មន្ត្រីអ្នកមុខ អ្នកការជិត៤ម៉ឺននាក់ នឹងចូលរួមសម្ពោធវិមានឈ្នះឈ្នះនៅថ្ងៃស្អែក
មនុស្សជិត៤ម៉ឺននាក់ ត្រៀមចូលរួមសម្ពោធវិមានឈ្នះឈ្នះ ដែលនឹងចាប់ផ្ដើមនៅថ្ងៃទី២៩ធ្នូស្អែកនេះ ខណៈកម្លាំងសមត្ថកិច្ចចម្រុះត្រៀមខ្លួនរួចហើយ ដើម្បីការពារសន្តិសុខជារួមនៅក្នុងព្រឹត្តការណ៍ដែលមានរយៈពេលបីថ្ងៃនេះ។ កម្លាំងកងរាជអាវុធហត្ថ ដែលនឹងត្រូវដាក់ពង្រាយមានចំនួនជិត២ពាន់នាក់។
ចុះផ្សាយនៅថ្ងៃ៖
យ៉ាងហោចណាស់ មនុស្សជិត៤ម៉ឺននាក់ ក្នុងនោះជាមន្ត្រីរដ្ឋាភិបាល បណ្ដាអង្គទូតនៅទីក្រុងភ្នំពេញ រួមនឹងអ្នកពាក់ព័ន្ធឯទៀតដូចជា៖ សិស្សានុសិស្ស និងមន្ត្រីរាជការនៅតាមក្រសួង ស្ថាប័នរដ្ឋជាដើម ត្រៀមចូលរួមសម្ពោធវិមានឈ្នះ ឈ្នះ នៅថ្ងៃសៅរ៍ ទី២៩ខែធ្នូ។ ក្រៅពីមន្ត្រីអ្នកមុខអ្នកការទាំងនេះ ពិធីសម្ពោធវិមានឈ្នះឈ្នះ ក៏មានការចូលរួមពីឧត្តមសេនីយ៍យោធាជាន់ខ្ពស់ពីប្រទេសចំនួន ៤ រួមមានចិន វៀតណាម ឡាវ និងថៃដែរ។
អ្នកនាំពាក្យក្រសួងការពារជាតិ លោក ឈុំ សុជាតិ រំពឹងថា មនុស្សម្នាជាច្រើនពាន់នាក់នឹងចូលរួមទស្សនាវិមានឈ្នះឈ្នះ ក្រោយកម្មវិធីសម្ពោធបានបញ្ចប់។ ការទស្សនារបស់ពលរដ្ឋខ្មែរនិងភ្ញៀវទេសចរណ៍បរទេសធ្វើឡើងដោយមានការពន្យល់ពីសាវតានៃការកកើតឡើងវិមានឈ្នះឈ្នះពីអ្នកជំនាញ។ ក្រៅពីទស្សនានិងស្វែងយល់ពីប្រវត្តិវិមានឈ្នះឈ្នះ មនុស្សម្នាអាចចូលរួមទស្សនាការតាំងពិព័ណ៍ទំនិញប្រមាណជាជិត៨០០កន្លែង អមដោយការប្រគំតន្ត្រីខ្នាតធំ នៅលើទីតាំងទំហំដី៨ហិកតានៅខាងមុខកីឡដ្ឋានមរតកតេជោ ក្នុងសង្កាត់ព្រែកតាសេក ខណ្ឌជ្រោយចង្វារ។ ក៏មានដែរ ការបាញ់កាំជ្រួច 3D តាមលក្ខណៈទំនើប ជារូបភាពផ្សេងៗ ប្រមាណរយៈពេល៤៥នាទី។
ដើម្បីរក្សាបានសន្តិសុខជារួម កម្លាំងសមត្ថកិច្ចចម្រុះអះអាងពីការធានារក្សាសុវត្ថិភាព និងសន្តិសុខជូនពលរដ្ឋដែលចូលរួមទស្សនាវិមានឈ្នះឈ្នះ។ ហើយទន្ទឹមនឹងនេះ អាជ្ញាធររាជធានីភ្នំពេញក៏ត្រៀមបិទផ្លូវនៅកំណាត់មហាវិថីនៃវិមានឈ្នះឈ្នះ។
បើតាមអ្នកនាំពាក្យក្រសួងការពារជាតិ វិមានឈ្នះឈ្នះដាក់ជាតំបន់ទេសចរណ៍ប្រវត្តិសាស្ត្រដែលអនុញ្ញាតឲ្យចូលទស្សនាដោយសេរី។ សម្រាប់រដ្ឋាភិបាលកម្ពុជា ការសម្ពោធវិមានឈ្នះឈ្នះជាព្រឹត្តការណ៍ប្រវត្តិសាស្ត្រ។ លោកនាយករដ្ឋមន្ត្រី ហ៊ុន សែន ចាត់ទុកវិមានឈ្នះឈ្នះ គឺជាតំណាងនៃការបង្រួបបង្រួមជាតិ ឯករាជ្យជាតិ សាមគ្គីភាព បូរណភាពទឹកដី វឌ្ឍនភាព និងវិបុលភាពនៃកម្ពុជាទាំងមូល។
វិមានឈ្នះឈ្នះ មានឆ្លាក់រូបនៅតាមជញ្ជាំងជុំវិញបរិវេណដែលបរិយាយអំពីដំណើរឆ្ពោះទៅរកការផ្ដូលរំលំរបបខ្មែរក្រហម ដែលចាប់ផ្ដើមតាំងពីថ្ងៃទី ២០ មិថុនា ១៩៧៧ ។ ពេលនោះ លោក ហ៊ុន សែន និងអ្នកពាក់ព័ន្ធបានធ្វើដំណើរទៅវៀតណាមដើម្បីរំដោះប្រទេសកម្ពុជាពីការគ្រប់គ្រងរបស់ប៉ុលពត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ