កម្ពុជា-វៀតណាមប្រារព្ធខួប៤០ឆ្នាំនៃជ័យជម្នះលើរបបខ្មែរក្រហម
មេដឹកនាំជាន់ខ្ពស់នៃប្រទេសវៀតណាម និងមន្ត្រីកម្ពុជា បានប្រារព្ធខួប៤០ឆ្នាំនៃជ័យជម្នះ លើរបបប៉ុលពត កាលពីថ្ងៃទី៤ ខែមករា កន្លងទៅ នៅទីក្រុងហាណូយប្រទេសវៀតណាម។ ក្នុងឱកាសនោះ នាយករដ្ឋមន្ត្រីវៀតណាមបានហៅជ័យជម្នះ កាលពី៤០ឆ្នាំមុនថាជាជ័យជម្នះរួមគ្នារបស់ កម្ពុជា-វៀតណាម ក៏ដូចជាពិភពលោកទាំងមូល។
ចុះផ្សាយនៅថ្ងៃ៖
ស្តាប់ - ០១:៤៩
លោក ង្វៀន ស៊ុនហ្វ៊ុក នាយករដ្ឋមន្ត្រីវៀតណាមក្នុងឱកាសខួប៤០ឆ្នាំ នៃថ្ងៃជ័យជម្នះលើរបបខ្មែរក្រហម បានថ្លែងថា ជ័យជម្នះនេះបានបង្ហាញពី ភាពក្លាហាន និងភាពរឹងមាំរបស់ប្រជាជនវៀតណាម, បង្ហាញពីទំនាក់ទំនងជាប្រពៃណីនៃប្រទេសទាំងពីរ, និងបង្ហាញពីភាពស្មោះត្រង់ក្នុងការជ្រោមជ្រែងរបស់វៀតណាមជួយប្រជាជនកម្ពុជា។ នេះបើតាមការចុះផ្សាយរបស់សារព័ត៌មានវៀតណាម(Viet Nam News) កាលពីថ្ងៃទី០៥ ខែមករា។
លោក ង្វៀន ស៊ុនហ្វ៊ុក បន្តថា ជ័យជម្នះ ថ្ងៃ៧មករា១៩៧៩ បានលុបបំបាត់របបប្រល័យពូជសាសន៍ ហើយបានបើកនូវសករាជថ្មីនៃការអភិវឌ្ឍ, ឯករាជ្យ, សេរីភាព, សន្តិភាព និងវិបុលភាពសម្រាប់ប្រទេសកម្ពុជាទាំងមូល។ លោកនាយករដ្ឋមន្ត្រីវៀតណាមបញ្ជាក់ថា ការផ្តន្ទាទោសមេដឹកនាំខ្មែរក្រហម កាលពីថ្ងៃទី១៦ ខែវិច្ឆិកា ឆ្នាំ២០១៨កន្លងទៅនេះ បាននាំមកនូវយុត្តិធម៌សម្រាប់ប្រជាពលរដ្ឋកម្ពុជា ដែលត្រូវបានសម្លាប់នៅក្នុងរបបខ្មែរក្រហម។
ខួប៤០ឆ្នាំនៃថ្ងៃជ័យជម្នះលើរបបខ្មែរក្រហម ដែលបានធ្វើឡើងនៅក្នុងទីក្រុងហាណូយប្រទេសវៀតណាម កាលពីថ្ងៃទី៤ ខែមករា សុទ្ធតែមានវត្តមាន មេដឹកនាំវៀតណាមសំខាន់ៗ ដូចជាអគ្គលេខាធិការបក្សកុម្មុយនិស្តវៀតណាម, ប្រធានាធិបតីវៀតណាម លោក ង្វៀន ពូទ្រុង, អតីតអគ្គលេខាធិការបក្ស, លោក នាយករដ្ឋមន្ត្រីវៀតណាម, រួមទាំងវត្តមានមន្ត្រីពីកម្ពុជាផងដែរ។
សារព័ត៌មានវៀតណាមដដែល ក៏បានដកស្រង់ការលើកឡើងរបស់លោក ទេព ងន សមាជិកគណៈកម្មាធិការអចិន្ត្រៃយ៍នៃគណបក្សប្រជាជនកម្ពុជា និងជាអនុប្រធានទី២ព្រឹទ្ធសភាកម្ពុជាថា ការជួយជ្រោមជ្រែងរបស់វៀតណាមបានធ្វើឲ្យកម្ពុជារួចផុតពីសង្រ្គាម និងបោះជំហានទៅកាន់ការអភិវឌ្ឍលើគ្រប់វិស័យ។ លោក ទេព ងន បានថ្លែងអំណរគុណវៀតណាមផងដែរ ដែលបានជួយកម្ពុជាក្នុងការកសាង និងអភិវឌ្ឍន៍ប្រទេសកម្ពុជាឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ