ខ្មែរមួយក្រុមប្រកាសស្វាគមន៍ ខណៈមួយក្រុមទៀតត្រៀមដុតទីងមោង ពេល លោក ហ៊ុន សែន ទៅអូស្រ្តាលី
ពលរដ្ឋខ្មែរ-អូស្ត្រាលីមួយក្រុមបានប្រកាសគាំទ្រ និងស្វាគមន៍ដំណើរទស្សនៈកិច្ចរបស់លោកនាយករដ្ឋមន្រ្តីហ៊ុន សែន ទៅកាន់ប្រទេសអូស្រ្តាលីនៅពាក់កណ្តាលខែមីនាខាងមុខ ខណៈដែលពលរដ្ឋខ្មែរ-អូស្រ្តាលីមួយក្រុមទៀត បានត្រៀមធ្វើបាតុកម្មដោយដុតរូបទីងមោង ប្រឆាំងនឹងវត្តមានមេដឹកនាំកម្ពុជារូបនេះ។ ការប្រកាសជំហរផ្ទុយគ្នាបែបនេះ គឺក្រោយពេលដែលលោកនាយករដ្ឋមន្រ្តី ហ៊ុន សែន បានព្រមានទុកជាមុនហើយថា លោកនឹងតាមវាយដល់ផ្ទះ បើមានការតវ៉ាដោយដុតរូបទីងមោងតំណាងរូបលោកមែននោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
យោងតាមសេចក្តីថ្លែងការណ៍រួមរបស់សមាគមខ្មែរ-អូស្រ្តាលីមួយដែលបង្កើតឡើងដោយកូនប្រុសលោកនាយករដ្ឋមន្រ្តី ហ៊ុន សែន នាពេលថ្មីៗនេះ គឺសមាគមពលរដ្ឋខ្មែរទាំង៧ដែលមានមូលដ្ឋាននៅប្រទេសអូស្រ្តាលី និងណូវ៉ែលហ្សេឡង់ បានចាត់ទុកថា វត្តមានរបស់លោក ហ៊ុន សែន នៅអូស្រ្តាលី គឺជាកិត្តិយសជាតិ ដែលកម្ពុជាបង្ហាញមុខមាត់លើឆាកអន្តរជាតិ។
ទន្ទឹមនឹងគ្នានោះ សមាគមដដែលនេះ ក៏បានប្រកាសប្រឆាំងដាច់ខាតនូវរាល់ការប៉ុនប៉ងរៀបចំសកម្មភាពណាមួយប្រឆាំងនឹងវត្តមានលោក ហ៊ុន សែន ក្នុងអំឡុងទស្សនៈកិច្ចផ្លូវការពីថ្ងៃទី១៧ដល់១៨ខែមីនាខាងមុខ។ គឺជាទស្សនៈកិច្ចក្នុងនាមថ្នាក់ដឹកនាំកំពូលនៃប្រទេសមួយក្នុងចំណោមបណ្តាប្រទេសក្នុងតំបន់សម្រាប់កិច្ចប្រជុំកំពូលអាស៊ាន-អូស្រ្តាលី នៅទីក្រុងលស៊ីដនី។
បើតាមសមាគមខ្មែរដែលបង្កើតឡើងដោយ លោក ហ៊ុន ម៉ាណែត ប្រចាំនៅអូស្ត្រាលីនិងណូវ៉ែលហ្សេឡង់នេះ ការធ្វើសកម្មភាពប្រឆាំងនឹង លោក ហ៊ុន សែន គឺមិនឆ្លុះបញ្ចាំងពីទស្សនៈ និងឆន្ទៈរួមរបស់ប្រជាជនខ្មែរដែលកំពុងរស់នៅប្រទេសស៊ីវិល័យទាំងពីរនេះទេ។
ប៉ុន្តែ តំណាងរាស្ត្រម្នាក់ប្រចាំ រដ្ឋវិចតូរីយ៉ា ប្រទេសអូស្រ្តាលី ដែលមានដើមកំណើតខ្មែរ លោក ហុង លីម បានចាត់ទុកសមាគមដែលបង្កើតឡើងដោយកូនប្រុសលោកនាយករដ្ឋមន្រ្តី ហ៊ុន សែន និងឯកអគ្គរាជទូតខ្មែរនៅទីនោះថា ជា”សមាគមខុសច្បាប់”។ លោក ហុង លីម អះអាងថា សមាគមនេះគ្មានបានចុះបញ្ជីនៅក្រសួងមានសមត្ថកិច្ចរបស់អូស្រ្តាលី ហើយក៏មិនបានធ្វើរបាយការណ៍ហិរញ្ញវត្ថុជូនរដ្ឋាភិបាលប្រទេសអូស្រ្តាលី ដែលផ្ទុយនឹងច្បាប់ប្រទេសនេះ។
លោក ហុង លីម ដែលតែងតែរិះគន់ប្រមុខរដ្ឋាភិបាលខ្មែរមិនសំចៃមាត់ បានអះអាងថា ពលរដ្ឋខ្មែរ-អូស្រ្តាលី មួយក្រុមនឹងស្វាគមន៍ លោកនាយករដ្ឋមន្រ្តី ហ៊ុន សែន ជាមួយនឹងការដុតរូបទីងមោង ដូចអ្វីដែល លោក ហ៊ុន សែន បានព្រមានទុកជាមុននោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ