ធនាគារជាតិ៖ រំពឹងសេដ្ឋកិច្ចកម្ពុជាក្នុងឆ្នាំ២០១៩មានភាពរឹងមាំ
ធនាគារជាតិកម្ពុជាហៅកាត់NBC បានចេញមកអះអាងដោយមានទំនុកចិត្តថា សេដ្ឋកិច្ចកម្ពុជាបន្តរីកចម្រើនឹងមានភាពរឹងមាំនៅក្នុងឆ្នាំ២០១៩។ ទន្ទឹមនឹងភាពរឹងមាំធនាគារជាតិក៏បានព្យាករណ៍ទុកមុនថា សេដ្ឋកិច្ចកម្ពុជានឹងប្រឈមហានិភ័យមួយចំនួននៅឆ្នាំ២០១៩។ ក្នុងនោះជុំវិញគម្រោងដកប្រព័ន្ធអនុគ្រោះពន្ធEBAក៏ត្រូវបានរាប់បញ្ចូលដែរ។ នេះបើតាមរបាយការណ៍ ក្រោមចំណងជើងថា វឌ្ឍនភាពម៉ាក្រូសេដ្ឋកិច្ចនិងទស្សនវិស័យឆ្នាំ២០១៨ ចេញផ្សាយកាលពីថ្ងៃទី២ខែមករា។
ចុះផ្សាយនៅថ្ងៃ៖ កែប្រែថ្ងៃទី៖
ក្ដីរំពឹងរបស់ធនាគារជាតិដែលថា សេដ្ឋកិច្ចកម្ពុជាក្នុងឆ្នាំ២០១៩នឹងមានកំណើនក្នុងរង្វង់៧ភាគរយនិងចូលរួមកាត់បន្ថយភាពក្រីក្រទៀតនោះ ផ្អែកទៅលើអត្រាអតិផរណាបន្តស្ថិតក្នុងកម្រិតទាប២,៦ភាគរយជាមួយនឹងស្ថិរភាពនៃអត្រាប្ដូរប្រាក់៤.០៥០រៀល ក្នុងមួយដុល្លារអាមេរិក។ ក្នុងនោះក៏មានដែរ ទុនបម្រុងអន្តរជាតិរំពឹងថា នឹងបន្តកើនដល់១១,៣ប៊ីលានដុល្លារដែលជាចំណែកមួយធានា ដល់ការនាំចូលទំនិញនិងសេវាបានរយៈពេល៥ខែ។ បន្ថែមលើនេះ ឥណទានវិស័យធនាគាររំពឹងថា បន្តកើនឡើងក្នុងល្បឿន១៧,១ភាគរយ។
យ៉ាងណាក៏ដោយ មានហានិភ័យ៨ចំណុចដែលធនាគារជាតិកម្ពុជាទទួលស្គាល់ថា នឹងប៉ះទង្គិចសេដ្ឋកិច្ចកម្ពុជាក្នុងឆ្នាំ២០១៩។ បញ្ហាមួយក្នុងចំណោមទាំងនោះ គម្រោងដកប្រព័ន្ធអនុគ្រោះពន្ធ(EBA) ពីកម្ពុជា ដែលកម្ពុជាក៏កំពុងរងចាំមើលនឹងទទួលបានចម្លើយបែបណាពីអឺរ៉ុបដែរ។ ក្រៅពីEBA ការកើនឡើងលឿននៃវិស័យសំណង់និងអចលនទ្រព្យ អាចធ្វើឲ្យតម្លៃអចលនទ្រព្យកើនឡើងហួសពីតម្រូវការជាក់ស្ដែងនិងអាចជាហានិភ័យសម្រាប់វិស័យធនាគារនិងការទុកចិត្តពីអ្នកវិនិយោគដែរ។
ទប់ស្កាត់ហានិភ័យនេះ ធនាគារជាតិកម្ពុជាប្រកាសគាំទ្រគោនយោបាយរបស់រដ្ឋាភិបាលក្នុងការកែទម្រង់រចនាសម្ព័ន្ធ ការធ្វើពិពិធកម្ម និងការរក្សាបរិយាកាសអំណោយផលដល់អ្នកវិនិយោគជាដើម។
ដោយឡែកក្នុងឆ្នាំ២០១៨ កំណើនសេដ្ឋកិច្ចត្រូវបានប៉ាន់ស្មានថា កើនឡើងក្នុងអត្រា៧,៣ភាគរយ ដែលកំណើននេះ មានកម្រិតខ្ពស់បើធៀបរយៈពេល៦ឆ្នាំចុងក្រោយនេះ។ នេះក៏ដោយសារវិស័យកាត់ដេរ សំណង់និងទេសចរណ៍បន្តមានកំណើនក្នុងអត្រាពីរខ្ទង់ដោយសារតែបរិយាកាសអំណោយផលនៃកំណើនសេដ្ឋកិច្ចពិភពលោក។
តាមការសិក្សារបស់ធនាគារជាតិកម្ពុជា កម្ពុជាអាចទទួលបានកំណើនវិនិយោគក្នុងវិស័យកម្មន្តសាលនិងកសិកម្មតាមរយៈការផលិត និងនាំចេញទំនិញមួយចំនួនក្នុងវិស័យនេះ ហើយមិនស្ថិតក្នុងគោលដៅដែលត្រូវដំឡើងពន្ធទាំងនៅសហរដ្ឋអាមេរិកនិងចិន។ ជាក់ស្ដែង ការនាំចេញរបស់កម្ពុជាបានកើនឡើងគួរឲ្យកត់សម្គាល់ ជាពិសេសផលិតផលកាត់ដេរត្រូវបានប៉ាន់ស្មានថា កើនឡើង២៤,៧ ភាគរយ ខណៈការនាំចេញអង្ករកើន២៣ភាគរយ ទោចក្រយានកើន១២ភាគរយនិងគ្រឿងបន្លាសយានយន្ត៣ដង។
ថ្វីបើនៅក្នុងឆ្នាំ២០១៨ដដែល ការនាំចេញផលិតផលកាត់ដេរនៅតែបន្តមានចំណែកធំទ្រទ្រង់ផ្នែកសេដ្ឋកិច្ចប្រមាណ២\៣នៃការចាំចេញសរុបក៏ដោយ ក៏វិស័យនេះបានថយចុះគួរឲ្យកត់សម្គាល់បើធៀបកាលពី១០ឆ្នាំមុន។ ជាមួយគ្នានេះ វិស័យធនាគារក៏បានរួមចំណែកអនុវត្តគោលនយោបាយរបស់រដ្ឋាភិបាលក្នុងការកាត់បន្ថយភាពក្រីក្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ