លោក មឿន តុលា ត្រូវបានលើកលែងការចោទប្រកាន់ថាបាត់បច្ច័យបុណ្យ លោក កែម ឡី
នៅទីបំផុត តុលាការក្រុងភ្នំពេញ បានលើកលែង ការចោទប្រកាន់ទៅលើ លោក មឿន តុលា នាយកអង្គការសម្ព័ន្ធភាពការងារ និងសិទ្ធិមនុស្ស ហៅកាត់ថា សង់ត្រាល់ បន្ទាប់ពីរងការចោទប្រកាន់ថា ធ្វើឲ្យបាត់លុយបច្ច័យបុណ្យសព លោក កែម ឡី។នេះបើតាមសេចក្តីប្រកាសរបស់ក្រសួងការងារនៅថ្ងៃនេះ។ ប៉ុន្តែ លោក មឿន តុលា ក៏ចង់ឃើញតុលាការទម្លាក់ចោលការចោទប្រកាន់ទៅលើ លោក ប៉ា ងួនទៀង និងព្រះតេជគុណ ប៊ុត ប៊ុនទិញ ក្នុងសំណុំរឿងនេះផងដែរ។
ចុះផ្សាយនៅថ្ងៃ៖
ស្តាប់ - ០១:៤៨
លោក មឿន តុលា បានប្រាប់វិទ្យុបារាំងអន្តរជាតិRFIពីក្រៅប្រទេសមកថា លោកសារទចំពោះការលើកលែងការចោទប្រកាន់នេះដោយចាត់ទុកថា បានផ្តល់យុត្តិធម៌សម្រាប់រូបលោក។ តែទោះជាយ៉ាងណានេះគ្រាន់តែជាលិខិតរបស់ក្រសួងការងារប៉ុណ្ណោះ ហើយសម្រាប់លោក មឿន តុលា លោកចង់ឃើញមានលិខិតផ្លូវការពីតុលាការ ដោយទម្លាក់ការចោទប្រកាន់មកលើរូបលោក ក៏ដូចជា លោក ប៉ា ងួនទៀង និងព្រះតេជគុណ ប៊ុត ប៊ុនទិញ ផងដែរ។
នៅក្នុងសេចក្តីប្រកាសមួយនៅថ្ងៃទី២៧ខែមេសាឆ្នាំ២០១៨នេះ ក្រសួងការងារបានអះអាងថា ដើម្បីធានាសិទ្ធិសេរីភាពអង្គការវិជ្ជាជីវៈ រដ្ឋាភិបាលកម្ពុជា បានចាត់វិធានការតាមនីតិវិធីតុលាការក្នុងការលើកលែងការចោទប្រកាន់លើលោក មឿន តុលា ពីបទរំលោភលើទំនុកចិត្ត។
ទោះជាយ៉ាងណា នៅមិនទាន់មានការបញ្ជាក់ពីលោក លី សុផាន់ណា អ្នកនាំពាក្យ សាលាដំបូងរាជធានីភ្នំពេញនៅឡើយ។
សូមបញ្ជាក់ថា លោក មឿន តុលា នាយកអង្គការសម្ព័ន្ធភាពការងារ និងសិទ្ធិមនុស្ស លោកប៉ា ងួនទៀង នាយកប្រតិបត្តិនៃមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ (CCIM) និងព្រះតេជគុណ ប៊ុត ប៊ុនតិញ ស្ថាបនិកបណ្តាញព្រះសង្ឃឯករាជ្យ ត្រូវរងបណ្តឹងរបស់លោក ពេជ្រ ស្រស់ ប្រធានគណបក្សយុវជនកម្ពុជា ដោយចោទថាធ្វើឲ្យបាត់បច្ច័យបុណ្យសពលោកបណ្ឌិត កែម ឡី ។ បច្ចុប្បន្ន អ្នកទាំង៣កំពុងស្ថិតនៅក្រៅប្រទេស។
ប៉ុន្តែអតីតសមាជិកគណៈកម្មការបុណ្យសពលោក កែម ឡី ក៏ធ្លាប់បានលើកឡើងថា គណៈកម្មការបុណ្យ បានត្រឹមតែជួយផ្នែកបច្ចេកទេស និងសកម្មភាពទូទៅ មិនមានតួនាទីកាន់លុយបុណ្យនោះទេ ហើយរាល់បច្ច័យទាំងអស់ត្រូវកាន់កាប់ដោយម្ចាស់ដើមបុណ្យ និងបញ្ចូលផ្ទាល់ទៅកាន់គណនីធនាគាររបស់ភរិយានៃសពលោក កែម ឡី។ ចំណែក អ្នកស្រី ប៊ូ រចនា ភរិយា លោក បណ្ឌិត កែម ឡី ក៏ធ្លាប់បញ្ជាក់តាមប្រព័ន្ធផ្សព្វផ្សាយថា ពុំមានការបាត់លុយបច្ច័យបុណ្យដូចការចោទប្រកាន់នោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ