លោក ហ៊ុន សែន ដាក់ចេញកញ្ចប់វិធានការកែទម្រង់សេដ្ឋកិច្ច ដើម្បីពង្រឹងភាពប្រកួតប្រជែង
លោកនាយករដ្ឋមន្ត្រី ហ៊ុន សែន នៅថ្ងៃទី ២៩ មីនា នេះ បានប្រកាសដាក់ចេញនូវកញ្ចប់វិធានការកំណែទម្រង់ជិត២០ចំណុច សំដៅលើកកម្ពស់ការវិនិយោគនៅកម្ពុជា និងជាអ្វីដែលគេជឿថា ជាវិធានការដើម្បីត្រៀមទប់ទល់ ពេលកម្ពុជាបាត់បង់ប្រព័ន្ធអនុគ្រោះពន្ធ EBA។ បើតាមលោកនាយករដ្ឋមន្ត្រីសរុបជារួមមក កាត់បន្ថយលើថ្លៃសេវាកម្ម និងកំណែទម្រង់សេដ្ឋកិច្ចក្នុងដំណាក់កាលទី១នេះ នឹងធ្វើឲ្យវិស័យឯកជនកាត់បន្ថយការចំណាយនានា ដែលគិតជាទឹកប្រាក់ជាង៤០០លានដុល្លារអាមេរិក។
ចុះផ្សាយនៅថ្ងៃ៖
ដើម្បីរក្សាការវិនិយោគទុនក្នុងស្រុក និងជាអ្វីដើម្បីទប់ទល់ក្នុងគ្រាដែលកម្ពុជាត្រូវបាត់បង់ប្រព័ន្ធអនុគ្រោះពន្ធ (EBA) ពីសហភាពអឺរ៉ុបដោយប្រការណាមួយនោះ ប្រមុខរដ្ឋាភិបាលកម្ពុជាលោក ហ៊ុន សែន នៅថ្ងៃទី ២៩ មីនានេះ បានដាក់ចេញនូវវិធានការជិត២០ចំណុច ដើម្បីកាត់បន្ថយការចំណាយរបស់ក្រុមហ៊ុនឯកជនដែលកំពុងរកស៊ីនៅកម្ពុជា។ ក្នុងនោះរួមមាន ការកែសម្រួលស្ថាប័នគយ ការដកកាំកុងត្រូលចេញពីតាមច្រកព្រំដែន និងការលុបចោលនូវភ្នាក់ងារកម្ពុជានាវាចរ ហៅកាត់ថា កាំសាប ជាដើម។ ជាអ្វីដែលលោកនាយករដ្ឋមន្ត្រី ហ៊ុន សែន បានចាត់ទុកថា គឺជាកំណែទម្រង់ដ៏មុតស្រួច ដើម្បីកាត់បន្ថយការចំណាយថវិកា និងពេលវេលាផងដែរ។
បន្ថែមលើនេះ ក៏មានដែរ ការកាត់បន្ថយការស្កេន (Scen) ទំនិញតាមទូកុងតឺន័រ ដែលត្រូវដឹកចេញ ឬនាំចូល ជាពិសេសការនាំចេញផលិតផលសម្លៀកបំពាក់និងស្បែកជើង ការកាត់បន្ថយថ្លៃសេវាលើកដាក់នៅតាមកំពង់ផែ ការដឹកជញ្ជូនតាមផ្លូវទឹក ការកាត់បន្ថយថ្លៃអគ្គិសនី ការអភិវឌ្ឍន៍សហគ្រាសធន់តូចនិងមធ្យម ការកាត់បន្ថយថ្ងៃឈប់សម្រាកសម្រាប់បុណ្យជាតិ ការកាត់បន្ថយការចុះធ្វើអធិការកិច្ចនៃស្ថាប័នចម្រុះឲ្យមកនៅក្រោមស្ថាប័នតែមួយ រួមទាំងការលើកលែង និងកាត់បន្ថយការចំណាយលើសេវាកម្មផ្សេងៗទៀត។
បើតាមលោកនាយករដ្ឋមន្ត្រី ហ៊ុន សែន សរុបជារួមមក ការដាក់ចេញនូវកញ្ចប់វិធានការកំណែទម្រង់ក្នុងដំណាក់កាលទី១នេះ នឹងធ្វើឲ្យវិស័យឯកជនកាត់បន្ថយការចំណាយនានា ដែលគិតជាទឹកប្រាក់សរុបជាង៤០០លានដុល្លារ បើទោះបីជាកម្ពុជាត្រូវប្រឈមនឹងការបាត់បង់ EBA ដែលកម្ពុជាបានរួចថ្លៃបង់ពន្ធប្រមាណជា៦០០លានដុល្លារក្នុងមួយឆ្នាំៗក៏ដោយ។
បើតាមលោកនាយករដ្ឋមន្ត្រី ហ៊ុន សែន វិធានការកែទម្រង់សេដ្ឋកិច្ចដំណាក់កាលទី០១នេះ គឺដើម្បីពង្រឹងភាពប្រកួតប្រជែងនិងកំណើនសេដ្ឋកិច្ចរបស់កម្ពុជា ខណៈអ្នកវិភាគបានមើលឃើញថា ជាវិធានការដើម្បីទប់ទល់ក្នុងគ្រាដែលកម្ពុជាត្រូវបាត់បង់ប្រព័ន្ធអនុគ្រោះពន្ធពីសហភាពអឺរ៉ុបដោយប្រការណាមួយនោះ។
នៅក្នុងវេទិការដ្ឋាភិបាលនិងផ្នែកឯកជនលើកទី១៨ ដែលប្រព្រឹត្តទៅនៅវិមានសន្តិភាពនៅថ្ងៃទី ២៩ មីនានេះ លោក ហ៊ុន សែន បានបញ្ជាក់ជាថ្មីថា «កម្ពុជាមិនអាចយកឯករាជ្យ អធិបតេយ្យភាពជាតិទៅដោះដូរ (EBA) អ្វីទាំងអស់ បើទោះបីជាត្រូវរស់ក្នុងភាពអត់ឃ្លានក៏ដោយ»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ