ពលរដ្ឋខ្មែរមួយក្រុមនៅអូស្រ្តាលីធ្វើបាតុកម្ម ខណៈមួយក្រុមទៀតអបអរថ្ងៃ៧មករា
ពលរដ្ឋខ្មែរនៅអូស្ត្រាលី គ្រោងធ្វើបាតុកម្មនៅល្ងាចថ្ងៃសៅរ៍នេះ ដើម្បីប្រឆាំងនឹងការប្រារព្ធទិវា ៧ មករា របស់គណបក្សប្រជាជនកម្ពុជានៅលើទឹកដីអូស្ត្រាលី។ អ្នករៀបចំបាតុកម្មចាត់ទុក៧មករា ថាជាថ្ងៃដែលវៀតណាមឈ្លានពានទឹកខ្មែរ និងរៀបចំសម្លាប់ខ្មែរតាមរយៈផែនការ ក៥។ ប៉ុន្តែខ្មែរមួយក្រុមទៀតដែលនឹងរៀបចំអបអរខួប៧មករានេះនៅអូស្ត្រាលីដែរ បានចាត់ទុកបាតុកម្មនេះថា ធ្វើឡើងដោយមនុស្សច្រឡំប្រវត្តិសាស្ត្រ។
ចុះផ្សាយនៅថ្ងៃ៖ កែប្រែថ្ងៃទី៖
បាតុកម្មដែលថាមានមនុស្សចូលរួមរាប់រយនាក់នេះរៀបចំឡើងដោយសហព័ន្ធខ្មែរអូស្ត្រាលីសាជីវកម្ម ប្រព្រឹត្តិទៅចាប់ពីម៉ោង៥ល្ងាច ម៉ោងនៅអូស្ត្រាលី នៅមុខភោជនីយដ្ឋាន Maxim Saigon ក្នុងទីក្រុងស្ព្រីងវែល នៃរដ្ឋវ៉ិកតូរីយ៉ា។
លោក ជា យូហន ជាអភិបាលក្រុងស្ព្រីងវែល គឺជាអ្នកដឹកនាំបាតុកម្មម្នាក់ ត្រូវបានស្រង់សំដីថា ការដែលសម្រេចធ្វើបាតុកម្មប្រឆាំងថ្ងៃ៧មករានៅមុខភោជនីយដ្ឋាន Maxim Saigon ដោយលោកទទួលដំណឹងថា ក្រុមមន្ត្រីនៃរដ្ឋាភិបាលកម្ពុជានឹងរៀបចំអបអរថ្ងៃទី៧ មករា នៅក្នុងភោជនីយដ្ឋាននោះដែរ។
បើតាម លោក ជា យូហន បាតុកម្មនេះគឺមានការចូលរួមពីពលរដ្ឋខ្មែរនៅអូស្ត្រាលីក្នុងនៅរដ្ឋ វីកតូរីយ៉ា ក្រុមការងារ ២៣ តុលា គណបក្សសង្គ្រោះជាតិ និងពលរដ្ឋខ្មែរមកពីរដ្ឋផ្សេងទៀតនៃប្រទេសនេះ ដែលមានចំនួនរាប់រយនាក់។
ពីខាងសមាគមខ្មែរមួយទៀតនៅអូស្ត្រាលី ដែលមិនគាំទ្របាតុកម្មនេះ បានប្រាប់វិទ្យុបារាំងអន្តរជាតិ RFI ថា ការធ្វើបាតុកម្មរបស់ខ្មែរនៅអូស្ត្រាលីនេះ គឺមិនឆ្លុះបញ្ចាំងពីទស្សនៈរបស់ពលរដ្ឋខ្មែរទាំងអស់នៅប្រទេសនេះទេ។ លោក លឹម សំអាត ប្រធានសមាគមយុវជនខ្មែរស៊ីដនី បានអះអាងថា អ្នកដែលធ្វើបាតុកម្មប្រឆាំងនឹងថ្ងៃ៧មករា គឺជាអ្នកច្រឡំប្រវត្តិសាស្ត្រ។ សម្រាប់ប្រធានសមាគមយុវជនរូបនេះ វៀតណាមមិនមែនជាអ្នកសម្លាប់ខ្មែរឡើយ គឺខ្មែរក្រហមទេ ដែលជាអ្នកសម្លាប់ខ្មែរ។ ប៉ុន្តែលោក ជា យូហន ជាអភិបាលក្រុងស្ព្រីងវែល នៃរដ្ឋវ៉ិកតូរីយ៉ា បានថ្លែងថា «បើយើងស្ដាប់សំដីលោក ប៉ែន សុវណ្ណ គាត់បាននិយាយច្បាស់ហើយ ថ្ងៃ ៧ មករានេះ ជាថ្ងៃដែលយួន (វៀតណាម) ចូលមកឈ្លានពានទឹកដីកម្ពុជាយើង ហើយដែលនាំឲ្យមានផែនការក៥ ដែលសម្លាប់ខ្មែរក្រោយថ្ងៃ៧មករាឆ្នាំ១៩៧៩» ។
សូមបញ្ជាក់ថា នេះមិនមែនជាបាតុកម្មលើកទី១ទេ របស់ខ្មែរនៅអូស្ត្រាលី។ កាលពីឆ្នាំ២០១៨ ក្រុមដដែលក៏បានធ្វើបាតុកម្មផងដែរ ប្រឆាំងនឹងវត្តមានលោកនាយករដ្ឋមន្រ្តី ហ៊ុន សែន ដែលទៅទស្សនៈកិច្ចនៅទីនោះ បន្ទាប់ពីពួកគេធ្វើបាតុកម្មប្រឆាំងនឹងការបោះឆ្នោតនៅកម្ពុជា និងបាតុកម្មជំរុញឲ្យស្វែងរកយុត្តិធម៌ជូនលោក កែម ឡី ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ