លោក ហ៊ុន សែន ថានឹងយកកិច្ចព្រមព្រៀងក្រុងប៉ារីសទៅបកស្រាយនៅស្វីសចំថ្ងៃ២៣តុលា
មុនពេលដែលកម្ពុជារំឭកខួបលើកទី២៧ឆ្នាំ នៃកិច្ចព្រមព្រៀងសន្តិភាពទីក្រុងប៉ារីស ប្រមុខរដ្ឋាភិបាលកម្ពុជា លោក ហ៊ុន សែន អះអាងថា លោកនឹងលើកយកបញ្ហានេះទៅបកស្រាយនៅទីក្រុងហ្សឺណែវ ប្រទេសស្វីស ចំថ្ងៃ ២៣ តុលា។ ការលើកឡើងដូច្នេះគឺ ខណៈដែលប្រមុខរដ្ឋាភិបាលកម្ពុជា នឹងទៅចូលរួម សន្និសីទអង្គការសហប្រជាជាតិ ស្តីពីពាណិជ្ជកម្មនិងការអភិវឌ្ឍ នៃវេទិកាវិនិយោគពិភពលោកឆ្នាំ ២០១៨ ចាប់ពីថ្ងៃទី ២២ ដល់ទី ២៤ ខែតុលា ឆ្នាំ ២០១៨ នៅប្រទេសស្វីស។
ចុះផ្សាយនៅថ្ងៃ៖
ស្តាប់ - ០១:៥០
លោក ហ៊ុន សែន អះអាងថា លោកគឺជាអ្នកដឹកនាំតាក់តែងកិច្ចព្រមព្រៀងក្រុងប៉ារីស និងជាអ្នកចុះហត្ថលេខាលើកិច្ចព្រមព្រៀងនេះផ្ទាល់ដៃ។ ជាកិច្ចព្រមព្រៀងដែលភាគីខ្មែរនៅគ្រានោះ យល់ព្រមបញ្ចប់ជម្លោះនឹងខ្មែរគ្នាឯង។ ជាមួយគ្នានោះ លោក ហ៊ុន សែន បានចំអកឲ្យអ្នកដែលធ្លាប់បកស្រាយខ្លឹមសារនៃកិច្ចព្រមព្រៀងនេះកន្លងមក ថាមិនដឹងកិច្ចព្រមព្រៀងនេះបែរមុខទៅណានោះទេ។ លើសពីនេះទៀត លោក ហ៊ុន សែន អះអាងថា កិច្ចព្រមព្រៀងក្រុងប៉ារីសគឺជាមរតករបស់លោក ក្នុងចំណោមមរតកជាច្រើនទៀត រួមមាន ការផ្តួលរំលំរបបខ្មែរក្រហមឆ្នាំ១៩៧៩ និងការចរចាបញ្ចប់សង្រ្គាមស៊ីវិលបានទាំងស្រុងជាមួយខ្មែរក្រហមក្នុងឆ្នាំ១៩៩៨។
ការថ្លែងរបស់ប្រមុខរដ្ឋាភិបាលខ្មែរបែបនេះ គឺក្នុងពិធីសំណេះសំណាល ជាមួយប្រជាពលរដ្ឋខ្មែរ ដែលកំពុងសិក្សា និងរស់នៅ ប្រទេសក្នុងតំបន់អឺរ៉ុបនាទីក្រុង ប្រ៊ុចសែល ប្រទេសប៊ែលហ្សិក កាលពីថ្ងៃទី១៩ ខែតុលា ខណៈលោកចូលរួមកិច្ចប្រជុំអាស៊ី-អឺរ៉ុប។
ជាការកត់សំគាល់ បញ្ហាកិច្ចព្រមព្រៀងក្រុងប៉ារីសនេះ ត្រូវបានអ្នកនយោបាយខ្មែរ យកមកបកស្រាយជាថ្មីទៀត នៅពេលដែលមានការរំលាយគណបក្សសង្រ្គោះជាតិ។ សម្រាប់គណបក្សប្រឆាំង និងអ្នកវិភាគមួយចំនួន ការរំលាយគណបក្សសង្រ្គោះជាតិ គឺជាការរំលោភរដ្ឋធម្មនុញ្ញនិងរំលោភកិច្ចព្រមព្រៀងទីក្រុងប៉ារីស។ កិច្ចព្រមព្រៀងក្រុងប៉ារីសដែលមានខ្លឹមសារធានាពីដំណើរការលទ្ធិប្រជាធិបតេយ្យ សេរីពហុបក្ស នៅកម្ពុជា។
ដោយសំអាងលើខ្លឹមសារនេះ អ្នកនយោបាយនៃអតីតគណបក្សសង្រ្គោះជាតិ បានស្នើឲ្យប្រទេសជាម្ចាស់ហត្ថលេខីនៃកិច្ចព្រមព្រៀងក្រុងប៉ារីស កោះប្រជុំឡើងវិញ ដើម្បីដោះស្រាយបញ្ហានយោបាយនៅកម្ពុជាបច្ចុប្បន្ន។ ប៉ុន្តែពីខាងរដ្ឋាភិបាលកម្ពុជា អះអាងថា មិនអាចធ្វើទៅរួចនោះឡើយ ដោយសារខ្លឹមសារនៃកិច្ចព្រមព្រៀងទីក្រុងប៉ារីស ត្រូវបានបញ្ចូលអស់ហើយទៅក្នុងខ្លឹមសារនៃរដ្ឋធម្មនុញ្ញកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ