ក្រោយការតវ៉ា៖ អាជីវករខ្មែរយល់ព្រមតាមការដំឡើងថ្លៃពន្ធត្រីនាំចូលទៅថៃតាមការកំណត់
គិតត្រឹមថ្ងៃសៅរ៍នេះ ស្ថានភាពទូទៅនៅច្រកព្រំដែនអន្តរជាតិប៉ោយប៉ែតកម្ពុជា ថៃ គឺមានសភាពស្ងប់ស្ងាត់ បន្ទាប់ពីផ្ទុះការតវ៉ាប្រមាណជាពីរថ្ងៃមកហើយ របស់អាជីវករខ្មែរលើការដំឡើងថ្លៃពន្ធត្រីដែលនាំចូលទៅថៃ។ មុនផ្ទុះការតវ៉ាត្រីនាំចូលទៅថៃមួយគីឡូក្រាមគិតថ្លៃពន្ធក្រោម១២បាតមានតម្លៃស្មើនឹង៥០០ទៅ៦០០រៀល។ ប៉ុន្តែចាប់ពីថ្ងៃទី១មីនាតទៅ ភាគីថៃសម្រេចដំឡើងពន្ធត្រីនាំចូលពីកម្ពុជាក្នុងតម្លៃ១២បាតមានតម្លៃស្មើនឹង១៤០០ទៅ១៥០០រៀល។ បើតាមអាជ្ញាធរកម្ពុជាអាជីវករខ្មែរបានឯកភាពលើតម្លៃពន្ធថ្មីនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
លោក ង៉ោ ម៉េងជ្រួន អភិបាលក្រុងប៉ោយប៉ែតបានគូសបញ្ជាក់ថា ពីមុខមកការនាំចូលត្រីទៅលក់នៅថៃគឺស្ថិតនៅក្នុងអត្រាពន្ធមួយមិនប្រាកដប្រជា ពោលគឺស្ថិតនៅក្រោមតម្លៃ១២បាតក្នុងមួយគីឡូក្រាមដែលមានតម្លៃស្មើនឹង៥០០ទៅ៦០០រៀល។ លោក ង៉ោ ម៉េងជ្រួន បន្ថែមថា អត្រាពន្ធ១២បាតសម្រាប់ការនាំចូលត្រីទៅថៃនេះ គឺមានយូរមកហើយមិនមែននៅសុខៗថៃនឹកឃើញដំឡើងពន្ធនោះទេ។ ប៉ុន្តែដោយសារតែមានការយោគយល់រវាងអាជ្ញាធរប្រទេសទាំងពីរទើបថៃអនុគ្រោះចំពោះតម្លៃពន្ធនៃការនាំចូលត្រីទៅថៃនាពេលកន្លងមក។
ប៉ុន្តែយ៉ាងណាក៏ដោយ តាមរយៈកិច្ចប្រជុំជាបន្ទាន់មួយ នៅក្នុងការរកដំណោះស្រាយជូនអាជីវករខ្មែរជាមួយភាគីថៃនោះ កម្ពុជាបានស្នើទៅថៃឲ្យធ្វើយ៉ាងណាជូនដំណឹងជាមុនមកអាជ្ញាធរខ្មែរដើម្បីចរចាជាមួយអាជីវករ ចំពោះការដំឡើងពន្ធតម្លៃត្រីនេះ ដោយមិនមែនធ្វើឡើងជាលក្ខណៈបន្ទាន់បែបនេះទេ។
ដោយឡែកសម្រាប់លោក ស៊ុម ចាន់គា មន្ត្រីឃ្លាំមើលសិទ្ធិមនុស្សនៃអង្គការអាដហុកប្រចាំខេត្តបន្ទាយមានជ័យមើលឃើញថា ការចរចារបស់អាជ្ញាធរជាមួយភាគីថៃគឺទទួលបានដំណោះស្រាយមួយមិនមានប្រសិទ្ធភាពយូរអង្វែងសម្រាប់អាជីវករខ្មែរ។ លោកថា ការពន្យាពេលនៃការអនុវត្តអត្រាពន្ធថ្មីរហូតដល់ថ្ងៃទី១មីនាគឺដើម្បីតែទប់ស្កាត់កុំឲ្យអាជីវករខ្មែរបន្តធ្វើការតវ៉ាទៀតតែប៉ុណ្ណោះ។
លោកចាន់គា បង្ហាញក្ដីព្រួយបារម្ភ ខ្លាចមានការតវ៉ាជាថ្មីទៀតនៅថ្ងៃទី១មីនានៅពេលអត្រាពន្ធថ្មីចាប់អនុវត្តហើយអាជីវករខ្មែរនៅតែមិនអាចទទួលយកបាន។ សម្រាប់លោក គួរតែមានចរចាជាលក្ខណៈទ្រង់ទ្រាយធំរវាង ក្រសួងពាណិជ្ជកម្មកម្ពុជានិងថៃ ឬ ត្រឹមសភាពាណិជ្ជកម្មនៃប្រទេសទាំងពីរ ទើបអាចទប់ទល់ស្ថានការណ៍បាន។
លោក ស៊ុម ចាន់គា បង្ហាញមូលហេតុផ្សេងពីអាជ្ញាធរដែលនាំឲ្យថៃដំឡើងពន្ធត្រីគឺដោយសារតែថៃគិតទៅលើគុណភាពត្រីថា តើជាត្រីទឹកសាបរបស់ខ្មែរពិតឬក៏នាំបន្តពីវៀតណាម។ បើតាមលោកចាន់គា ពីមុនថៃពិនិត្យឃើញថា ត្រីកម្ពុជាការដំឡើងពន្ធស្ថិតនៅក្នុងតម្លៃផ្សេង តែប្រសិនបើត្រីនាំបន្តពីវៀតណាមគឺតម្លៃពន្ធនាំចូលគឺខ្ពស់។ ប៉ុន្តែដោយឡែកបើតាមអាជ្ញាធរថៃមូលហេតុនៃការដំឡើងពន្ធគឺដោយសារត្រីខ្មែរកំពុងវាយលុកខ្លាំងនៅទីផ្សារប្រទេសថៃ។
សូមបញ្ជាក់ថា នៅព្រឹកថ្ងៃទី២៤ កុម្ភៈ ក្រុមអាជីវករខ្មែរជាច្រើននាក់ បាននាំគ្នាយករទេះដឹកត្រី មកបិទផ្លូវស្ពានមិត្តភាពកម្ពុជា-ថៃ ច្រកអន្តរជាតិប៉ោយប៉ែត ដើម្បីរារាំងមិនឲ្យភាគីថៃ នាំទំនិញចូលមកកម្ពុជា។ មុនមួយថ្ងៃក្រុមអាជីវករក៏បានចាក់ត្រីជិត៣០០គីឡូក្រាម នៅលើស្ពានមិត្តភាពកម្ពុជា-ថៃ នៅច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ ដើម្បីតវ៉ាប្រឆាំងនឹងគោលនយោបាយដំឡើងពន្ធថ្មីរបស់អាជ្ញាធរថៃនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ