លោក ស ខេង ការពារចំណាត់ការរបស់សមត្ថកិច្ចក្នុងការចាប់ខ្លួនសកម្មជនបក្សប្រឆាំង
លោក ស ខេង នៅថ្ងៃសៅរ៍នេះ បានចេញការពារចំណាត់ការរបស់សមត្ថកិច្ចដែលបាននិងបន្តចាប់ខ្លួនសកម្មជនបក្សប្រឆាំងកន្លងមកនេះថាជា «វិធានការច្បាប់ចំពោះសកម្មភាពទាំងឡាយណាដែលប៉ុនប៉ងបំផ្លាញ សុខសន្តិភាព ស្ថេរភាព នយោបាយ ការញុះញង់ឲ្យមានអំពើហិង្សា ចលនាបំបែកបំបាក់ផ្ទៃក្នុងជាតិ ឈានទៅផ្ដួលរំលំរាជរដ្ឋាភិបាល គឺពុំមែនជាសកម្មភាពរំលោភសិទ្ធិមនុស្សក្នុងសង្គមប្រជាធិបតេយ្យនោះឡើយ»។ ការអះអាងរបស់រដ្ឋមន្ត្រីក្រសួងមហាផ្ទៃបែបនេះគឺជាការឆ្លើយតបនឹងការរិះគន់ពីមជ្ឈដ្ឋានខ្លះចំពោះការចាប់ខ្លួនសកម្មជនបក្សប្រឆាំងដែលគាំទ្រការវិលត្រឡប់របស់ លោក សម រង្ស៊ី នៅថ្ងៃទី៩ ខែវិច្ឆិកា។
ចុះផ្សាយនៅថ្ងៃ៖
តាមរយៈទំព័រហ្វេសប៊ុក លោក ស ខេង បានហៅផែនការវិលចូលកម្ពុជាវិញរបស់លោក «សម រង្ស៊ី និងបក្សពួកថាជាគំរោងនៃចលនាឧទ្ទាមសុទ្ធសាធ ហើយដែលនឹងនាំទៅដល់ការបំផ្លាញសុខសន្តិភាពនិងការបំបែកបំបាក់ជាតិដែលអាចបង្កនូវគ្រោះមហន្តរាយធ្ងន់ធ្ងរមិនអាចប៉ាន់ស្មានបានចំពោះជាតិនិងប្រជាជនកម្ពុជាយើង»។
បើតាមរដ្ឋមន្ត្រីមហាផ្ទៃរូបនេះ ការវិលត្រឡប់របស់ លោក សម រង្ស៊ី នាពេលនេះគឺខុសស្រឡះពីសកម្មភាពនៃការវិលត្រឡប់របស់ លោក សម រង្សីកាលពីឆ្នាំ២០១៣។ ខុសគ្នាព្រោះពេលនោះ លោក សម រង្ស៊ី ជាប្រធានគណបក្សនយោបាយស្របច្បាប់ និង ទទួលបានការប្រោសព្រះរាជទានលើកលែងទោសពីព្រះមហាក្សត្រ ហើយការវិលត្រឡប់របស់គាត់នៅពេលនោះគឺដើម្បីមកចូលរួមប្រកួតប្រជែងក្នុងការបោះឆ្នោតតាមគោលការណ៍នៃលទ្ធិប្រជាធិបតេយ្យសេរីពហុបក្ស។ ហេតុដូច្នេះហើយនៅពេលនោះអ្នកដែលមានសមានចិត្តអាចមានសិទ្ធិចូលរួមហែរហមគាត់គឺ ពុំមែនជាសកម្មភាពខុសច្បាប់នោះឡើយ។ប៉ុន្តែការវិលត្រឡប់មកកម្ពុជានាពេលនេះគឺ លោក សម រង្ស៊ី ស្ថិតក្នុងភាពជាទណ្ឌិត ហើយ ជាអ្នកដឹកនាំគំរោងចលនាឧទ្ទាមក្រៅច្បាប់ថែមទៀតផង។នេះជាការអះអាងរបស់លោក ស ខេង។
យ៉ាងណាក៏ដោយ នៅក្នុងសេចក្តីថ្លែងការណ៍ផ្ទាល់មាត់ លោក សម រង្ស៊ី បានអំពាវនាវឲ្យពលករខ្មែរដែលកំពុងតែនៅក្រៅប្រទេសនោះ វិលមកអមដំណើរលោកមកកម្ពុជាវិញនៅថ្ងៃ៩វិច្ឆិកា ដើម្បី«ដណ្តើមកម្ពុជាមកប្រគល់សងប្រជាជនខ្មែរជាម្ចាស់វិញ»។
ប៉ុន្តែនៅពេលថ្មីៗអាជ្ញាធរបានហាមឃាត់មិនឲ្យលោកស្រី មូរ សុខហួរ ប្រធាន គណៈកម្មការមាតុភូមិនិវត្តន៍របស់លោក សម រង្ស៊ី ចូលទៅប្រទេសថៃឡើយ ខណៈមានបំរាមហាមឃាត់ពីរដ្ឋាភិបាលកម្ពុជា។
គិតត្រឹមថ្ងៃទី២៦តុលាគឺមានសកម្មជនបក្សប្រឆាំងចំនួន៥៥នាក់ត្រូវបានសមត្ថកិច្ចចាប់ឃុំខ្លួន និងជិត២០០នាក់ទៀតរងការចេញដីកាកោះហៅ បន្ទាប់ពីពួកគេប្រកាសគាំទ្រ ការវិលត្រឡប់របស់ លោក សម រង្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ