សិទ្ធិនារី៖ក្រសួងយុត្តិធម៌ពិនិត្យលទ្ធភាពឈានទៅដល់ការដោះលែងនិងបន្ធូរបន្ថយទណ្ឌិតជាស្ត្រី
នៅក្នុងឱកាសទិវាសិទ្ធិនារីអន្តរជាតិ៨មិនានេះ ក្រសួងយុត្តិធម៌នៅថ្ងៃទី៧មិនាម្សិលមិញបានជួបប្រជុំជាមួយភាគីពាក់ព័ន្ធពិនិត្យលទ្ធភាពដើម្បីឈានទៅដោះលែងនិងបន្ធូរទោសទណ្ឌិតជាស្ត្រី នៅថ្ងៃខាងមុខ។ សម្រាប់សង្គមស៊ីវិលលើកឡើងថា នេះជាការចាប់ផ្ដើមមួយល្អ ប៉ុន្តែលទ្ធភាពនៃការត្រួតពិនិត្យដើម្បីឈានទៅដល់ការដោះលែងនិងបន្ធូរបន្ថយទោស ទណ្ឌិតជាស្ត្រីគួរតែធ្វើការត្រួតពិនិត្យឲ្យបានទៀងទាត់។
ចុះផ្សាយនៅថ្ងៃ៖
លោក នុត សវនា អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃបានប្រាប់វិទ្យុបារាំងនៅថ្ងៃសុក្រនេះថា គេនៅមិនទាន់មានតួលេខផ្លូវការបញ្ជាក់ពីការបន្ធូរបន្ថយនឹងលើកលែងទោសទណ្ឌិតជាស្ត្រីនៅឡើយទេគិតមកដល់ពេលនេះ។ តែក្នុងការចូលរួមអបអរទិវាសិទ្ធិនារីអន្តរជាតិ៨មិនានេះ ភាគីពាក់ព័ន្ធបានយកឱកាសនេះ ត្រួតពិនិត្យលទ្ធភាពជាក់ស្ដែងដើម្បីឈានទៅដល់ការដោះលែង និងបន្ធូរបន្ថយទោសទណ្ឌិតជាស្ត្រី សម្រាប់ថ្ងៃបន្តបន្ទាប់។
ចំពោះអ្នកទោស ដែលអាចមានអាទិភាពច្រើន ក្នុងទទួលបានការលើកលែងទោសនេះ គឺជាស្ត្រីពពោះ ស្ត្រីដែលមានកូនរស់នៅក្នុងពន្ធនាគារ ចាស់ជរា និងអ្នកជាប់ពន្ធនាគារ ដែលកំពុងមានជំងឺជាប់ខ្លួនជាដើម។ នេះជាការបញ្ជាក់របស់លោក ជិន ម៉ាលីន អ្នកនាំពាក្យក្រសួយុត្តិធម៌។ គួរជម្រាបជូនថា បច្ចុប្បន្នអ្នកទោសសរុបមានចំនួន៣១២២៦នាក់ ខណៈអ្នកទោសជាស្រ្តីមានចំនួនប្រមាណ២៥១៤នាក់ភាគច្រើនបណ្ដាលមកពីបទល្មើសគ្រឿងញៀន។
ជាការកត់សម្គាល់ថា ការត្រួតពិនិត្យដើម្បីឈានទៅដល់ការបន្ធូរបន្ថយនិងដោះលែងស្ត្រីនៅក្នុងឱកាសសិទ្ធិនារីអន្តរជាតិ៨មិនានេះធ្វើឡើងបន្ទាប់ពីប្រមុខរដ្ឋាភិបាលលោកនាយករដ្ឋមន្ត្រី ហ៊ុន សែន ផ្ដល់យោបល់ថា ទណ្ឌិតជាស្ត្រីគប្បីយកចិត្តទុកដាក់ពិនិត្យសម្រាលទោសឬលើកលែងទោស ដោយមិនចាំបាច់រង់ចាំ ដល់ពេលបុណ្យជាតិធំៗនោះទេ។
លោក សឹង សែនករុណា អ្នកនាំពាក្យសមាគមការពារសិទ្ធិមនុស្សអាដហុកលើកឡើងថា ភាពចង្អៀតណែននៅក្នុងពន្ធគារដែលមានកូនតូចនៅជាមួយ គឺជាផ្នែកមួយប៉ះពាល់ដល់ស្ត្រីផងដែរ។ ដូច្នេះប្រសិនបើអ្នកទោសជាស្ត្រីមួយចំនួនមានទោសស្រាលមិនគួរឃុំខ្លួនឡើយដោយគ្រាន់តែជំនួសមកវិញនូវទោសសហគម ឬដោះលែងឲ្យនៅក្រៅឃុំ។
ដោយឡែក នៅក្នុងការរួមចំណែកដោះស្រាយបញ្ហាស្ត្រីជាប់កំពុងជាប់ឃុំលោក ហ៊ុន បានសម្រេចបង្កើតក្រុមមេធាវីដើម្បីការពារក្ដីស្ត្រីក្រីក្រ កាលពីថ្ងៃទី៥ មីនា ក្នុងឱកាសអញ្ជើញ ប្រារព្ធទិវានារីអន្តរជាតិ៨មីនា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ