដោយខែល និងដំបង។ ក្រុមកម្មករ អ្នកតវ៉ា និងកំលាំងសន្តិសុខសណ្តាប់ធ្នាប់ខណ្ឌ បានជ្រួលទៅជ្រួលមក នៅម្ខាងម្នាក់នៃបង្កាន់ដៃស្ពាននាគ ដោយភាគីទាំងពីរបានឌឺដង និងបោះសំដីដាក់អោយគ្នាទៅវិញទៅមក។ បន្តិចក្រោយមក ការប៉ះទង្គិចគ្នាមួយប្រាវបានកើតឡើង ដែលបណ្តាលអោយស្ត្រីម្នាក់រងរបួស តែមិនធ្ងន់ធ្ងរនោះទេ។
ប៉ុន្តែយ៉ាងណាក៍ដោយ នៅប្រមាណជាម៉ោង៩ព្រឹក ភាគីសន្តិសុខ បានសំរេចចិត្តដកថយបន្តិចចូលទៅកាន់ទីលានប្រជាធិបតេយ្យ ដែលហ៊ុំព័ទ្ធដោយរនាំងដែក បូករួមនឹងកំលាំងប៉ូលិស ប៉េអឹម ប្រមាណជា១ពាន់នាក់ ប្រដាប់ដោយដំបង និងខែល ដែលកំពុងប្រុងជើងការជានិច្ច។ នៅប្រមាណជាម៉ោង១០និង៣០នាទី គេបានឃើញវត្តមានរបស់ប្រធាននិងអនុប្រធាន គណបក្សសង្គ្រោះជាតិ គឺ លោក សម រង្ស៊ី និងលោក កឹម សុខា បង្ហាញមុខនៅក្បែរស្ពាននាគរយៈពេលប្រមាណជា៥នាទី។ ថ្លែងពីលើរថយន្តរបស់លោក លោក សម រង្ស៊ី បានសំដែងការអបអរសាទរនៅក្នុងទិវាសិទ្ធិនារីអន្តរជាតិ៨មីនា និងបានថ្លែងគាំទ្រការទាមទាររបស់សហជីពនៅថ្ងៃនេះ។ ហើយនៅប្រមាណជាម៉ោង១១ព្រឹក គេក៍បានឃើញវត្តមានរបស់លោក ម៉ម សូណង់ដូ នាយកវិទ្យុសំបុកឃ្មុំផងដែរ។
ការជួបជុំរបស់ក្រុមកម្មករ មេដឹកនាំសហជីព និងសកម្មជនសិទ្ធិមនុស្សនៅថ្ងៃសិទ្ធិនារីអន្តរជាតិ៨មីនា គឺដើម្បីទាមទារអោយរដ្ឋាភិបាលកម្ពុជា ដោះលែងជនជាប់ឃុំនៅពន្ធនាគារត្រពាំងថ្លុង ទាំង២១នាក់ និងទាមទារអោយរដ្ឋាភិបាលតំឡើងប្រាក់ខែគោលដល់កម្មករកម្មការិនី អោយបាន១៥០ ដុល្លារក្នុង១ខែ និងទាមទារអោយដកពាក្យបណ្តឹងប្រឆាំងនឹងមេដឹកនាំសហជីពផងដែរ។ ការជួបជុំរបស់ក្រុមកម្មករ សហជីព និងសកម្មជនសិទ្ធិមនុស្សបានរំសាយនៅត្រឹមប្រមាណជាងម៉ោង១១និង៣០នាទី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ