កម្ពុជា-ចិន ចុះកិច្ចព្រមព្រៀង៨ចំណុចបន្ថែមលើការផ្ដល់ជំនួយ៦០០លានដុល្លារ
លោកនាយករដ្ឋមន្ត្រី ហ៊ុន សែន បានមកដល់កម្ពុជាវិញហើយនៅថ្ងៃនេះ ក្រោយទស្សនកិច្ចនៅប្រទេសចិនរយៈពេល៤ថ្ងៃ។ ក្នុងនោះកិច្ចព្រមព្រៀងនិងអនុស្សារណៈចំនួន៨ ត្រូវបានចុះហត្ថលេខារួមគ្នារវាងកម្ពុជានិងចិន។ ជាកត់សម្គាល់ការចុះកិច្ចព្រមព្រៀងនេះ ធ្វើឡើងបន្ថែមពីលើការផ្ដល់ជំនួយ៦០០លានដុល្លារ និងការសន្យាទិញអង្ករ៤០តោនពីកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
កិច្ចព្រមព្រៀង៨ចំណុចនោះរួមមាន គម្រោងកែលំអរផ្លូវជនបទ គម្រោងផ្គត់ផ្គង់ទឹកជនបទ ជំហានទី២ គម្រោងផ្លូវល្បឿនលឿនភ្នំពេញខេត្តព្រះសីហនុ គម្រោងសាងសង់អគារអង្គរក្សនៃទីស្តីការគណៈរដ្ឋមន្រ្តី គម្រោងជួសជុលផ្លូវជាតិលេខ៧ ដែលរងការខូចខាតដោយទឹកជំនន់ គម្រោងជួសជុលប្រាសាទតាកែវ គម្រោងអភិវឌ្ឍន៍អាងរក្សាទឹកក្នុងខេត្តព្រះវិហារ និងចុងក្រោយជម្រុញកិច្ចសហប្រតិបត្តិការវិនិយោគក្រោមគំនិតផ្តួចផ្តើមខ្សែក្រវាត់មួយ ផ្លូវមួយ ។
គួរជម្រាបជូនថា ការចុះកិច្ចព្រមព្រៀងនេះធ្វើឡើងក្រោយ កិច្ចប្រជុំទ្វេភាគីរវាងនាយករដ្ឋមន្រ្តីចិនលោក លី ខឺឈាងនិងលោកនាយករដ្ឋមន្ត្រី ហ៊ុន សែន នៅល្ងាចថ្ងៃទី២២មករា។
ក្នុងចំណោមកិច្ចព្រមព្រៀង៨ចំណុចនេះ ប្រមុខរដ្ឋាភិបាលខ្មែរបានអះអាងថា កម្ពុជាបានត្រៀមខ្លួនជាស្រេច ដើម្បីជំរុញគម្រោងផ្លូវ១ខ្សែក្រវាត់១ ជាមួយចិនឲ្យបានជោគជ័យ ខណៈគម្រោងនេះផ្តោតលើហេដ្ឋារចនាសម្ព័ន្ធ ដើម្បីតភ្ជាប់ពាណិជ្ជកម្មតំបន់ អាចផ្តល់ឱកាសវិជ្ជមានដល់ការអភិវឌ្ឍនៅកម្ពុជា។ ប៉ុន្តែយ៉ាងណាមិញ មតិខ្លះថា គម្រោងផ្លូវ១ខ្សែក្រវាត់១ ក៏អាចមានហានិភ័យមួយចំនួនដល់កម្ពុជាដែរ ដែលកម្ពុជាត្រូវសិក្សាឲ្យបានលម្អិតជាងនេះ អំពីឥទ្ធិពលវិជ្ជមាន និងអវិជ្ជមាននៃគម្រោងនេះ។
ទាក់ទងទៅនឹងការវិនិយោគ នៅក្នុងវេទិកាជំរុញពាណិជ្ជកម្ម និងវិនិយោគកម្ពុជា-ចិន កាលពីថ្ងៃម្សិលមិញដែរ លោកនាយករដ្ឋមន្ត្រី ហ៊ុន សែន បានលើកឡើងថា ទំហំវិនិយោគនៅកម្ពុជាបានស្ទុះឡើងរហូតដល់ប្រមាណ ៦,៨ប៊ីលានដុល្លា កើនប្រមាណ៧% ធៀបឆ្នាំ២០១៧ ។ ក្នុងនោះចិនបន្តស្ថិតនៅជាប្រទេសនាំមុខ ដែលបានបណ្តាក់ទុនវិនិយោគធំជាងគេបង្អស់នៅកម្ពុជាក្នុងឆ្នាំ២០១៨ ដែលមានទំហំទុនវិនិយោគសរុបប្រមាន ៣,៦ ប៊ីលានដុល្លា ស្មើ៥៣% នៃទំហំវិនិយោគសរុប ពោលគឺកើនឡើងប្រមាណ ៥៤% ធៀបឆ្នាំ២០១៧។
សូមបញ្ជាក់ថា ក្រៅពីការចុះកិច្ចព្រមព្រៀង៨ចំណុចរវាងកម្ពុជា-ចិន ប្រទេសចិនក៏បានផ្តល់ជំនួយឥតសំណង ចំនួន៦០០លានដុល្លារដល់កម្ពុជាផងដែរ រួមទាំងការសន្យាទិញអង្ករកម្ពុជាចំនួន៤០ម៉ឺនតោន ការប្ដេជ្ញាជម្រុញទំហំពាណិជ្ជកម្មចិន-កម្ពុជា ឲ្យកើនដល់១០ពាន់លានដុល្លារ នៅឆ្នាំ២០២៣។ ជាការជម្រុញធ្វើឡើងតាមរយៈ ការបន្តលើកទឹកចិត្តអ្នកវិនិយោគទុនចិនមកវិនិយោគ នៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ