បក្សប្រឆាំងទម្លាក់ស្លាកសញ្ញាបក្សនៅទីស្នាក់ការកណ្តាលដោយខ្លួនឯង មុនអាជ្ញាធរចាត់វិធានការដោយផ្ទាល់
នៅព្រឹកមិញនេះ ស្លាកសញ្ញា និងរូបសញ្ញាគណបក្សសង្រ្គោះជាតិនៅទីស្នាក់ការកណ្តាលបក្សនៅចាក់អង្រែលើក្នុងរាជធានីភ្នំពេញ ត្រូវបានរុះរើទម្លាក់ចេញ។ ការរុះរើចេញនេះ គឺធ្វើឡើងដោយគណបក្សប្រឆាំងខ្លួនឯង ហើយវាក៏បានធ្វើឡើងស្របពេលដែលអាជ្ញាធរកំពុងបើកយុទ្ធនាការទម្លាក់ស្លាកគណបក្សសង្រ្គោះជាតិនៅទូទាំងប្រទេសតាមការណែនាំរបស់ក្រសួងមហាផ្ទៃ បន្ទាប់ពីតុលាការកំពូលចេញសាលដីការំលាយគណបក្សសង្រ្គោះជាតិ។
ចុះផ្សាយនៅថ្ងៃ៖
ការសម្រេចទម្លាក់ស្លាកសញ្ញាគណបក្សដោយខ្លួនឯងនៅទីស្នាក់ការធំក្នុងទីក្រុងភ្នំពេញនេះ គឺបន្ទាប់អភិបាលរាជធានីភ្នំពេញលោកឃួង ស្រេង បានប្រាប់ទៅលោកស្រីជូឡុង សូមូរ៉ា ដែលជាម្ចាស់ដីឡូតិ៍ដែលទីស្នាក់ការបក្សប្រឆាំងតាំងនៅនេះឲ្យរុះរើ និងដកចេញនូវស្លាកសញ្ញាគណបក្សសង្រ្គោះជាតិឲ្យបានមុនថ្ងៃទី២២ ខែវិច្ឆិកា ឆ្នាំ២០១៧ជាកំហិត។ តាមរយៈលិខិតចុះថ្ងៃទី១៧ វិច្ឆិកា លោកឃួង ស្រេង ក៏បានព្រមានផងដែរថា បើមិនមានការរុះរើតាមការកំណត់ទេនោះ គឺអាជ្ញាធរនឹងចុះទៅរុះរើដោយខ្លួនឯងតែម្តង ដោយមិនទទួលខុសត្រូវនូវរាល់ការខូចខាតនោះឡើយ។
គួរកត់សម្គាល់ថា ការអនុវត្តរបស់រដ្ឋបាលក្រុងភ្នំពេញនាពេលនេះ គឺធ្វើឡើងតាមការណែនាំរបស់ក្រសួងមហាផ្ទៃក្នុងគោលបំណងអនុវត្តសាលដីការបស់តុលាការកំពូលដែលសម្រេចរំលាយចោលគណបក្សសង្រ្គោះជាតិកាលពីថ្ងៃព្រហស្បតិ៍។ ក្នុងការអនុវត្តសាលដីកានេះ ក្រសួងមហាផ្ទៃបានតម្រូវឲ្យរដ្ឋបាលរាជធានី ខេត្ត និង អាជ្ញាធរពាក់ព័ន្ធធ្វើការណែនាំឲ្យមានការទម្លាក់ស្លាកសញ្ញាគណបក្សសង្រ្គោះជាតិនៅតាមទីស្នាក់ការបក្សនេះទាំងអស់នៅទូទាំងប្រទេស។ ក្រៅពីនេះ ក្រសួងមហាផ្ទៃក៏បានប្រាប់ឲ្យណែនាំដល់ម្ចាស់អចនវត្ថុទាំងឡាយឲ្យធ្វើការដកចេញនូវស្លាកសញ្ញានានារបស់គណបក្សសង្រ្គោះជាតិជាបន្ទាន់ផងដែរ។ ដោយឡែកចំពោះស្លាកសញ្ញានានានៅតាមទីសាធារណៈវិញ ក្រសួងមហាផ្ទៃបានបញ្ជាឲ្យអាជ្ញាធរធ្វើការរុះរើទម្លាក់ចោលជាបន្ទាន់តែម្តង។
នៅពេលនេះ អាជ្ញាធរមានសមត្ថកិច្ចកំពុងតែបន្តរុះរើទម្លាក់ស្លាកសញ្ញាគណបក្សសង្រ្គោះជាតិនៅទូទាំងប្រទេសកម្ពុជាតាមសេចក្តីណែនាំរបស់ក្រសួងមហាផ្ទៃកាលពីថ្ងៃសុក្រ ជាថ្ងៃតែមួយដែលតុលាការកំពូលបានចេញសាលដីការំលាយគណបក្សសង្រ្គោះជាតិ និងកាត់សិទ្ធិធ្វើនយោបាយ៥ឆ្នាំរបស់មន្រ្តីបក្សប្រឆាំង១១៨ទៀតជាលាយលក្ខណ៍អក្សរ។ គិតមកដល់ពេលនេះ ក្រសួងមហាផ្ទៃមិនអាចប៉ាន់ប្រមាណថាដំណើរការរុះរើស្លាកសញ្ញាគណបក្សសង្រ្គោះជាតិបានប៉ុន្មានភាគរយហើយទេ។ ទោះជាបែបនេះក្តី អ្នកនាំក្រសួងមហាផ្ទៃលោកខៀវ សុភ័គ បានអះអាងថា ដំណើរការរុះរើនេះមានភាពរលូនដោយមិនមានការរារាំង ឫមួយក៏មានតវ៉ាណាមួយពីប្រជាពលរដ្ឋអ្នកនាំគាំទ្រគណបក្សសង្រ្គោះជាតិឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ