លោក សម រង្ស៊ី ចាត់ទុកការសុំសិទ្ធិធ្វើនយោបាយឡើងវិញ ថាជាការចុះចូល និងជារឿងថោកទាប
លោក សម រង្ស៊ី អតីតប្រធានគណបក្សប្រឆាំងដែលកំពុងរស់នៅដោយនិរទេសខ្លួននៅក្រៅប្រទេស បានបន្តរិះគន់និងវាយប្រហារទៅលើការសុំសិទ្ធិធ្វើនយោបាយឡើងវិញ ថាជាការសុំចុះចូលជាមួយលោកនាយករដ្ឋមន្ត្រី ហ៊ុន សែន និងជារឿងថោកទាបបំផុត។ ការវាយប្រហាររបស់លោក សម រង្ស៊ី គឺបន្ទាប់ពីមានអតីតមន្ត្រីជាន់ខ្ពស់គណបក្សប្រឆាំង៣រូបបានស្នើសុំសិទ្ធិធ្វើនយោបាយឡើងវិញ និងស្របពេលដែលមានប្រភពអនាមិកខ្លះបង្ហើបថា នឹងមានការស្នើសុំសិទ្ធិធ្វើនយោបាយជាទ្រង់ទ្រាយធំបន្ថែមទៀត។
ចុះផ្សាយនៅថ្ងៃ៖
«ការទៅសុំសិទ្ធិពីលោក ហ៊ុន សែន ដើម្បីធ្វើនយោបាយឡើងវិញ ក្នុងកាលៈទេសៈ ដែលលោក កឹម សុខា នៅជាប់ឃុំឃាំងនៅឡើយ ហើយគណបក្សសង្គ្រោះជាតិ នៅមិនទាន់បានដំណើរការឡើងវិញនៅឡើយនោះ គឺជាអ្វីដែលោក សម រង្ស៊ី បានចាត់ទុកថា គឺការចុះចូលជាមួយលោក ហ៊ុន សែន យ៉ាងភ្លីភ្លើ និងថោកទាបជាទីបំផុត»។ នេះជាអ្វីដែលលោក សម រង្ស៊ី អតីតប្រធានគណបក្សប្រឆាំង ដែលបានសរសេរនៅលើគណនីយហ្វេសបុកផ្លូវការរបស់លោក នៅព្រឹកថ្ងៃទី ០៩ មីនា។
ប៉ុន្តែលោកអ៊ូ ច័ន្ទរ័ត្ន អតីតតំណាងរាស្ត្រគណបក្សប្រឆាំងមិនគាំទ្រប្រសាសន៍របស់លោក សម រង្ស៊ី នេះទេ។ លោកអ៊ូ ច័ន្ទរ័ត្ន បានចាត់ទុកការលើកឡើងរបស់លោក សម រង្ស៊ី បែបនេះ ថាជាការបន្ថែមការឈឺចាប់ឲ្យសហការីរបស់ខ្លួនតែប៉ុណ្ណោះ ហើយ វានឹងជំរុញឲ្យមានការបែកបាក់គ្នាកាន់តែជ្រាលជ្រៅថែមទៀត។
លោក សម រង្ស៊ី តាមរយៈទំព័រហ្វេសបុកផ្លូវការរបស់ខ្លួន បានរិះគន់អ្នកដែលបានសុំសិទ្ធិធ្វើនយោបាយឡើងវិញនៅក្នុងកាលៈទេសៈដែលមិនទាន់មានដំណោះស្រាយនយោបាយនោះថា មិនបានយកគំរូតាមលោក កឹម សុខាឡើយ។ គួរកត់សំគាល់ថា ការចេញមកអះអាងរបស់លោក សម រង្ស៊ី នៅពេលនេះ បានធ្វើឡើង បន្ទាប់ពីអតីតមន្ត្រីជាន់ខ្ពស់គណបក្សប្រឆាំងចំនួន៣រូប បានស្នើសុំសិទ្ធិធ្វើនយោបាយពីលោកនាយករដ្ឋមន្ត្រី ហ៊ុន សែន ឡើងវិញ។ ទន្ទឹមគ្នានេះ ប្រភពអនាមឹកខ្លះបានប្រាប់កាសែតក្នុងស្រុកកាលពីពេលថ្មីៗនេះថា នៅពេលខាងមុខនេះ នឹងមានការស្នើសុំជាទ្រង់ទ្រាយធំបន្ថែមទៀត ស្របពេលដែលអ្នកនាំពាក្យគណបក្សប្រជាជនកម្ពុជាលោក សុខ ឥសាន បានអំពាវនាវឲ្យក្រុម កឹម សុខា និយម ចាប់យកឱកាសមាសនេះ មុនពេលទ្វារសុំសិទ្ធិធ្វើនយោបាយឡើងវិញនឹងត្រូវបិទ នៅមុនឬក្រោយពិធីបុណ្យចូលឆ្នាំខ្មែរខាងមុខនេះ។
ឆ្លើយតបទៅនឹងការចោទប្រកាន់នេះ លោក គង់ គាំ អតីតមន្ត្រីជាន់ខ្ពស់គណបក្សប្រឆាំងម្នាក់ ដែលទើបទទួលបានសិទ្ធិធ្វើនយោបាយឡើងវិញនោះ បានថ្លែងថា អ្វីដែលលោកធ្វើនេះ គឺជាការគោរពតាមច្បាប់ប្រទេសតែប៉ុណ្ណោះ។ «ថោកទាប ឬ ថ្លៃថ្នូ វាមិនអាស្រ័យលើការចោទប្រកាន់របស់លោក សម រង្ស៊ី នោះទេ»។ នេះបើតាមការបន្ថែមរបស់លោក គង់ គាំ។
ប៉ុន្តែយ៉ាងណាក៏ដោយ តាមរយៈទំព័រហ្វេសបុករបស់ខ្លួន លោក សម រង្ស៊ី បានពន្យល់ថា «មន្ត្រីគណបក្សសង្គ្រោះជាតិស្ទើរតែ១០០ភាគរយ បានយកគំរូតាមលោក កឹម សុខា ហើយពួកគេមិនចាញ់បោកលោកនាយករដ្ឋមន្ត្រី ហ៊ុន សែន ជាដាច់ខាត។ ពីព្រោះពួកគេដឹងថា ក្រោមសម្ពាធអន្តរជាតិ ដូចដែលមិនធ្លាប់មានពីមុនមក (គឺទណ្ឌកម្មពាណិជ្ជកម្មដ៏ធ្ងន់ធ្ងរ ពីសហភាពអឺរ៉ុប និងសហរដ្ឋអាមេរិក) របបទីក្រុងភ្នំពេញ នឹងត្រូវគេបង្ខំឲ្យដោះលែង កឹម សុខា ក្នុងពេលឆាប់ៗនេះ ហើយអនុញ្ញាតិឲ្យគណបក្សសង្គ្រោះជាតិដំណើរការឡើងវិញ។ មានន័យថា មន្ត្រីគណបក្សសង្គ្រោះជាតិទាំងអស់នោះ នឹងទទួលបានសិទ្ធិធ្វើនយោបាយឡើងវិញជាស្វ័យប្រវត្តិ ដោយមិនចាំបាច់ទៅសុំសិទ្ធិនោះពីលោកនាយករដ្ឋមន្ត្រី ហ៊ុន សែន ឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ