ANFREL បដិសេធថាមិនពាក់ព័ន្ធនឹងការបំផ្លាញការបោះឆ្នោតនៅកម្ពុជាឡើយ
បណ្តាញអាស៊ាន ដើម្បីការបោះឆ្នោតដោយសេរី ហៅកាត់ថាANFREL បានចេញសេចក្តីថ្លែងការណ៍មួយកាលពីម្សិលមិញ ដោយទាត់ចោលការចុះផ្សាយរបស់ព័ត៌មានOnlineចំនួនពីរដែលស្និទនឹងរដ្ឋាភិបាលកម្ពុជាដែលថា ANFREL ធ្វើសកម្មភាពបំផ្លាញការបោះឆ្នោតនៅកម្ពុជា តាមរយៈការសហការជាមួយបន្ទប់ស្ថានការណ៍។ បើតាម ANFREL គឺខ្លួនមិនមានពាក់ព័ន្ធឬចូលរួមសកម្មភាពណាមួយជាមួយនឹងបន្ទប់ស្ថានការណ៍ដែលរដ្ឋាភិបាលកម្ពុជាចោទថាជាទីតាំងបញ្ជាបដិវត្តន៍ពណ៌នោះឡើយ។
ចុះផ្សាយនៅថ្ងៃ៖
ស្តាប់ - ០២:១៧
ANFREL គឺជាបណ្តុំអង្គការនៅអាស៊ានឃ្លាំមើលការបោះឆ្នោតដែលមានមូលដ្ឋាននៅទីក្រុងបាងកក ប្រទេសថៃ បានបដិសេធចំពោះអត្ថបទព័ត៌មានចុះផ្សាយដោយព័ត៌មានអនឡាញ ឈ្មោះ Swiftnews និង Freshnews ដែលមាននិន្នាការគាំទ្ររដ្ឋាភិបាលកម្ពុជា។ បណ្តាញព័ត៌មានទាំងពីរនេះ បានសរសេរថា អង្គការ ANFREL នឹងធ្វើសកម្មភាពបំផ្លាញដល់ការបោះឆ្នោតនៅកម្ពុជា តាមរយៈការសហការជាមួយ បណ្តុំអង្គការឃ្លាំមើលការបោះឆ្នោតនៅកម្ពុជាដែលដាក់ឈ្មោះថា បន្ទប់ស្ថានការណ៍។ បន្ទប់ស្ថានការណ៍កាលពីពេលកន្លងទៅនេះ ត្រូវបានលោកនាយករដ្ឋមន្រ្តីហ៊ុន សែន ហៅថា ជាទីតាំងបញ្ជាឲ្យមានបដិវត្តន៍ពណ៌នៅកម្ពុជា។ ប៉ុន្តែបន្ទប់ស្ថានការណ៍ដែលមានអង្គការខុមហ្រ្វែល និងអង្គការនិចហ្វិចជាដើមនោះ បានបដិសេធចំពោះការចោទប្រកាន់នេះដោយសំអាងថា កន្លងមក បន្ទប់ស្ថានការណ៍នេះ អាចធ្វើការបានដោយមានការយល់ព្រមពីគ.ជ.ប ហើយត្រូវបានរំលាយខ្លួនឯងទៅវិញក្រោយពីចេញលទ្ធផលបោះឆ្នោតឃុំ-សង្កាត់ឆ្នាំ២០១៧។
ដោយឡែក សេចក្តីថ្លែងការណ៍របស់ ANFREL ផ្សាយកាលពីថ្ងៃទី១០ មេសា បញ្ជាក់ថា អង្គការANFREL មិនបានជាប់ពាក់ព័ន្ធនឹងផែនការណាមួយ ដែលធ្វើឲ្យគ្រោះថា្នក់ដល់ដំណើរការបោះឆ្នោតនៅកម្ពុជាឡើយ។
ប៉ុន្តែ ក្នុងអត្ថបទវិភាគដែលចុះផ្សាយដោយ Swiftnews កាសែតអនឡាញមួយនេះបានសរសេរថា ដោយសារតែបន្ទប់ស្ថានការណ៍បោះឆ្នោតនឹងមិនមានវត្តមាននៅកម្ពុជាទៀតនោះ បន្ទប់ស្ថានការណ៍នេះនឹងផ្លាស់ទៅទីក្រុងបាងកកប្រទេសថៃ។ លោក គល់ បញ្ញា នឹងត្រូវតែងតាំងជាប្រធានថ្មីនៃបណ្តាញអាស៊ាន ដើម្បីការបោះឆ្នោតដោយសេរី ហៅកាត់ថាANFREL នៅទីក្រុងបាងកក។ នេះបើតាមការផ្សាយរបស់បណ្តាញព័ត៌មានដែលស្និទរដ្ឋាភិបាលកម្ពុជាដដែល។
បណ្តាញព័ត៌មានដដែលបានអះអាងថា នៅពេលលោក គល់ បញ្ញា ធ្វើជាប្រធានANFREL គឺប្រធានអង្គការនេះត្រូវបានបំបែកទៅធ្វើនៅអង្គការAsia Democracy Network (AND) ដែលគេថាអង្គការនេះពាក់ព័ន្ធក្នុងការរៀបចំផែនការបំផ្លាញការបោះឆ្នោត។
សម្រាប់ លោក កន សាវ៉ាង អ្នកសម្របសម្រួលផ្នែកអង្កេតនៃអង្គការឃ្លាំមើលការបោះឆ្នោតក្នុងស្រុកមួយហៅកាត់ ខុមហ្រ្វែល ថាលោកមិនចាប់អារម្មណ៍នឹងការចុះផ្សាយរបស់បណ្តាញព័ត៌មានទាំងពីរនេះទេ ដោយសំអាងថាវាគ្រាន់តែជាលិខិតរបស់មិត្តអាន មិនមែនជាជំហរបស់រដ្ឋាភិបាលឬជាសំណេររបស់អ្នកកាសែតដែលមិនមានសម្ភាសប្រភពច្បាស់លាស់នោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ