រដ្ឋាភិបាលកម្ពុជា តម្រូវឲ្យស្ថាប័នហិរញ្ញវត្ថុ ផ្តល់គណនីរបស់ជនជាតិអាមេរិក
រដ្ឋាភិបាលកម្ពុជា បានតម្រូវឲ្យ ធនាគារ សហគ្រាសធានារ៉ាប់រង និងគ្រឹះស្ថានហិរញ្ញវត្ថុ នៅកម្ពុជា ត្រូវបញ្ជូនព័ត៌មាន អំពីគណនីជនជាតិអាមេរិកនៅកម្ពុជា មកឲ្យអគ្គនាយកដ្ឋានពន្ធដារឲ្យបានមុនថ្ងៃទី២៩ ខែមីថុនា ឆ្នាំ២០១៨ជាកំហិត។ ការតម្រូវបែបនេះគឺធ្វើឡើងទៅតាមការចង់បានរបស់រដ្ឋាភិបាលសហរដ្ឋអាមេរិកក្នុងការតម្រូវឲ្យពលរដ្ឋខ្លួនបង់ពន្ធចូលរដ្ឋ។
ចុះផ្សាយនៅថ្ងៃ៖
ស្តាប់ - ០១:៥៣
បើតាមសេចក្តីជូនដំណឹងរបស់អគ្គនាយកដ្ឋានពន្ធដារកម្ពុជា កាលពីថ្ងៃទី៣ ខែមេសា ការបញ្ជូននេះធ្វើឡើងតាមកិច្ចព្រមព្រៀងរវាងរាជរដ្ឋាភិបាលកម្ពុជា និងរដ្ឋាភិបាលសហរដ្ឋអាមេរិក ដើម្បីធ្វើឲ្យប្រសើរឡើងនូវអនុលោមភាពពន្ធអន្តរជាតិ និងដើម្បីអនុវត្តច្បាប់ស្តីអនុលោមភាពពន្ធចំពោះគណនីក្រៅប្រទេសអាមេរិក (FATCA)។ ព័ត៌មានគណនីក្នុងឆ្នាំ២០១៧កន្លងទៅនេះ នឹងត្រូវអគ្គនាយកដ្ឋានពន្ធដារកម្ពុជា បញ្ជូនបន្តទៅអាជ្ញាធរចំណូលក្នុងសុ្រកអាមេរិក។
លោកស្រី ប៊ុន នារី អគ្គនាយិការងនៃអគ្គនាយកដ្ឋានពន្ធដារ បានថ្លែងប្រាប់វិទ្យុបារាំងអន្តរជាតិថា តាមរយៈកិច្ចព្រមព្រៀងជាមួយរដ្ឋាភិបាលអាមេរិក ប្រទេសនីមួយៗត្រូវបញ្ជូនព័ត៌មានគណនីរបស់ជនជាតិអាមេរិកតាមប្រទេសទាំងនោះ ទៅកាន់រដ្ឋាភិបាលអាមេរិក ក្នុងគោលបំណងពន្ធដាររបស់អាមេរិក។ លោកស្រីបន្ថែមថា សម្រាប់រដ្ឋាភិបាលកម្ពុជា នេះគឺជាកិច្ចសហប្រតិបត្តិការ ដែលមិនមានប្រយោជន៍ ឬចំណូលអ្វីដល់រដ្ឋាភិបាលកម្ពុជានោះទេ ប៉ុន្តែជាការជួយរដ្ឋាភិបាលអាមេរិក។
សេចក្តីជូនដំណឹងរបស់អគ្គនាយកដ្ឋានពន្ធដារកម្ពុជា បញ្ជាក់ថា ក្នុងករណីហួសកាលកំណត់ខាងលើនេះ ធនាគារ សហគ្រាសធានារ៉ាប់រង និងគ្រឹះស្ថានហិរញ្ញវត្ថុ ដែលស្ថិតនៅក្រោមកាតព្វកិច្ចរាយការណ៍អនុលោកតាមកិច្ចព្រមព្រៀង ត្រូវទទួលខុសត្រូវដោយខ្លួនឯងចំពោះការពិន័យនានា។
នៅក្នុងប្រទេសកម្ពុជា នាឆ្នាំ២០១៧ មានគ្រឹះស្ថានហិរញ្ញវត្ថុចំនួន១១៧ ដែលត្រូវរាយការណ៍ពីព័ត៌មានគណនីជនជាតិអាមេរិកមកអគ្គនាយកដ្ឋានពន្ធដារ។ នេះបើតាមគេហទំព័រស្តីពីកិច្ចព្រមព្រៀងខាងលើ។
សូមជម្រាបជូនថា រាជរដ្ឋាភិបាលកម្ពុជា និងរដ្ឋាភិបាលសហរដ្ឋអាមេរិក បានចុះហត្ថលេខាលើកិច្ចព្រមព្រៀងស្តីពីការធ្វើឱ្យប្រសើរឡើងអនុលោមភាពពន្ធអន្តរជាតិ និងដើម្បីអនុវត្តច្បាប់ស្តីពីអនុលោមភាពពន្ធចំពោះគណនីក្រៅប្រទេសរបស់អាមេរិក កាលពីថ្ងៃទី១៤ ខែកញ្ញា ឆ្នាំ២០១៥កន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ