កម្ពុជាបន្តបញ្ជាក់អំពីភាពស្ងប់ស្ងាត់នៅតាមព្រំដែន
មន្ត្រីជាន់ខ្ពស់របស់រដ្ឋាភិបាលក្រុងភ្នំពេញទទួលបន្ទុកកងទ័ពនៅតែអះអាងអំពីភាពស្ងប់ស្ងាត់នៅតាមព្រំដែនកម្ពុជាថៃ ក្នុងតំបន់ប្រាសាទព្រះវិហារ បើទោះជាសារព័ត៌មានថៃបានផ្សាយអំពីការចល័តកងទ័ពរបស់ពួកគេក៏ដោយ។
ចុះផ្សាយនៅថ្ងៃ៖
លោកឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិខ្មែរបានប្រាប់អ្នកសារព័ត៌មាននៅថ្ងៃពុធម្សិលមិញថា កងទ័ពជួរមុខនៅព្រំដែនកម្ពុជាថៃបាននៅបន្តទាក់ទងគ្នាធម្មតា ដោយគ្មានស្ថានភាពគួរអោយព្រួយបារម្ភនោះទេ។ លោកទៀ បាញ់មិនធ្វើអត្ថាធិប្បាយទៅលើការផ្សព្វផ្សាយរបស់សារព័ត៌មានថៃដែលនិយាយអំពីការចល័តទាហ៊ានថៃនោះឡើយ។
ចំពោះលោករដ្ឋមន្ត្រីក្រសួងការពារជាតិកម្ពុជា ការប្តេជ្ញារបស់រដ្ឋាភិបាលទាំងពីរ ថាត្រូវនៅស្ងាត់ស្ងៀម និងគោរពតាមសេចក្តីសម្រេចរបស់តុលាការឡាអេនោះ វាគឺជាគោលជំហរផ្លូវការរបស់រដ្ឋជិតខាងទាំងពីរហើយ។
គួរបញ្ជាក់ថា នៅថ្ងៃចន្ទទី១១វិច្ឆិកាដើមសប្តាហ៍ក្រោយនេះ តុលាការយុត្តិធម៌អន្តរជាតិនឹងប្រកាសសេចក្តីសម្រេចរបស់ខ្លួន លើបណ្តឹងរបស់កម្ពុជា ដែលស្នើអោយតុលាការរបស់អង្គការសហប្រជាជាតិមួយនេះ បកស្រាយសាលក្រមរបស់ខ្លួនឆ្នាំ១៩៦២ ស្តីពីប្រាសាទព្រះវិហារ។ លោកឧបនាយករដ្ឋមន្ត្រីហោ ណាំហុង រដ្ឋមន្ត្រីក្រសួងការបរទេសកម្ពុជាដែលកំពុងចូលរួមកិច្ចប្រជុំប្រទេសនិយាយភាសាបារាំងនៅក្នុង ទីក្រុងប៉ារីសប្រទេសបារាំង នឹងដឹកនាំក្រុមភ្នាក់ងារភាគីកម្ពុជា ទៅចូលរួមស្តាប់សាលដីកានៅទីក្រុងឡាអេនោះ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ