សង្គមស៊ីវិលនាំគ្នាទៅគោរពវិញ្ញាណក្ខន្ធលោក កែម ឡី ដល់កន្លែងគេបាញ់សម្លាប់
មួយថ្ងៃមុនខួបមួយឆ្នាំនៃការបាញ់សម្លាប់ លោកបណ្ឌិតកែម ឡី នៅព្រឹកថ្ងៃអាទិត្យទី៩កក្កដានេះ ក្រុមអង្គការ សង្គមស៊ីវិល សហជីព និងក្រុមយុវជន មួយចំនួន បាននាំគ្នាទៅគោរពវិញ្ញាណក្ខន្ធលោក កែម ឡី នៅស្តាម៉ាត់ស្តុបបូកគោជាទីដែលខ្មាន់កាំភ្លើងបាញ់សម្លាប់លោកនៅទីនោះ។ តែយ៉ាងណាក៏ដោយ កម្លាំងសន្តិសុខខណ្ឌចំការមនបានរារាំងមិនឲ្យការគោរពវិញ្ញាណក្ខន្ធធ្វើលើសពេល២០នាទីឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
នៅក្នុងពេលគោរពវិញ្ញាណក្ខន្ធនោះមានការទាស់ពាក្យសម្ដីគ្នារវាងអ្នកចូលរួមនិងកម្លាំងសន្តិសុខខណ្ឌចំការមន តែមិនបានឈានដល់ការប្រើហិង្សានោះទេ។ ភាគីទាំងពីរបានលើកហេតុផលត្រូវរៀងខ្លួន។ ចំពោះអាជ្ញាធរដែលមានគ្នាប្រហែល៣០នាក់ថា ការគោរពវិញ្ញាណក្ខន្ធ លោក កែម ឡី ដោយមានការដាក់កម្រងផ្កា និងរូបថតនេះ ជាសកម្មភាពខុសច្បាប់គ្មានការអនុញ្ញាតពីសាលាក្រុងភ្នំពេញ។ ហើយថា ប្រសិនបើសកម្មភាពថ្ងៃនេះមានការជូនដំណឹងមុនទៅសាលាក្រុងនោះអាជ្ញាធរ និងជួយសម្របសម្រួល ឬការពារថែមទៀតផង។
ចំណែកខាងសហជីពអះអាងថា អ្វីដែលខ្លួនកំពុងតែធ្វើនៅពេលនេះ មិនមែនជារឿងខុសច្បាប់ទេដោយគ្រាន់តែដាក់ផ្កា និងរូបថតនោះ ព្រោះនេះគ្រាន់តែជាការគោរពវិញ្ញាណក្ខន្ធក្នុងន័យបែបសាសនាប៉ុណ្ណោះ។ ខុសច្បាប់លុះត្រាតែមានការកាន់កាប់អាវុធមកជាមួយ។
អ្នកស្រី អ៊ូ ទេពផល្លីន មន្ត្រីសហព័ន្ធសហជីពកម្មករ និងសេវាកម្មកម្ពុជា បានហៅការរារាំងរបស់អាជ្ញាធរជាទង្វើ មួយហួសហេតុព្រោះខាងក្រុមហ៊ុនកាល់តិចបានអនុញ្ញាត្តឲ្យមានដាក់កម្រងផ្កា ឬរូបថតនៅកន្លែងគេបាញ់សម្លាប់ លោកកែម ឡី នេះហើយ។ តាមគម្រោង សហជីពបំរុងដាក់រូបថតលោក កែម ឡី មួយថ្ងៃមួយយប់នៅក្នុងស្តាម៉ាត់នេះតែម្ដង តែតំណាងក្រុមសន្តិសុខម្នាក់និយាយក្នុងលក្ខខណ្ឌមិនបញ្ចេញឈ្មោះគូសបញ្ជាក់ថា មិនមែនអាជ្ញាធរមិនអនុញ្ញាតឲ្យមានការគោរពវិញ្ញាណក្ខន្ធនោះទេគឺសកម្មភាពនេះអាចធ្វើបានត្រឹមរយៈពេលមួយខ្លីប៉ុណ្ណោះ ចាប់ពី១៥ទៅ២០នាទី។
ដោយឡែកទាក់ទងពិធីបុណ្យខួប១ឆ្នាំរបស់ លោក កែម ឡី នៅឯស្រុកកំណើតវិញគិតរហូតមកដល់រសៀលនេះចំនួនអ្នកចូលរួមប្រហែលជា៥០០នាក់មកពីខេត្តផ្សេងៗ។ នេះបើតាមការបញ្ជាក់របស់លោក កែម រិទ្ធីសិទ្ធិ ប្អូនប្រុសលោកកែម ឡី។ លោកបន្ថែមថា នៅថ្ងៃស្អែកដែលជាថ្ងៃបង្ហើយបុណ្យនឹងមានការរាប់បាត្រព្រះសង្ឃ៥១អង្គឲ្យត្រូវនឹងអាយុលោក កែម ឡី ៥១ឆ្នាំ។ គួររម្លឹកថា លោកបណ្ឌិតកែម ឡី អ្នកវិភាគសង្គមនិងនយោបាយត្រូវបានខ្មាន់កាំភ្លើងបាញ់សម្លាប់កាលពីថ្ងៃទី១០កក្កដា នៅក្នុងស្តាម៉ាតស្តុបបូកគោ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ