ក្រសួងមហាផ្ទៃបើកភ្លើងខៀវឲ្យអង្គការសមធម៌មានសកម្មភាពឡើងវិញ
បន្ទាប់ពីផ្អាកសកម្មភាពអង្គការសមធម៌មួយរយៈ រដ្ឋមន្ត្រីក្រសួងមហាផ្ទៃលោក ស ខេង នៅថ្ងៃទី២៣កុម្ភៈម្សិលមិញ បានសម្រេចឲ្យអង្គការមួយនេះ ដំណើរការ ការងាររបស់ខ្លួនឡើងវិញ។ សេចក្ដីសម្រេចនេះ ធ្វើឡើងក្នុងជំនួបរវាងលោក ស ខេង និងលោក George Edgar អគ្គរដ្ឋទូតអឺរ៉ុប ប្រចាំនៅកម្ពុជា ។
ចុះផ្សាយនៅថ្ងៃ៖
ស្តាប់ - ០២:២២
ជំហររបស់លោក George Edgar អគ្គរដ្ឋទូតសហភាពអឺរ៉ុប ប្រចាំនៅកម្ពុជានៅចំពោះមុខលោកឧបនាយករដ្ឋមន្ត្រី ស ខេង គឺមិនចង់ឲ្យអាជ្ញាធរកម្ពុជារារាំងសកម្មភាពការងាររបស់អង្គការសមធម៌ឡើយ។ សម្រាប់លោក ស ខេង បើសិនជាអង្គការសមធម៌អនុវត្តតាមលក្ខន្តិកៈ និងច្បាប់ស្តីពី អង្គការនិងសមាគមមិនមែនរដ្ឋាភិបាលនៅកម្ពុជានោះ គឺមិនមានបញ្ហាអ្វីនោះទេ។ ដូច្នេះអង្គការសមធម៌អាចធ្វើសកម្មភាពស្របច្បាប់របស់ខ្លួនបាន ហើយក្រសួងនឹងមិនបិទនោះទេ។ នេះបើតាម លោក ស ខេង ។
ជុំវិញសេចក្ដីសម្រេចនេះ លោក ខៀវ សុភ័គ អ្នកនាំពាក្យក្រសួងមហាផ្ទៃបានថ្លែងប្រាប់វិទ្យុបារាំងអន្តរជាតិRFI នៅព្រឹកនេះថា អង្គការសមធម៌គឺជាដៃគូរការងារដ៏ល្អនៅក្នុងកិច្ចការងារដោះស្រាយជម្លោះដីធ្លីនៅកម្ពុជា ជាមួយក្រសួងដែនដីនគររូបនីយកម្មនិងសំណង់។ បើតាមលោក ខៀវ សុភ័គ បច្ចុប្បន្នក្រសួងដែនដី និងអង្គការសមធម៌កំពុងធ្វើការលើគម្រោងដោះស្រាយដីធ្លីជាមួយគ្នា។
សូមបញ្ជាក់ថា ក្រសួងមហាផ្ទៃ នៅថ្ងៃទី២៨ខែកញ្ញាឆ្នាំ២០១៧ បានប្រកាសផ្អាកសកម្មភាពរបស់អង្គការសមធម៌កម្ពុជាបណ្ដោះអាសន្ន ក្រោមហេតុផលថា អង្គការនេះធ្វើសកម្មភាពផ្ទុយពីខ្លឹមសារច្បាប់ដែលបានតម្កល់ទុកនៅក្រសួងមហាផ្ទៃ។ ភាពត្រឹមត្រូវស្របច្បាប់ដែលក្រសួងមហាផ្ទៃចង់ឲ្យប្រធានអង្គការសមធម៌បង្ហាញនោះគឺ លេខគណនេយ្យធនាគារសម្រាប់ប្រតិបត្តិការ និងផ្ដល់របាយការណ៍បូកសរុបសកម្មភាពការងារ ក៏ដូចជារបាយការណ៍ហិរញ្ញវត្ថុ។ ក្រៅពីនោះ អង្គការនេះក៏ត្រូវផ្ដល់នូវរបាយការណ៍សកម្មភាពរបស់អង្គការ ពាក់ព័ន្ធនឹងជម្លោះរវាងក្រុមហ៊ុន PHNOM PENH SUGER ដែលជាក្រុមហ៊ុន លោកឧកញ៉ាលី យ៉ុងផាត់ ទទួលបានដីសម្បទានពីរដ្ឋាភិបាល និងប្រជាពលរដ្ឋនៅស្រុកឱរ៉ាល់ ខេត្តកំពង់ស្ពឺ។
កន្លងមកក្រសួងមហាផ្ទៃធ្លាប់បញ្ជាក់ថា ការផ្អាកបណ្ដោះអាសន្ន សកម្មភាពរបស់អង្គការសមធម៌កម្ពុជា ធ្វើឡើងបន្ទាប់ពីក្រសួងទទួលបានពាក្យបណ្ដឹងរបស់ប្រជាពលរដ្ឋជាជនជាតិដើមភាគតិចសួយ រស់នៅស្រុកឱរ៉ាល់ ខេត្តកំពង់ស្ពឺ កាលពីថ្ងៃទី៣០ខែសីហាឆ្នាំ២០១៧។ សូមបញ្ជាក់ថា ប្រជាពលរដ្ឋដែលបានដាក់ពាក្យបណ្ដឹងនេះ ធ្លាប់បានឡើងមកតវ៉ាដល់ទីស្នាក់ការអង្គការសមធម៌កម្ពុជានៅភ្នំពេញ ដោយបានចោទអង្គការនេះថា ញុះញង់សហគមន៍ដែលមានជម្លោះលើដីធ្លីជាមួយលោកឧកញ៉ាលី យ៉ុងផាត់។ ប៉ុន្តែRFI មិនស្វែងរកការបំភ្លឺពីតំណាងអង្គការសមធម៌បាននៅឡើយ។ សមធម៌គឺជាអង្គការតស៊ូមតិ ការពារសិទ្ធិលំនៅឋាន ដីធ្លី និងធនធានធម្មជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ