ចូលឆ្នាំចិន៖ អាជ្ញាធរត្រៀមរថយន្តពន្លត់អគ្គិភ័យជាង៣០០គ្រឿងនិងកម្លាំងអន្តរាគមន៍ជាង១ពាន់នាក់
អគ្គស្នងការនគរបាលជាតិ ត្រៀមបញ្ចេញរថយន្តពន្លត់អគ្គិភ័យ៣៣៨គ្រឿង និងកម្លាំងអន្តរាគមន៍មានចំនួន១៣៣៩នាក់ នៅទូទាំងប្រទេស ដើម្បីត្រៀមឆ្លើយតបករណីអគ្គិភ័យ និងបញ្ហាផ្សេងៗដែលកើតឡើងក្នុងអំឡុងពេលបីថ្ងៃនៃពិធីបុណ្យចូលឆ្នាំចិនវៀតណាម ដែលចាប់ផ្ដើមនៅថ្ងៃទី៤ដល់ថ្ងៃទី៧ខែកុម្ភៈ។ បន្ថែមលើនេះ អាជ្ញាធរក៏បានអំពាវឲ្យពលរដ្ឋខ្មែរដែលជាប់សែស្រឡាយចិននិងវៀតណាម ប្រុងប្រយ័ត្នចំពោះភ្លើងធូបនិងបណ្ដាញអគ្គិសនីជាដើម។
ចុះផ្សាយនៅថ្ងៃ៖
ស្តាប់ - ០១:៥៧
ក្នុងចំណោមរថយន្តពន្លត់អគ្គិភ័យ៣៣៨គ្រឿងដែលត្រៀមប្រតិបត្តិការពន្លត់អគ្គិភ័យក្នុងឱកាសនៃពិធីបុណ្យចូលឆ្នាំចិនទូទាំងប្រទេសនេះ គឺនៅរាជធានីភ្នំពេញ អាជ្ញាធរបានដាក់រថយន្តពន្លត់អគ្គិភ័យនិងរថយន្តសង្គ្រោះជិត៤០គ្រឿងមកពីគ្រប់អង្គភាពពាក់ព័ន្ធ ដើម្បីប្រតិបត្តិការនៅគោលដៅចំនួន៨។ គោលដៅចំនួន៨នោះរួមមាន ខណ្ឌឬស្សីកែវ ខណ្ឌទួលគោក ខណ្ឌដង្កោ ខណ្ឌពោធិ៍សែនជ័យ ខណ្ឌច្បារអំពៅ និងនាយកដ្ឋានអង្គរក្សជាដើម។
លោក នេត្រ វណ្ណថា ប្រធាននាយកដ្ឋាននគរបាលបង្ការ ពន្លត់អគ្គិភ័យ និងសង្រ្គោះ នៃក្រសួងមហាផ្ទៃបានឲ្យដឹងថា ការណ៍ដែលអាជ្ញាធរត្រៀមរថយន្តពន្លត់អគ្គិភ័យជិត៤០គ្រឿងប្រចាំការនៅរាជធានីភ្នំពេញ ព្រោះរាជធានីភ្នំពេញជាកន្លែងប្រមូលផ្ដុំ សំបូរទៅដោយពលរដ្ឋខ្មែរជាប់សែស្រឡាយចិន ខណៈដែលរាល់ឆ្នាំអគ្គិភ័យនៅភ្នំពេញកើតឡើងញឹកជាងនៅតាមបណ្ដាខេត្ត។
មូលហេតុចំបងដែលនាំឲ្យអគ្គិភ័យកើតឡើងមិនដែលខាន ក្នុងឱកាសនៃពិធីសែនចូលឆ្នាំចិន គឺការធ្វេសប្រហែសរបស់ពលរដ្ឋ ដែលសកម្មភាពទាំងនោះផ្សារភ្ជាប់ទៅនឹងការដុតធូបទៀន និងក្រដាសសែនជាដើម។ ឆ្លៀតឱកាសនេះ នាយកដ្ឋាននគរបាលបង្ការ ពន្លត់អគ្គិភ័យ និងសង្រ្គោះ នៃក្រសួងមហាផ្ទៃ បានអំពាវនាវឲ្យពលរដ្ឋនិងអាជីវករ កុំប្រើប្រាស់និងលក់សាធាតុផ្ទុះ ដែលអាចបង្កគ្រោះអគ្គិភ័យ។
ជាមួយគ្នានេះ សាលារាជធានីភ្នំពេញ បានអំពាវនាវដល់ពលរដ្ឋ មិនត្រូវដុតផាវ កាំជ្រួច ឬបង្កសំឡេងផ្ទុះគ្រប់ប្រភេទ ព្រមទាំងមិនឲ្យលេងល្បែងស៊ីសង។ ដោយឡែក រាល់ការហែក្បួនផ្សេងៗ ទាំងបែបសាសនាឬប្រពៃណីដែលគ្មានការអនុញ្ញាត ក៏ត្រូវបានហាមឃាត់ផងដែរ។
សូមជម្រាបថា ៣ឆ្នាំចុងក្រោយនៃពិធីបុណ្យចូលឆ្នាំចិន ដោយរាប់ចាប់តាំងពីឆ្នាំ២០១៦ដល់២០១៨ អគ្គិភ័យកើតឡើងជិត៦០លើកនៅទូទាំងប្រទេស ប៉ុន្តែមិនមានមនុស្សស្លាប់ឡើយ។ ដោយឡែកសម្រាប់រយៈពេល១ខែដើមឆ្នាំ២០១៩នេះ អគ្គិភ័យទូទាំងប្រទេសកើតឡើង៥០លើក បណ្ដាលឲ្យមនុស្ស៣នាក់បានស្លាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ