ទិវាអំណាន៖ រដ្ឋមន្ត្រីអប់រំបន្តជំរុញការអានឲ្យកាន់តែផុសផុលនៅទូទាំងប្រទេស
ក្រសួងអប់រំនៅថ្ងៃអាទិត្យនេះ បានរៀបចំទិវាអំណានលើកទី៣ក្រោមប្រធានបទ«អំណានគឺជាកំណប់វិជ្ជាមហាសាល»នៅវិទ្យាស្ថានបច្ចេកវិទ្យាកម្ពុជា។ ឆ្លៀតក្នុងឱកាសនេះលោក ហង់ ជួនណារ៉ុន រដ្ឋមន្ត្រីក្រសួងអប់រំបានបន្តជំរុញឲ្យមានការអានឲ្យកាន់តែផុសផុលនៅទូទាំងប្រទេស។ ការបន្តជំរុញដោយសារក្រសួងមើលឃើញថា ការអាននៅមិនឆ្លើយតាមការចង់បាន។
ចុះផ្សាយនៅថ្ងៃ៖
រដ្ឋមន្ត្រីក្រសួងអប់រំលោក ហង់ ជួនណារ៉ុន បានគូសបញ្ជាក់ថា ក្រសួងនឹងជំរុញទៅពលរដ្ឋខ្មែរ ជាពិសេសសិស្សានុសិស្ស ឲ្យបង្កើតឲ្យមានវប្បធម៌នៃការអាននៅទូទាំងប្រទេសព្រោះថា អំណានគឺជាកំណប់វិជ្ជាមហាសាល។ ក្នុងន័យនេះ លោកមើលឃើញថា ការអាននៅមិនទាន់ឆ្លើយតបការចង់បាននៅថ្នាក់ជាតិនៅឡើយទេ។
ការលើកឡើងរបស់លោករដ្ឋមន្ដ្រីនេះ ធ្វើឡើងក្នុងឱកាសដែលក្រសួងអប់រំរៀបចំកម្មវិធីអបអរសាទរទិវាអំណានជាតិ នាថ្ងៃអាទិត្យនេះ ក្នុងបរិវេណវិទ្យាស្ថានបច្ចេកវិទ្យាកម្ពុជា។ លោករដ្ឋមន្ត្រី ហង់ ជួនណារ៉ុន ក៏បានទទួលស្គាល់ថា ប្រទេសមួយរីកចំរើនទៅបានគឺអាស្រ័យទៅលើការលើកតម្កើងស្នាដៃអ្នកនិពន្ធ។ ចំណែកលោកស្រី ម៉ែន សំអន រដ្ឋមន្ត្រីទំនាក់ទំនងព្រឹទ្ធសភា រដ្ឋសភា និងជាតំណាងលោកនាយករដ្ឋ ហ៊ុន សែន បានបង្ហាញក្ដីព្រួយបារម្ភពីការរីកចម្រើននៃបច្ចេកវិទ្យានាំឲ្យមនុស្សគ្រប់គ្នាភ្លេចការអាន។
ជាការកត់សម្គាល់ ទិវាអំណានលើកទី៣នេះ រៀបចំឡើងមួយថ្ងៃពេញនៅវិទ្យាបច្ចេកវិទ្យាកម្ពុជា ឬសាលាតិចណូ ដោយមានអ្នកចូលរួមប្រមាណជា៤ពាន់នាក់។ ក្នុងនោះមានការចូលរួមពីអ្នកនិពន្ធមកធ្វើជាវាគ្មិននៅក្នុងបទបឋកថានានា។ ហើយនៅខាងក្រៅមានស្តង់តាំងពិព័ណ៌សៀវភៅផងដែរ។ ក្រៅពីនោះ ក៏មានផងដែរ ការប្រកួតអាន ស្មូតកំណាព្យ និងតែងនិពន្ធ។ ម្ចាស់ជ័យលាភីចំនួន៩រូបដែលទទួលជ័យជំនះនៅក្នុងការប្រកួតអាន ស្មូតកំណាព្យ និងតែងនិពន្ធ បានបង្ហាញសមត្ថភាពទៅតាមជំនាញរបស់ពួកគេរៀងខ្លួនជូនដល់អ្នកចូលរួមនៅក្នុងឱកាសនេះដែរ។
បើតាមគម្រោងទិវាអំណាននៅឆ្នាំក្រោយនឹងរៀបចំឡើងនៅខេត្តសៀមរាបដើម្បីឧទ្ទិសដឹងគុណដល់បុព្វបុរស់ខ្មែរដែលបន្សល់ទុកភាសាជាតិ។ សូមបញ្ជាក់ថា មូលហេតុដែលរដ្ឋាភិបាលសម្រេចជ្រើសយកថ្ងៃទី១១មីនាប្រារព្ធទិវាអំណានជាតិនៅរៀងរាល់ឆ្នាំនោះដោយសារតែថ្ងៃ១១មីនាជាថ្ងៃកំណើតសម្ដេចព្រះសង្ឃរាជ្យជួនណាត ដើម្បីរំលឹកវីរៈភាពរបស់ព្រះអង្គនៅក្នុងការចង់ក្រងភាសាជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ