មនុស្សប្រហែល៦ពាន់នាក់ចូលរួមអបអរការដាក់ប្រាសាទសំបូរព្រៃគុកជាសម្បត្តបេតិកភណ្ឌ
នៅថ្ងៃទី១៧កក្កដាខាងមុខនេះ រដ្ឋាភិបាលនឹងរៀបចំពិធីអបអរសាទរនៃការដាក់បញ្ចូលតំបន់ប្រាសាទសំបូរព្រៃគុក ជាសម្បត្តបេតិកភណ្ឌពិភពលោក នៅពហុកីឡាដ្ឋានជាតិអូឡាំពិកកម្ពុជាក្រោមវត្តមាន លោកនាយករដ្ឋមន្ត្រី ហ៊ុន សែន និងភរិយា។ តាមការប៉ាន់ស្មានមនុស្សប្រហែលជា៦ពាន់នាក់ចូលរួមនៅក្នុងកម្មវិធីនេះ។
ចុះផ្សាយនៅថ្ងៃ៖
ស្តាប់ - ០១:៣៣
អ្នកចូលរួមប្រហែលជា៦ពាន់នាក់នេះ គឺជាចំនួនមួយត្រូវអញ្ជើញឲ្យចូលរួមសមស្របនឹងទំហំរបស់ស្តាតអូឡាំពិក។ ពួកគេទាំងនេះគឺជា យុវជន មហាជន កងកម្លាំងប្រដាប់អាវុធជាដើម។ នៅក្នុងព្រឹត្តការណ៍នោះ មាននឹងមានការទូងស្គរ នឹងការលើកឡើងពីប្រវត្តិប្រាសាទរួមទាំងសាវតានៃការដាក់បញ្ចូល ប្រាសាទសំបូរព្រៃគុកទៅក្នុងបញ្ជីបេតិកភណ្ឌពិភពលោក។ នេះបើតាមការគូសបញ្ជាក់របស់ លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា។
លោក វ៉ាត់ ចំរើន បានអះអាងថា ពិធីនេះធ្វើឡើងនៅក្នុងរូបភាពមួយយ៉ាងអធិកអធមដូចកាលដែល រដ្ឋាភិបាលរៀបចំពិធីអបអរសាទរការដាក់បញ្ចូលប្រាសាទព្រះវិហារចូលជាសម្បត្តបេតិភណ្ឌពិភពលោកក្នុងឆ្នាំ២០០៨។ កាលណោះនៅប្រាសាទព្រះវិហារផ្ទាល់តែម្ដងរដ្ឋាភិបាលក៏បានរៀបចំពិធីនេះនៅទីនោះដែរ។ ចំពោះប្រាសាទសំបូរព្រៃគុកវិញបើតាមគម្រោងអាជ្ញាធរក៏គ្រោងរៀបចំពិធីមួយនៅប្រាសាទផ្ទាល់តែម្ដងដែរតែមិនទាន់កំណត់ថ្ងៃ។
សូមបញ្ជាក់ថា ប្រាសាទសំបូរព្រៃគុក ត្រូវបានចុះបញ្ជី ជាបេតិកភណ្ឌពិភពលោក នៅក្នុងកិច្ចប្រជុំគណៈកម្មាធិការ បេតិកភណ្ឌពិភពលោក នៅទីក្រុង Krakow ប្រទេសប៉ូឡូញ កាលពីថ្ងៃទី៨ ខែកក្កដា ។ នេះជាប្រាសាទ ទី៣ ហើយ ដែលបានចូលជាសម្បត្តិ បេតិក ភណ្ឌពិភពលោក ក្រោយពីប្រាសាទអង្គរវត្ត ដាក់បញ្ចូលនៅថ្ងៃទី១៤ ខែធ្នូ ឆ្នាំ១៩៩២ និងប្រាសាទព្រះវិហារដាក់បញ្ចូលនៅថ្ងៃទី៧ ខែកក្កដា ឆ្នាំ២០០៨។ ក្រោយដាក់បញ្ចូលនេះ ហើយ រដ្ឋាភិបាលក៏បានបំផុសឲ្យមានព្រឹត្តការណ៍ទូងស្គរដើម្បីជាការអបអរនៅទូទាំប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ