រលកបាតុកម្មសុំឲ្យជប៉ុនដកខ្លួនចេញពីការបោះឆ្នោតនៅកម្ពុជា បានទៅដល់ប្រទេសកូរ៉េហើយ
ដូចការគ្រោងទុក នៅថ្ងៃអាទិត្យនេះ ពលករខ្មែររាប់ពាន់នាក់បានប្រមូលផ្តុំគ្នាធ្វើបាតុកម្មនៅក្នុងប្រទេសកូរ៉េខាងត្បូង ដើម្បីជំរុញឲ្យសហគមន៍អន្តរជាតិកុំទទួលស្គាល់ការបោះឆ្នោតនៅកម្ពុជានាថ្ងៃទី ២៩ កក្កដា ខាងមុខ។ នេះជាបាតុកម្មលើកទី៥ហើយ របស់ពលរដ្ឋខ្មែរនៅក្រៅប្រទេស ដែលគាំទ្រ អតីតគណបក្សសង្រ្គោះជាតិ ដែលស្នើម្តងហើយម្តងទៀត ឲ្យជប៉ុនផ្អាកជំនួយដល់ការបោះឆ្នោតនៅកម្ពុជា។ ការធ្វើបាតុកម្មរបស់ពលករខ្មែរនៅកូរ៉េពេលនេះមានអ្នកចូលរួមច្រើនជាងបាតុកម្ម៤លើកកន្លងមក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
ការធ្វើបាតុកម្មនៅទីក្រុងសេអ៊ូល ប្រទេសកូរ៉េខាងត្បូងនៅពេលនេះ គឺមានទ្រង់ទ្រាយធំជាងការធ្វើបាតុកម្មនៅបារាំងកាលពីថ្ងៃសុក្រ និងមានមនុស្សចូលរួមច្រើនជាងបាតុកម្មនៅជប៉ុនកាលពីសប្តាហ៍មុន។ តាមការប្រកាសរបស់អ្នករៀបចំកម្មវិធី គឺមានពលករខ្មែរ ចូលរួមរាប់ពាន់នាក់ ខណៈខ្មែរជាអ្នកធ្វើការងារនៅប្រទេសនេះ មានរាប់ម៉ឺននាក់ឯណោះ។
ក្រុមបាតុករ គឺនៅតែបន្តទាមទារកុំឲ្យសហគមន៍អន្តរជាតិទទួលស្គាល់ការបោះឆ្នោតនៅកម្ពុជា នៅថ្ងៃទី២៩កក្កដាខាងមុខ។ ជាពិសេស គឺពួកគេបន្តអំពាវនាវ ទៅកាន់ប្រទេសជប៉ុន ឲ្យផ្អាកជំនួយដល់ដំណើរការបោះឆ្នោតនេះ ដែលគ្មានអតីតគណបក្សប្រឆាំងធំជាងគេចូលរួមនោះ។ ការធ្វើបាតុកម្មលើទឹកដីកូរ៉េនៅពេលនេះ គឺជួនចំពេលដែលលោកស្រី មូរ សុខហួរ អនុប្រធានអតីតគណបក្សសង្រ្គោះជាតិ និងលោក ញ៉យ ចំរើន អតីតតំណាងរាស្រ្ត កំពុងតែមានវត្តមាននៅទីនោះ។ អ្នកនយោបាយបក្សប្រឆាំងទាំងពីររូបនេះ គឺទៅទទួលយកពានរង្វាន់ផ្នែកសិទ្ធិមនុស្ស និងសន្តិភាព ពីអង្គការសាសនាគ្រឹស្តមួយនៅកូរ៉េខាងត្បូង។ ជាពានរង្វាន់ដែលត្រូវផ្តល់ឲ្យ លោក កឹម សុខា ដែលកំពុងជាប់ឃុំខ្លួន។ នៅចំពោះក្រុមបាតុករ លោកស្រី មូរ សុខហួរ បានអំពាវនាវឲ្យមានការដោះលែង លោក កឹម សុខា និងអ្នកទោសមនសិកាផ្សេងទៀត ហើយថា បាតុកម្មទ្រង់ទ្រាយបែបនេះ នឹងក៏ត្រូវធ្វើបន្តទៀត។
ប្រតិកម្មទៅនឹងការធ្វើបាតុកម្មនេះ អ្នកនាំពាក្យគណបក្សប្រជាជនកម្ពុជា លោកសុខ ឥសាន បានហៅការធ្វើបាតុកម្មនេះថា ជាសិទ្ធិរបស់ពួកគេ ប៉ុន្តែលោកអះអាងថា បើមិនគោរពច្បាប់នឹងត្រូវរងការបង្ក្រាបជាមិនខាន ហើយថា បើនៅកម្ពុជា «រដ្ឋាភិបាលកម្ពុជានឹងមិនបណ្តែតបណ្តោយឲ្យធ្វើអ្វីតាមអំពើចិត្តដែលនាំឲ្យប៉ះពាល់ដល់សិទ្ធិរបស់អ្នកដទៃ និងបំពានលើច្បាប់ជាដាច់ខាត»។ បាតុកម្មនៅប្រទេសកូរ៉េខាងត្បូង គឺបន្ទាប់ពីមានរលកបាតុកម្មនៅក្នុងប្រទេសបារាំង កាលពីថ្ងៃទី ២២ មិថុនា និងបាតុកម្មជាបន្តបន្ទាប់នៅប្រទេសជប៉ុន កាណាដា និងសហរដ្ឋអាមេរិក ពីអ្នកគាំទ្រអតីតគណបក្សប្រឆាំងនៅក្រៅប្រទេស ដើម្បីទាមទារឲ្យប្រទេសជប៉ុន ដកខ្លួនចេញពីការបោះឆ្នោតនៅកម្ពុជា នាថ្ងៃទី ២៩ ខែ កក្កដា ឆ្នាំនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ