ព្រះរាជអាជ្ញាគ្រោងធ្វើសេចក្ដីសន្និដ្ឋានស្ថានពរលើសំណុំរឿងមន្រ្តីអាដហុក
ចៅក្រមស៊ើបសួរ បានប្រកាសបិទការស៊ើបសួរទៅលើសំណុំរឿងមន្រ្តីអាដហុកទាំង៤រូប និងលោក នី ចរិយា អគ្គលេខាធិការរង គជប។ ហើយបើតាមគម្រោងចៅក្រមស៊ើបសួរនឹងបញ្ជូនសំណុំរឿងនេះ មកឲ្យព្រះរាជអាជ្ញាដើម្បីធ្វើសេចក្តីសន្និដ្ឋានស្ថាពរ។ នេះបើតាមការបញ្ជាក់របស់លោក លី សុផាណា អ្នកនាំពាក្យសាលាដំបូងរាជធានីភ្នំពេញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៣
គម្រោងនៃការធ្វើសេចក្ដីសន្និដ្ឋានស្ថាពរនេះធ្វើឡើង បន្ទាប់ពីតុលាការបើកការស៊ើបអង្កេតជាង១ឆ្នាំមកហើយ លើបទចោទសូកប៉ាន់សាក្សី ចំពោះមន្ត្រីអង្គការអាដហុកទាំង៤រូប និងលោក នី ចរិយា មន្ត្រីគជប។
ក្នុងន័យនេះ លោក ឡោ ជុនធី មេធាវីការពារក្ដីមន្ត្រីអាដហុកទាំង៤រូបបានពន្យល់ថា នៅពេលសេចក្ដីសន្និដ្ឋានចេញមកហើយគឺស្ថិតក្នុងពីរដំណាក់កាល ចោទប្រកាន់ និងលើកលែងការចោទប្រកាន់។ ប្រសិនបើចោទប្រកាន់ទៅលើពួកគាត់នីតិវិធីតុលាការនឹងបញ្ជូនទៅជំនុំជម្រះបន្ត។ តែបើគ្មានការចោទប្រកាន់ទេពួកគាត់ទាំង៥នឹងត្រូវបានលើកលែងការចោទប្រកាន់។
សូមបញ្ជាក់ថា រហូតមកដល់ពេលនេះពួកគេត្រូវបានតុលាការឃុំខ្លួនដើម្បីស៊ើបអង្កេត អស់រយៈពេលជាង១ឆ្នាំមកហើយ ដោយមិនទាន់មានការកាត់ទោសណាមួយនៅឡើយ ទេ។ កន្លងមកទាំងមេធាវីការពារក្ដីមន្ត្រីអាដហុកទាំង៤រូប និងអង្គការ អន្តរជាតិ នានា បានរិះគន់អាជ្ញាធរកម្ពុជាថា ឃុំខ្លួនពួកគេក្នុងករណីដែលតុលាការមិនទាន់រកភស្តុតាងគ្រប់គ្រាន់ដើម្បីដាក់បន្ទុកនៅឡើយទេ។ មន្ត្រីអង្គការអាដហុកទាំងនោះរួមមានលោក យី សុខសាន្ត លោក ណៃ វ៉ង់ដា លោក នី សុខា និងលោកស្រី លឹម មុន្នី។ បច្ចុប្បន្ននេះ ស្ថាន ភាពសុខភាពរបស់ពួកគេគឺមួយចំនួនកំពុងមានជំងឺប្រចាំកាយ។ នេះបើតាមការបញ្ជាក់របស់ លោក ឡោ ជុនធី។
គួររម្លឹកឡើងវិញថា ការឃុំខ្លួនពួកគេធ្វើឡើងបន្ទាប់ពីមានជាប់ពាក់ព័ន្ធរឿងរ៉ាវក្ដីក្ដាំរវាងលោក កឹម សុខា ប្រធានគណបក្សសង្គ្រោះជាតិ ជាមួយនាង ខុម ចាន់តារ៉ាទី ហៅស្រីមុំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ